ንየሆዋ ኽንህቦ ንኽእል ኢና

¹ ሰባት ንኣምላኽ ኪህብዎ ኸም ዚኽእሉስ ትፈልጥዶ፧ ኣቤል ካብተን ክቡራት ጥሪቱ ንየሆዋ መስዋእቲ ኣቕረበሉ፣ ኖህን እዮብን እውን ተመሳሳሊ መስዋእቲ ገይሮም እዮም። (ዘፍ. 4:4፣ 8:20፣ እዮ. 1:5) ልክዕ እዩ: የሆዋ ዅሉ ነገር ዚውንን ስለ ዝዀነ: ከምዚ ዝኣመሰለ ወፈያታት ዋላ ሓንቲ ኸም ዘይውስኸሉ ፍሉጥ እዩ። እንተዀነ ግን: እዞም እሙናት ሰብኡት እዚኣቶም በዚ መስዋእትታት እዚ ኣቢሎም እታ ንኣምላኽ ዝነበረቶም ዓማቝ ፍቕሪ እዮም ኣርእዮም። ሎሚ እውን: ግዜናን ጕልበትናን ጥሪትናን ንየሆዋ “መስዋእቲ ምስጋና” ንምቕራብ ክንጥቀመሉ ንኽእል ኢና።—እብ. 13:15

² ግዜ:- ኣብ ኣገልግሎት ምሉእ ብምሉእ ንምክፋል ካብቲ ብዙሕ ኣገዳስነት ዘይብሉ ንጥፈታት ግዜ ‘ኽንዕድግሲ’ ኽሳዕ ክንደይ ዚነኣድ ኰን እዩ! (ኤፌ. 5:15, 16) ኣብ ዓመት ሓደ ወይ ክልተ ወርሒ ሓገዝቲ ፈለምቲ ንምዃን መደባትና ኸነተዓራሪ ንኽእል ንኸውን። ንውሓት እቲ ኣብ ኣገልግሎት እነሕልፎ ሰዓታት እውን ክንውስኸሉ ንኽእል ንኸውን። ኣብ ነፍሲ ወከፍ ሰሙን ተወሳኺ 30 ደቒቕ ምግልጋል: ኣብ ወርሒ ኣገልግሎትና ብኽልተ ሰዓት ንኸነዛይድ ይሕግዘና።

³ ጕልበት:- ጕልበትና ኣብ ኣገልግሎት ክንጥቀመሉ እንተ ደኣ ደሊና: ንየሆዋ እቲ ዝበለጸ ኸም ዘይንህቦ ኺገብረና ዚኽእል ኣድካሚ ዝዀነ መዘናግዕን ስራሕን ከነወግድ የድልየና። ንልብና ‘ኺጸቅጥ’ ዚኽእል ጓሂ እውን ከነርሕቕ የድልየና፣ ከመይሲ: ነቲ ንየሆዋ ንምግልጋል ክንጥቀመሉ እንኽእል ሓይልና ኺጽንቅቖ ይኽእል እዩ። (ምሳ. 12:25) ናይ ሓቂ ዜሻቕል ነገር ምስ ዚህልወና እውን ከይተረፈ: ‘ጾርና ናብ የሆዋ ኽንድርብዮ’ ኽሳዕ ክንደይ ዝበለጸ ዀን እዩ!—መዝ. 55:22፣ ፊል. 4:6, 7

⁴ ጥሪት:- ነቲ ዕዮ ስብከት ንምድጋፍ ስጋዊ ጥሪትና እውን ክንህብ ንኽእል ኢና። ጳውሎስ ንብጾቱ ክርስትያናት: ነቶም ሽጉራት ዚህብዎም ምእንቲ ኺህልዎም በብግዜኡ ‘ኼዋህልሉ’ ኣተባብዖም። (1 ቈረ. 16:1, 2) ንሕና እውን ብተመሳሳሊ መገዲ: ንጉባኤና ዜድሊ ነገራትን ነቲ ዓለምለኻዊ ዕዮን ዚኸውን ገንዘብ ከነዋህልል ንኽእል ኢና። ሒደት እውን ይኹን ብዘየገድስ: የሆዋ ነቲ ኻብ ልቢ እንገብሮ ወፈያ የማስወሉ እዩ።—ሉቃ. 21:1-4

⁵ የሆዋ ብዙሕ ውህበታት እዩ ሂቡና። (ያእ. 1:17) ግዜናን ጕልበትናን ጥሪትናን ንዕኡ ንምግልጋል ብልግሲ ብምሃብ ሞሳና ኸነርኢ ንኽእል ኢና። ከምዚ ምግባርና ንየሆዋ የሓጕሶ እዩ፣ ከመይሲ: “ኣምላኽ ሕጉስ ወሃቢ እዩ ዚፈቱ።”—2 ቈረ. 9:7