Esera

1 Ken inyom i hiihii i Shirushi+ tor u Pershia la, Yehova mgbegha Shirushi tor u Pershia yôô kwagh ken tartor na cii, shi a nger kwagh ne shin inya kpaa,+ sha u kwaghôron u Yehova ôr sha zwa u Yeremia+ la a kure sha mi yô, a kaa ér:

2 “Ka kwagh u Shirushi tor u Pershia a ôr ne, ‘Yehova Aôndo u sha nam ityartor i sha tar cii,+ shi a kaa ér mo m maa un iyou ken Yerusalem,+ u a lu ken Yuda la. 3 Hanmô wen u nan lu ken ior nav cii, Aôndo u nan a lu a nan, nahan nana za sha Yerusalem u a lu ken Yuda la, nana za maa iyou i Yehova Aôndo u Iserael—un ka Aôndo u mimi u iyou na yange i lu ken Yerusalem la.* 4 Hanma or u nan za tem shir cii,+ a lu han nan lu je kpaa, mba ve we ndor a nan* ve wase nan sha u nan nan azurufa man zanaria man ikyav mbigen kua uzendenya, shi ve er iyua sha ci u iyou i Aôndo u mimi,+ i yange i lu ken Yerusalem la.’”

5 Tsô mbayaav mba ken Yuda man mba ken Benyamin man upristi man Mbalevi—hanma or u Aôndo u mimi mgbegha nan cii—nan wa iyol u kôndon za maan iyou i Yehova i yange i lu ken Yerusalem la. 6 Nahan mba ve lu ikyua a ve la cii wase ve sha u nan ve ikyav mbi sha azurufa man mbi sha zanaria man ikyav mbigen kua uzendenya man akaainjaa, u seer sha uiyua mba i vande nan ve a ishima i gbar gbar la cii.

7 Tor Shirushi shi due a ikyav mbi ken iyou i Yehova mbi Nebukadinesar yange kura ken Yerusalem va haa ken iyou i aôndo na la.+ 8 Shirushi tor u Pershia due a mbi, gema wa sha ikyev i Miteradati u lu ornengen sha inyar la, un gema ôr mbi sha ci u Sheshibasar*+ ortaregh u ken Yuda.

9 Ka iyenge i ikyav mbi shon je ne: Mkam ma sha zanaria ma lun er ikyese nahan lu 30, kua mkam ma sha azurufa ma lun er ikyese nahan 1,000 man mkam magen 29 ma lun er mara nahan. 10 Agbande a zanaria a kiriki lu 30 kua agbande a azurufa a kiriki 410 man mkam magen 1,000. 11 Mkam ma sha zanaria man ma sha azurufa cii kohol lu 5,400. Sheshibasar due a akaa ne cii, shighe u i due a mba ve lu uikyangen+ ken Babilon i hide a ve ken Yerusalem la.