U Hiihii hen Mbakorinte

14 Nôngo nen tsung doo nen ayol a en, nahan kpa keren nen uiyua mba jijingi sha gbashima, kpa hemba doon u ne ôron kwaghôron u profeti.+ 2 Gadia or môm kaven kwagh u orlamen ijô nan lu ôron ga, saa Aôndo tseegh. Shin er ka i lu akaamyer a Aôndo+ ka nan ôron sha iwasen i jijingi nahan kpa, or môm kaven kwagh u nan ôron la ga.+ 3 Nahan kpa, or u ôron kwaghôron u profeti ka nan taver ior asema shi nan wase ve shi nan sur ve asema sha kwaghôron u nan. 4 Or u nan lamen ijô yô, ka nan iyol i nan ka nan zua a ishimataver ye, kpa or ka nana̱ ôron kwaghôron u profeti yô, nan taver tiônnongo ishima. 5 Sarem u ne cii ma ne lamen ijô,+ kpa hemba saren mo u ma ne ôron kwaghôron u profeti.+ Jighilii yô, or u ôron kwaghôron u profeti nan hemba or u lamen ijô, gadia or u lamen ijô yô, saa nana pase* kwagh u nan ôr la ve, ishima ia taver tiônnongo ye. 6 Kpa hegen ne, anmgbianev, aluer m ngu va lamen ijô a ven yô, kwagh la una wase ne nena? Ka sha u pasen+ ne mfe+ shin akaaôron man atesen a m ngohol hen Aôndo la me wase ne gaa?

7 Ka di vough er akaa a lun a uma ga, a i kuhwan kwagh a mi, er imar shin adiguve nahan. Aluer ve kaa wanger ken ato ga yô, a er nan man a fa kwagh u imar shin adiguve a lu kaana? 8 Gadia aluer busa kaa wanger ken ato ga yô, ka an nana wa iyol i utya? 9 Kape ne mba lamen ijô kpa i lu je la, saa ne lam zwa u taver u kaven ga, gayô ka an nana kav kwagh u ne lu ôron laa? Sha kpôô yô, a lu inja er ne mba lamen a ahumbe nahan. 10 Ijô ngi kpishi sha tar, nahan kpa, ma zwa u ior ve kaven u ga je kpa ngu ga. 11 Gadia aluer m kav inja i kwagh u i lu ôron ken ma zwa ga yô, or u lamen u la nana nengem ér m ngu ortyôtyev, shi mo kpa me nenge or u lamen u la mer nan ngu ortyôtyev. 12 Ne kpa kape i lu je la; er ne lu nôngon kpoghuloo ner ne zua a uiyua mba jijingi yô, ker nen u ngeen a uiyua mba vea taver tiônnongo ishima yô.+

13 Sha nahan yô, zum u or nan lu lamen ma zwa yô, nana̱ er msen sha er nana fatyô u pasen* kwagh u nan ôr la yô.+ 14 Gadia aluer m ngu eren msen ken ma zwa yô, ka sha iwasen i iyua i jijingi i í nem la m lu eren msen ye, kpa ken ishima yam yô, m kav kwagh u m lu ôron la ga. 15 Yô ka nyi i gbe u me ere? A gba u me er msen sha iyua i jijingi, shi me er msen ken ishima kpaa, sha er a kav kwagh u m lu ôron la yô. Me wa icam i wuese Aôndo sha iyua i jijingi, shi me wa icam i wuese Aôndo ken ishima yam kpaa, sha er a kav kwagh u m lu ôron la yô. 16 Gayô, aluer u ngu eren msen sha iwasen i iyua i jijingi sughun Aôndo yô, a er nan ve or u i tese nan ga la nana kaa ér, “Amen” sha ishughun i u ne laa? Gadia nan kav kwagh u u lu ôron la ga. 17 Ka mimi, u ngu sughun Aôndo sha gbenda u dedoo, kpa orgen la gema zua a ishimataver ga. 18 M sugh Aôndo er m hembe lamen ijô kpishi a ven yô. 19 Nahan kpa, ken tiônnongo yô, guda me ôr asemberakaa ataan ken ishima yam,* sha er me tese* mbagenev kpaa yô, a u lamen ma zwa ôron asemberakaa dubu pue.+

