Mpase u Hen Yohane
2 “Nger hen ortyom+ u tiônnongo u ken Efese+ la wer: Ka akaa a un u a ker asan ataankarahar ken uwegh nagh ku iyanegh shi a lu zenden hen atô u udaarmbaamengerev utaankaruhar mba sha zanaria la, a lu ôron je ne:+ 2 ‘M fa aeren a ou kua tom wou man ishimataver you, man er mayange u lumun aferaior ga, man shi er u kar mba ve kaan ér ve mba mbaapostoli,+ kpa ve lu ga la, u fe er ve lu mbaeren aie yô. 3 U ngu tesen ishimataver kpaa, shi u gba uwer sha kwagh u iti yam ga,+ shi u vôr ga.+ 4 Nahan kpa kwagh u a shim a we yô, u de u tesen dooshima u yange u lu a mi sha hiihii la.
5 “‘Yô, umbur kwagh u yange u eren ve u va de la, nahan gema ishima,+ eren akaa a yange u eren sha hiihii la. Aluer u er nahan ga yô, me va hen a we, me va tôô daarimenger wou la+ hen ijiir na kera, saa u gema ishima di je.+ 6 Kpa kwagh ugen ngu u u lu eren shami yô: u kôr aeren a annongo u Nikolau la ihyom,+ a mo kpa m ker a ihyom la. 7 Or u nan lu a ato yô nana̱ ungwa kwagh u jijingi a lu ôron a atôônanongo ne:+ Or u nana hemba yô,+ me na nan ian nana ya kon u uma,+ u u lu ken paradiso u Aôndo la.’
8 “Nger hen ortyom u tiônnongo u ken Semuna la wer: Ka akaa a un u a lu ‘u Hiihii man u Masetyô,’+ u yange kpe kpa shi a hide a lu uma la, a lu ôron je ne:+ 9 ‘M fa ican i u lu yan la kua ibanave you—kpa u ngu yôughyôugh+—shi m fa ilyahan i u lu zuan a mi hen ior mba ve kaan ér ve mba Mbayuda kpa ve lu Mbayuda kpôô kpôô ga, ve lu shinagoge u Satan la.+ 10 De cie akaa a a sôôn tseren we la ga.+ Nenge! Diabolo una zer wuhen ne mbagenev ken purusu sha er a kar ne sha hanma gbenda cii yô, shi ne ya ican ayange pue. Tile sha mimi zan zan ku wou, nahan me na u injar i uma.+ 11 Or u nan lu a ato yô, nana̱ ungwa+ kwagh u jijingi a lu ôron a atôônanongo ne: Or u nana hemba yô,+ nana kpe ku u sha uhar la mayange ga.’+
12 “Nger hen ortyom u tiônnongo u ken Pegamu la wer: Ka akaa a un u a lu a gôgô sanker u esen akur ahar la a lu ôron je ne:+ 13 ‘M fa ape u tem ya la, ka hen ape ikyônough ki torough ki Satan ki lu je la; nahan kpa u ngu yilan sha iti yam sha mimi her,+ shi sha ayange a Antipa, orshiada wam u jighjigh+ u yange i wua un+ hen ijiir you, ape Satan a lu la je kpa, u nyiman jighjigh u u nem la ga.+
14 “‘Nahan kpa, akaa shim a we kpuaa; u ngu a mba ve lu dondon ityesen i Balam+ u yange tese Balaki+ ér a̱ ver kwagh u nan gbeev mbu nôngon sha ishigh ki ônov mba Iserael, sha u ve̱ ya akaa a i sôngo sha ci u akombo shi ve̱ er idya* la her.+ 15 Shi we kpa u ngu a ior mba ve lu dondon ityesen i annongo u Nikolau la yô.+ 16 Nahan yô, gema ishima. Ga yô, m ngu van hen a we fefa, shi me nôngo ityav a ve sha gôgô sanker u a lu ken zwa wam ne.+
17 “‘Or u nan lu a ato yô nana̱ ungwa kwagh u jijingi a lu ôron a atôônanongo ne:+ Or u nana hemba yô,+ me pande mana u i koso la me na nan,+ shi me na nan iwen i kôngor i pupuu, man i nger iti i he sha iwen i kôngor ne, i or môm nan fe i ga, saa or u nan lu ngohol i la tseegh yô.’
18 “Nger hen ortyom u tiônnongo u ken Tiatira la+ wer: Ka akaa a Wan u Aôndo, un u ashe a na a lu er nomborusu,+ ikpande-angahar na i lu er togula u wang la, a lu ôron je ne:+ 19 ‘M fa aeren a ou, man dooshima wou kua jighjigh u nan wou kua tom wou kua ishimataver you, shi m fa er aeren a ou a ken masejime ne a hembe a hiihii la yô.
20 “‘Nahan kpa, kwagh u a shim a we yô, u de kwase u i yer ér Yesebel,+ u a kaan ér un ngu profeti u kwase la, ngu her, ngu tsumen a ikpan yam sha atesen a na sha u i̱ er idya*+ shi i̱ ya akaa a i senge sha ci u akombo yô. 21 M na un ian mer a gema ishima, kpa a kegh iyol u geman ishima sha idya* na la ga. 22 Nenge! M sôôn kenden un sha gambe u uange, shi mba ve eren idya a na la kpa me kende ve ken zegecan, saa vea gema ishima sha aeren a na la di je. 23 Shi me wua ônov nav sha bouange, sha er atôônanongo cii aa fa er m tev ishima i or man mbamhen mba ken atô u ishima i nan yô,* shi me na hanmô wen injar sha aeren a nan.+
24 “‘Nahan kpa, ne mbagenev mba ken Tiatira mba ne dondon ityesen ne ga, shi yange ne fa akaa a i senge ér ka “akaa a cimin a Satan” la ga la cii, m ngu kaan a ven mer:+ M ngu seer ne ikyav mbigenev ga. 25 Yô, kôr nen ave sha kwagh u ne lu a mi la her gbang, zan zan me kar van.+ 26 Man or u nana hemba shi nana ver ishima sha aeren a am zan zan mkur yô, me na nan tahav sha akuraior,+ 27 shi nana hemen ior sha tôgh ku iyôôgh,+ sha er a hembe ve avur avur er ka ikyav mbi inyaav yô, vough er Terem a nem tahav nahan. 28 Shi me na nan ishan i pepe.+ 29 Or u nan lu a ato yô nana̱ ungwa kwagh u jijingi a lu ôron a atôônanongo ne.’