መርኣዪ ጽሑፋት ተጠቒምካ ብኸመይ ከም እትምስክር

ጽሑፋት ዝሓዘ ዓረብያታትን ሰደቓታትን ተጠቒምካ ዚግበር ምስክርነት፡ ነቶም ቅኑዕ ዝልቦም ሰባት ናብ ሓቂ ኸም ዚሰሓቡ ኣብ ምግባር ውጽኢታዊ ዀይኑ ኣሎ። (ዮሃ. 6:44) ስለዚ፡ ሽማግለታት ኣብቲ ኣብ ውሽጢ ኽሊ ጉባኤኦም ዚርከብ ኣጋር ዚበዝሖ ኸባቢ፡ ብግህዶ ዚግበር ምስክርነት ንኺውድቡ ተተባቢዖም ኣለዉ። ዓረብያታት ኣብ ሓደ ቦታ ቐወምቲ ስለ ዘይኰና፡ ብሓፈሻ ኻብ ሰበ ስልጣን ፍቓድ ምሕታት ኣየድልን እዩ። ኣብዚ ዕዮ እዚ ኺሳተፉ ብቕዓት ዘለዎም መን እዮም፧ እቶም ዜመዛዝኑን ብኣኽብሮት ዚዛረቡን ጽቡቕ ናይ ምዝራብ ክእለት ዘለዎምን ኣስፋሕቲ እዮም። እዚ ቐጺሉ ዘሎ ሓሳባት፡ ኣስፋሕቲ ዝያዳ ኣሳልጦ ኺረኽቡ ዚሕግዝ፡ ኪገብርዎ ዘለዎምን ኪገብርዎ ዘይብሎምን ነገራት ዚገልጽ እዩ።

ክትገብሮ ዘሎካ፦

ምቕሉል፡ ፍሽሑው፡ ንሓለፍቲ መገዲ ድማ ተሓባባሪ ኹን። ገሊኦም ኣስፋሕቲ ምዉቕን ልባውን ፍሽኽታ ብምርኣይ፡ ብምቕሉል ኣገባብ ሰላም ይብሉ። ሓደ ሓላፍ መገዲ ናብቲ መርኣዪ ጽሑፋት ምስ ዚጥምት፡ “ዝደለኻዮ ኽትወስድ ትኽእል ኢኻ” ኽትብሎ ትኽእል ኢኻ።
ካብቲ መርኣዪ፡ ኣብ ግቡእ ርሕቀት ኴንካ ደው በል። ኣብ ገሊኡ ቦታታት፡ ኣስፋሕቲ ኣብ ጥቓ መርኣዪ ጽሑፋት ደው ብምባል፡ ዝያዳ ኣሳልጦ ረኺቦም እዮም። ካልኦት ግና፡ ኣብ ጥቓ መርኣዪ ጽሑፋት ደው ምባል ንሓለፍቲ መገዲ ዜሰክፎም ኰይኑ ስለ ዝረኸብዎ፡ ካብኡ ቝሩብ ርሒቖም ደው ብምባል፡ እቲ ሰብ ናብቲ መርኣዪ ኽሳዕ ዚቐርብ ይጽበዩ። ሓደ ሰብ ናብቲ መርኣዪ ምስ ዚቐርብ ምስኡ ዝርርብ ክትጅምር ፈትን፣ ምናልባት እውን፡ “ቅድሚ ሕጂ ብዛዕባ እዛ ሕቶ እዚኣ ሓሲብካዶ ትፈልጥ፧” ክትብሎ ትኽእል ኢኻ።
ብእተኻእለ መጠን መጽሓፍ ቅዱስ ተጠቐም።
ነታ መጽሓፍ ቅዱስ ዚምህር ዘርእስታ መጽሓፍ ወይ ካልእ ንመጽናዕቲ እተዳለወ ጽሑፍ ንዝወሰደ ዝዀነ ይኹን ሰብ፡ መደብ መጽናዕቲ መጽሓፍ ቅዱስ ብኸመይ ከም ዚግበር ግለጸሉ። ኤሌክትሮኒካዊ መሳርሒ ተጠቒምካ ነታ መጽሓፍ ቅዱስ ከተጽንዕ ዘሎካ ስለምንታይ ኢኻ፧ እትብል ቪድዮ ኣርእዮ።
ዚከኣል እንተ ዀይኑ፡ ኣድራሻ እቶም ተገዳስነት ዘርኣዩ ሰባት ውሰድ። እቲ ዝረኸብካዮ ሰብ ኣብ ክልኻ ዘይነብር እንተ ዀይኑ፡ ውዓል ሕደር ከይበልካ ነታ በጃኻ ተኸታተሎ (S-43) እትብሃል ፎርም መሊእካ፡ ንጸሓፊ ጉባኤኻ ሃቦ።

ክትገብሮ ዘይብልካ፦

ቍጡዕ ምዃን፡ ግዲ ምባል ወይ ንኻልኦት ጸቕጢ ምግባር ወይ እውን ልክዕ ከም ዋርድያ ኣብ ጐድኒ እቲ መርኣዪ ጽሑፋት ደው ምባል።
ነዚ መዳይ ኣገልግሎት ከም ጽሑፋት እትዝርግሓሉ መገዲ ጌርካ ጥራይ ምርኣይ። ናብ ኣገልግሎት ክንወጽእ ከሎና፡ ሸቶና መጽናዕቲ መጽሓፍ ቅዱስ ንምጅማር እዩ፣ ስለዚ፡ ንውልቀ ሰባት ከነዘራርብ ክንጽዕር ኣሎና።
ነቲ መርኣዪ ጽሑፋት ምኽዋል ወይ ምስ መገላግልትኻ ኣብ ዓሚቝ ዕላል ምጥሓል። ንብሕታዊ ጕዳያትካ ተሌፎን ክትድውል እንተ ኣድልዩካ፡ ካብቲ መርኣዪ ርሕቕ እንተ በልካ ዝሓሸ እዩ።
ምስ ተጻረርቲ ምክታዕ። ሓደ ተጻራሪ ዚጓዳእ እንተ ዀይኑ፡ ናብ ካልእ ቦታ ምግዓዝ የድሊ ይኸውን።