20 Anmgbianev, de hingir nen mba kaven kwagh sha inja i mbayev mba kiriki ga,+ kpa gema lu nen er mbayev mba kiriki nahan sha kwagh u ifer;+ hingir nen mba kaven kwagh sha inja i mbaganden.+ 21 I nger ken Tindi ér: “Yehova* kaa ér, ‘Ka ken ijô i ushirmbaiorov man sha zwa u mbavannya me ôr kwagh a nongoior ne ye, nahan je kpa, vea venda u keghen ato a mo.’”+ 22 Sha nahan yô, ijô i lamen ka ikyav sha ci u mba ve ne jighjigh la ga, kpa ka sha ci u mba ve ne jighjigh ga la,+ kwaghôron u profeti di ngu sha ci u mba ve ne jighjigh ga la ga, kpa ngu sha ci u mbananjighjigh. 23 Nahan aluer tiônnongo jimin cii kohol ijiir i môm man ior cii mba lamen ijô, man mba i tese ve ga shin mbanan jighjigh ga za va her yô, vea kaa ér ne nyôr ihyundugh ga zee? 24 Kpa aluer ne cii ne mba ôron kwaghôron u profeti man ornan jighjigh ga shin or u i tese nan ga nan za va her yô, kwagh u nan ongo la una wase nan u kôôm iyol i nan, shi akaa a ne cii ne lu ôron la aa wase nan u gbidyen kwar sha uma u nan. 25 Nahan akaamyer a ken ishima i nan la aa due ken igbar, maa nana gure a sua ityough inya, nana civir Aôndo, nana kaa ér: “Mimi je Aôndo ngu a ven.”+

26 Nahan yô, anmgbianev, ka nyi i gbe u a erene? Ka nea kohol imôngo yô, orgen nan wa icam, orgen nan tese, orgen nan pase akaaôron a Aôndo, orgen nan lam ma zwa, orgen di nan pase kwagh u i ôr la.+ Eren nen akaa cii sha u taver mbagenev asema. 27 Shi zum u i lu lamen ma zwa yô, i̱ lu iorov uhar shin utar, i̱ de hembe nahan ga, shi ve lamen môm môm, shi or nana̱ pasen* kwagh u i lu ôron la kpee je.+ 28 Kpa aluer or u pasen* ngu ga yô, ve̱ lu ving ken mkombo,* ve̱ lamen a Aôndo ken asema a ve. 29 Uprofeti vea̱ lu yô, uhar shin utar ve̱ lam,+ mbagenev di ve̱ ver ishima ve̱ kav kwagh shon. 30 Kpa aluer orgen zua a mpase shighe u nan tem her la yô, or u nan lu ôron kwagh zan a mi ave la nana̱ de kwaghôron. 31 Gadia ne cii ne fatyô u ôron kwaghôron u profeti, lamen môm môm, sha er hanma or nana hen kwagh ker, shi hanma or nana zua a ishimataver yô.+ 32 Uprofeti ve̱ wa ikyo sha gbenda u ve ôron kwagh sha iwasen i uiyua mba jijingi la. 33 Gadia Aôndo ka Aôndo u eren kwagh nzughul nzughul ga, kpa ka u bem.+

Er i eren ken atôônanongo a uicighanmbaiorov cii nahan, 34 kasev ve̱ de lamen a tiônnongo* ga, gadia i na ian ér ve lamen ga.+ Kpa ve ungwan a ungwa,+ er Tindi kpa a kaa nahan. 35 Aluer kwagh tsume ve yô, ve̱ pine noov vev ken ya, gadia ka kwagh u ihyeenegh u kwase lamen a tiônnongo.*

36 Ka hen a ven loho u Aôndo u dugh yee? Shin ka ne tseegh u ar a vene?

37 Aluer or hen ér nan ngu profeti shin i na nan iyua i jijingi yô, nana̱ lumun a akaa a m lu ngeren hen a ven ne ér ka kwagh u Ter a kaa yô. 38 Kpa aluer nan wa kwagh ne ikyo ga yô, nan kpa a wa ikyo sha kwagh u nan ga.* 39 Sha nahan yô, anmgbianev av, keren nen sha gbashima u ôron kwaghôron u profeti,+ kpa de yangen nen or u lamen ijô ga.+ 40 Kpa i̱ eren akaa cii tsembelee, sha inja sha inja.+