Duteronomi

7 “Zum u Yehova Aôndo wou una nyôr a we ken tar u u sôôn nyôron ker ngohol u la yô,+ una zenda akuraior a a ngee kpishi la sha ishigh you kera:+ ka Mbahiti man Mbagirgashi man Mbaamor+ man Mbakaanan man Mbaperishi man Mbahivi man Mbayebushi+ je la, akuraior ataankarahar a a hembe ngeen shi a hembe taver agee a we la.+ 2 Yehova Aôndo wou una na a sha ikyev you, nahan u hemba a.+ Tim a kpee je,+ de ye ikyur a a ga, shi de zungu a mhôônom kpaa ga.+ 3 De vôson kasev shin noov ken a ve ga. De tôôn ônov ou mba kasev naan ônov vev mba nomso, shin vôson ônov vev mba kasev naan ônov ou mba nomso ga.+ 4 Gadia vea gema ônov ou vea de u dondon mo, vea za civir mbaaôndo mbagen;+ nahan ishima ia vihi Yehova a ven tsung, una tim u kera fese.+

5 “Kpa ka kwagh u ú gema ú er a ve je ne: Yôhôr atse a ve a nan nagh, shi hembe mtôm vem ma akombom ma awenem,+ shi gber mtôm vev ma akombom ma sha ikyon,*+ shi nande ieev vev mbi gban a gba mbira kpaa.+ 6 Gadia u ngu Yehova Aôndo wou icighanikyurior, man Yehova Aôndo wou tsua u ken ior mba sha tar cii u hingir ikyurior na, u ngu kwagh na jim.*+

7 “Lu sha ci u ne hemba ngeen a akuraior agen cii ve Yehova tese ne erdoo tsua ne ga,+ gadia yange ne hemba ndahar ken akuraior cii.+ 8 Kpa lu sha ci u ne doo Yehova ishima, shi lu sha ci u ibumun na a uter enev,+ ka nahan ve Yehova due a ven sha uwegh ku ageegh, a paa u hen ya u kpan+ sha ikyev i Farou tor u Igipiti kera ye. 9 U fa dedoo er Yehova Aôndo wou a lu Aôndo u mimi yô, ka Aôndo u eren kwagh sha mimi, shi kuren uityendezwa nav, shi tesen ior mba a doo ve ishima shi ve kuran atindi a na la dooshima zan zan kov u sha dubu.+ 10 Kpa mba ve ker un ihyom yô, una kimbi ve injar sha u timin ve sha ashe a ve.+ Una ngôôr tsahan mba ve ker un ihyom la ga; una kimbi ve injar sha ishiv vev. 11 Sha nahan yô, wa ikyo, kuran atindi kua akaawan man atindiakaa a m lu ôron we nyian ne, eren sha a.

12 “Aluer ne za hemen u keghen ato a atindiakaa ne, shi kuran a shi eren sha a yô, Yehova Aôndo wou una er kwagh u a ye ikyur a we sha mi la, shi una za hemen u tesen we dooshima er yange bum a uter ou nahan. 13 Una tese u dooshima shi una na u iveren u mar ônov kpishi.*+ Shi una haa iveren sha kwagh u a mende hen inya you la, kua samuyia wou man wain wou u he man mkurem ou,+ kua ônov mba ibua you man ônov mba ken akumaiyôngo a ou, ken tar u yange bum a uter ou ér una na u la.+ 14 Ken akuraior cii, ka we u hemba lun a iveren ye;+ nomsoor shin kwase u lun a wan ga* nana lu ken a we ga, shi ilev you kpaa mbia ban a ônov ga.+ 15 Yehova una kar a iangev cii hen a we kera, iangev mbi cieryol mbi yange u fa ken Igipiti la cii, una va a mi sha a we ga.+ Kpa una gema a va a mi sha ior mba ve ker u ihyom la cii. 16 Tim akuraior a Yehova Aôndo wou una na sha ikyev you la cii.+ De zungwen ve mhôônom ga,*+ shi de civir mbaaôndo vev ga,+ sha ci u kwagh la una hingir we kwaghhônon.+

17 “Kpa aluer u kaa ken ishima you wer, ‘Akuraior ne hemba se iyenge. Me er nan ve me zenda a kera?’ yô,+ 18 de cie ve ga,+ umbur kwagh u Yehova Aôndo wou yange er a Farou man Igipiti cii la,+ 19 ka ajiraôron a* ashe a ou nenge a mi, man akav kua uivande+ man uwegh ku ageegh, kua uwegh ku naregh ku Yehova Aôndo wou ku ku due a we la je la.+ Ior mba u cie ve la cii, ka kwagh u Yehova Aôndo wou una er a ve je la.+ 20 Yehova Aôndo wou una na iyol ia kpe ve,* zan zan ior mba ve shi her+ ve lu yeren we la cii vea tim. 21 Mciem ma de gbe u iyol sha kwagh ve ga, sha ci u Yehova Aôndo wou ngu a we,+ ka Aôndo u hemban, u a te ihindi iyol yô.+

22 “Yehova Aôndo wou una zenda akuraior ne sha ishigh you kera kure kure.+ Una lumun ér we u tim a kera fese ga, sha er inyamtoho ia va ngee a gande u ga yô. 23 Yehova Aôndo wou una gema ve una na sha ikyev you, una hemba ve gburu gburu, zan zan a kar timin ve been.+ 24 Una na ator a ve sha ikyev you,+ u ese ati a ve sha tar kera.+ Or môm nana hendan kwagh a we ga,+ zan zan u tim ve kera vindi vindi.+ 25 Nande ieev mbi mbaaôndo vev mba i gbe a gba la sha usu.+ De tômon azurufa shin zanaria u a lu sha mbi la ga, shi de tôôn un kpaa ga,+ sha er una va hingir we kwaghhônon ga yô, gadia ka kwagh u ndôhôr Yehova Aôndo wou ishima.+ 26 De nyer a kwagh u ndôhôrshima ken iyou you ga, sha er u va hingir kwagh u i gbe u a tim un, er un nahan ga yô. A ndôhôr we ishima tsung, shi nyagh un vindi vindi, sha ci u ka kwagh u i gbe u a tim un yô.