Hen Mbaroma

12 Sha nahan yô, anmgbianev, m ngu zamber a ven sha ci u mhôônom ma Aôndo a zungwen se la mer, gema nen ayol a en na nen+ nagh ku uma a mi; nagh ku i tsegh ku,+ shi Aôndo a lumun a mi yô, ka icighantom u ne lu eren un a mhen wen je la.+ 2 De nen u eren kwagh inja i môm a tar* ne, kpa lu nen a mhen u he, sha er ne gema+ ne hingir u fan+ kwagh u a doo Aôndo man u a lumun a mi shi a lu u vough sha ishigh nagh yô.

3 Sha ci u erdoo u hemban u i tesem la yô, m ngu kaan a hanma wen mer, nana̱ de nengen iyol i nan i hemban er ma nan nenge la ga,+ kpa nana̱ nenge sha gbenda u nana lu a mhen u vough yô, hanma or sha* jighjigh u nan u Aôndo a ne nan la.+ 4 Er se lu a alegh a iyolough kpishi ken iyol i môm,+ kpa alegh ne cii a eren tom môm ken iyol ga nahan, 5 kape se kpa se lu iyol i môm sha ci u se mba ken mzough vea Kristu je la, shin er se ngee nahan kpaa. Kpa se asange asange se mba alegh a iyol i môm.+ 6 Sha nahan yô, se mba a uiyua kposo kposo mba i ne se sha erdoo u hemban u i tese se la.+ Aluer ka iyua i ôron kwaghôron u profeti yô, se ôr un i kuma sha kwar u jighjigh u nan wase la; 7 shin a lu iyua i eren tom u pasen kwagh kpaa, se er nen tom ne; shin, or u i lu iyua i tesen yô, nana̱ tesen;+ 8 shin a lu or u taver ior ishima* kpaa, nana̱ taver ior ishima,*+ or u i ne nan u karen kwar yô, nana̱ karen u sar sar;+ or u nan hemen yô, nana̱ hemen sha inja;*+ or u nan zungu mhôônom kpaa, nana̱ eren nahan saan saan.+

9 Dooshima wen a de lu u sha atseregh ga.+ Iferkwagh i ndôhôr ne ishima,*+ gema var nen a kwagh u dedoo. 10 Doo nen ayol a en sha mimi er ka anmgbianev mba sha tsombor nahan. Hemen* nan nen mbagenev icivir.+ 11 Eren nen tom kpoghuloo,* de lu nen mba wan hwev ga.*+ Jijingi a na lu nen mbatseen asema.+ Er nen Yehova* tom.+ 12 Ember nen sha ishimaverenkeghen la. Waan nen ishima ken ican.+ Taver nen ishima sha msen u eren.+ 13 Wasen nen uicighanmbaiorov sha mbamgbe vev.+ Keren nen u ngohol ior sar sar.+ 14 Sônon nen iveren sha ci u mba ve tôvon ne a ican la,+ veren nen ve doo doo, de waan nen ve ifyan ga.+ 15 Ember nen a mba ve ember la imôngo; vaan nen a mba ve vaan la imôngo. 16 Nengen nen mbagenev er ne nengen ayol a en nahan; de veren nen ishima* sha uzegembaakaav ga, kpa ishima i lu ne sha akaa a kiriki.+ De hingir nen mbafankwagh sha mnenge wen ga.+

17 De kimbin ifer sha ifer ga.+ Ver ishima u eren kwagh u a lu u dedoo sha ishigh ki ior cii la. 18 Aluer gba sha mi yô, er kwagh u u fetyô la sha u lun ken bem a ior cii.+ 19 Ne mba doon mo ishima, de oron nen iyev ayol a en ga, kpa de nen Aôndo a va a iyugh na;+ gadia i nger ér: “‘Iyevoron ka i yam; mo me kimbi,’ kape Yehova* a kaa la.”+ 20 Kpa “aluer ijen kôr orhyom wou yô, na nan kwaghyan; aluer imura kôr nan yô, na nan kwaghman; gadia aluer u ngu eren nahan yô, u haa nan akaausu a kpenger kpenger sha ityo.”*+ 21 De deen wer iferkwagh i hemba u ga, kpa za hemen u hemban iferkwagh sha u eren kwagh u dedoo.+