እተደናግር ሕቶ

ብዛዕባ ህይወትን ሞትን ብዙሕን እተፈላለየን ኣረኣእያ ኣሎ። ገሊኦም ድሕሪ ሞት ካልእ ኣካል ለቢሶም ወይ ኣብ ካልእ ቦታ ዀይኖም ብህይወት ምንባር ከም ዚቕጽሉ ይኣምኑ። ገሊኦም ድማ ካልእ ህይወት ምእንቲ ኺነብሩ፡ እንደገና ኸም ዚውለዱ ይኣምኑ። ገሊኦም ከኣ ሞት መወዳእታ ዅሉ ነገር ከም ዝዀነ ይሓስቡ።

ብምኽንያት ኣተዓባብያኻ ወይ ባህልኻ፡ ብዛዕባ እዚ ጕዳይ እዚ ናትካ እምነት ይህልወካ ይኸውን። ‘ድሕሪ ሞት እንታይ እዩ ዜጋጥም፧’ ብዛዕባ እትብል ሕቶ ኣዝዩ እተፈላለየ ኣረኣእያ ስለ ዘሎ፡ ነዛ እተደናግር ሕቶ እዚኣ ዜተኣማምንን ቅኑዕን መልሲ ምእንቲ ኽንረኽበላ መን ኪሕግዘና ይኽእል፧ እቲ መልሲኸ ኻበይ ክንረኽቦ ንኽእል፧

መራሕቲ ሃይማኖት፡ ነፍሲ ሰብ ከም ዘይትመውት ዚገልጽ ሰረተ እምነት ንዘመናት ምሂሮም እዮም። ሰዓብቲ መብዛሕትአን ዓበይቲ ሃይማኖታት፡ ማለት ክርስትያናትን ሂንዱነትን ኣይሁድን እስላምን ካልኦትን፡ ድሕሪ ሞት ካብ ሰብነት ተፈልያ ኣብ መንፈሳዊ ዓለም እትነብር ዘይትመውት ነፍሲ ኸም ዘላ ይኣምኑ እዮም። ብኻልእ ሸነኽ ድማ ኣመንቲ ቡድህና፡ ኣብ ውሽጢ ሓደ ሰብ ዘሎ ሓይሊ ማእለያ ብዘይብሉ ዳግመ ውልደት ኣቢሉ ኒርቫና ናብ ዚብሃል ፍስሃ ዝመልኦ ዅነት ኪበጽሕ ከም ዚኽእል ይኣምኑ።

ብምኽንያት እዚ ትምህርትታት እዚ፡ ኣብ መላእ ዓለም ዘለዉ መብዛሕትኦም ሰባት፡ ሞት ኣብ ካልእ ዓለም ብህይወት ንምንባር መገዲ ኸም ዚኸፍት ኪኣምኑ ኽኢሎም እዮም። ብዙሓት ሰባት እምበኣር፡ ሞት ኣብ ዑደት ህይወት ኣገዳሲ ስጕምቲ ኸም ዝዀነ፡ ዕላማ ኣምላኽ እውን ምዃኑ እዮም ዚኣምኑ። ኰይኑ ግና፡ መጽሓፍ ቅዱስ ብዛዕባ እዚ ጕዳይ እዚ እንታይ ይብል፧ በጃኻ፡ ነዛ እትቕጽል ዓንቀጽ ኣንብባ። እቲ መልሲ ኼገርመካ ይኽእል እዩ።