Esekiel

17 Kwaghôron u Yehova shi va hen a mo, a kaa ér: 2 “Wan u or, ta kikya, ôr injakwagh sha kwagh u ya u Iserael.+ 3 Kaa wer, Yehova Ter u Hemban Cii ngu kaan ér: “Zegeigyuve+ u lun a uzegembaakperev, a ingyur i lihen sha mi, u cirin ingyur iyol kpulughuu, i lun ukala kposo kposo, yange va hen Lebanon,+ va tôndo ityough ki kon u sedar.+ 4 A tôndo ihyômon i sha azenger la, a yem a mi ken tar u mbaerenkpenga,* a za ver hen gar u mbaerenkpenga.+ 5 A pande ivor i hen tar la,+ a za lôô hen inya i dedoo. A lôô i er ka kon u hen kpemnger nahan. 6 Nahan i vese i hingir kon u wain u taven ga, u wuhan mbuur mbuur,+ u shirin a shir agbaa shin inya, u amise a u a lu shin itine i u yô. Kape i hingir kon u wain, i hôm shi i ta agbaa je la.+

7 “‘“Maa zegeigyuve+ ugen za va a akper a vesen man ingyur i kehen.+ Tsô kon u wain ne gba samber amise a u sha tse, ape i lôô u la, zan hen a na, shi naregh agbaa a u hen a na ér a ur u,+ 8 shin er i vande lôôn u hen inya i dedoo, ikyua a mngerem ma kpishim, sha er ua ta agbaa, ua ume atam, ua hingir kon u wain u vesen+ nahan kpaa.”’

9 “Kaa wer, ‘Yehova Ter u Hemban Cii ngu kaan ér: “A kpe u iyol kpa? Or a va wuhe u shin amise,+ nahan atam a u aa hôô, shi uikparen mba u kpa vea use ga ha?+ Ua uma je yô, a kera lu u saa or u taver iyol shin ior kpishi vea va ve a wuhe u shin amise kera ga. 10 Shin er i bugh u i za môôr nahan kpa a kpe u iyolo? Ua kera uma kera zum u ahumbe a sha ityoughkitaregh aa ta sha u la gaa? Ua uma kera ape u mende la.”’”

11 Kwaghôron u Yehova shi va hen a mo, a kaa ér: 12 “Kaa a ya u hendan kwagh ne wer, ‘Ne fa inja i akaa ne gaa?’ Kaa wer, ‘Nenge! Tor u Babilon yange va ken Yerusalem va kura tor na kua mbahemenev nav yem a mi ken Babilon.+ 13 Heela tseegh ga, a tôô môm ken ônov mba tor,*+ a ya ikyur a na, a er un a bum.+ Maa a kura ior mba duenati mba ken tar la+ a yem a mi, 14 sha er tartor la ua gba, ua kera fatyô u moughon ga, nahan a mase lun sha u kuran ikyuryan na la tseegh ua lu her yô.+ 15 Kpa ken masejime yô, tor la va hendan a na+ sha u tindin mbatomov ken Igipiti, ér ve za va un a anyinya+ man mbautyaav kpishi.+ Una za ikyura kpa? Un u a lu eren akaa ne la una war mtsaha kpa? Una vihi ikyuryan la nahan shi una war kpa?’+

16 “‘Yehova Ter u Hemban Cii ngu kaan nahan ér, “Er m lu u uma ne, una kpe ken Babilon, hen ijiir i tor* u a ver un* tor la a lu la, un u a laha ibumun na shi a vihi ikyuryan na la.+ 17 Ikyumutya i Farou kua ior nav mba kpishiv mbara cii vea lu a iwasen ken utya ga,+ zum u a maa ayou a taven kua ukpekpe mba taven a kase gar sha u timin ior kpishi la.* 18 A laha ibumun, shi a vihi ikyuryan. Shin er yange tôndo zwa nahan kpa* a er akaa ne cii, nahan una war ga.”’

19 “‘Sha nahan yô, ka kwagh u Yehova Ter u Hemban Cii a kaa ne: “Er m lu u uma ne, a laha ibumun yam,+ shi a vihi ikyuryan yam, nahan me hide a mtsaha u kwaghbo u a er ne sha ityough nagh. 20 Me haa kper wam sha a na, me kôr un ken kper wam.+ Me va a na ken Babilon, me va ôr un ijir heregh, sha ci u a er kwagh a mo sha mimi ga.+ 21 Akumautya a na a a yevese la aa kpe ku u sanker, mba ve shi la di a sambe ve hanma vegher cii.*+ Nahan ne fa er i lu mo Yehova m ôr kwagh yô.”’+

22 “‘Ka kwagh u Yehova Ter u Hemban Cii a kaa je ne: “Me tôndo gbaa sha ityough ki kon u sedar u taven+ sha, me môôr un. Me tôndo gbaa u hômon+ sha ityough ki agbaa a na la, mo iyol yam me môôr un sha uwo u taven sha u lun tseer tseer.+ 23 Me môôr un sha uwo u taven sha u Iserael; una ta agbaa, una ume atam, una hingir zege kon u sedar. Shi inyon atô kposo kposo ia teman sha mi, ia luun shin mure u ahu a na. 24 Nahan ikyon i ken toho cii ia fa er mo Yehova, m hide a kon u taven ijime m gema m kende a kon u gban ijime sha yô.+ M er kon u ndor uma, m gema m na kon u uman hôm.+ Ka mo Yehova m ôr kwagh ne shi m er un kpaa ye.”’”