ንኣምላኽ ብስሙ ኽትፈልጦ ትኽእልዶ፧

ንሓደ ኣኽቢርካ ዚርአ ሰብ ብስሙ ጸዊዕካ ሰላም ክትብሎን ከተዛርቦን ኣጋጣሚ ምስ እትረክብ፡ ፍሉይ ክብሪ እዩ ዚስምዓካ። መብዛሕትኡ ግዜ፡ ሰበ-ስልጣን ብኸም እኒ፡ “ክቡር ፕረዚደንት፡” “ግርማዊ፡” ወይ ከኣ “ክቡር ቀዳማይ ሚኒስተር” ዝኣመሰለ መዓርጋት ይጽውዑ እዮም። ኰይኑ ግን፡ ሓደ ልዑል ስልጣን ዘለዎ ሰብ፡ “ብስመይ ጸውዓኒ” እንተ ዚብለካ፡ ፍሉይ መሰል ዝረኸብካ ዀይኑ ኸም ዚስምዓካ ኣየጠራጥርን።

እቲ ናይ ሓቂ ኣምላኽ ኣብቲ ብጽሑፍ ዝሰፈረ ቓሉ ዝዀነ መጽሓፍ ቅዱስ፡ “ኣነ [“የሆዋ፡” NW] እየ፡ ስመይ እዚኣ እያ” ኢሉና ኣሎ። (ኢሳይያስ 42:8)a ከም እኒ “ፈጣሪ፡” “ኵሉ ዚኽእል፡” ከምኡውን “ጐይታ” ዝኣመሰለ መዓርጋት እኳ እንተ ኣለዎ፡ ንእሙናት ባሮቱ በቲ ብሕታዊ ስሙ ኺጽውዕዎ ብምፍቃድ ወትሩ የኽብሮም እዩ።

ንኣብነት፡ ነብዪ ሙሴ “ኣየ [“የሆዋ፡” NW]” ኢሉ ብምጅማር ንኣምላኽ ለሚኑ እዩ። (ዘጸኣት 4:10) ንጉስ ሰሎሞን ኣብ ወፈያ እቲ ኣብ የሩሳሌም እተሰርሐ ቤተ መቕደስ ኪጽሊ ኸሎ፡ “ዎ የሆዋ” ብዚብል ቃላት እዩ ጀሚሩ። (1 ነገስት 8:22, 23 NW) ነብዪ ኢሳይያስ ንህዝቢ እስራኤል ወኪሉ ንኣምላኽ ኪዛረብ ከሎ ድማ፡ “ዎ [“የሆዋ፡” NW]፡ ንስኻ ኢኻ ኣቦና” በለ። (ኢሳይያስ 63:16) ብርግጽ እምበኣር፡ እቲ ሰማያዊ ኣቦና ብስሙ ኽንጽውዖ እዩ ዚደሊ።

ንየሆዋ ብስሙ ምጽዋዕ ኣገዳሲ እኳ እንተ ዀነ፡ ብሓቂ ብስሙ ምፍላጡ ግን ተወሳኺ ነገራት እውን ይሓቍፍ እዩ። የሆዋ ንዝዀነ ይኹን ዜፍቅሮን ኣብኡ ዚውከልን ውልቀ-ሰብ፡ “ንስመይ ስለ ዝፈለጦ፡ ከልዕሎ እየ” ኢሉ ተመባጺዑሉ ኣሎ። (መዝሙር 91:14) ስለዚ፡ ስም ኣምላኽ ምፍላጥ ዕቝባኡ ኣብ ምርካብ ዓብዪ ግደ ኻብ ሃለዎ፡ ነቲ ስም ምፍላጥ ብዙሕ ነገራት ከም ዜጠቓልል ንጹር እዩ። እሞኸ ንየሆዋ ብስሙ ንኽትፈልጦ እንታይ ክትገብር ኣሎካ፧

[እግረ-ጽሑፍ]