Ekesodu

34 Tsô Yehova kaa a Mose ér: “Kua ikpandeawen ihiar er i hiihii la nahan,+ me nger mkaanem ma yange ma lu sha ikpandeawen i hiihii+ i u hembe la sha mi.+ 2 Wa iyol pepe, sha ci u u lu unden sha Uwo u Senai hen pepe shon la za tilen her sha ishigh yagh, sha ityough ki woogh kira.+ 3 Kpa or a de unden vea we ga, shi i de nengen a ma orgen sha uwo la kpaa ga. Ilev kua uzendenya kpaa, ve de ye toho ikyua a uwo la ga.”+

4 Nahan Mose kua ikpandeawen ihiar er i hiihii la nahan, maa a mough tugh tugh a unde sha Uwo u Senai, vough er Yehova kaa un nahan, a ikpandeawen i ihiar la ken uwe. 5 Maa Yehova sen+ ken ibyeen va tile vea na her yôô iti i Yehova.+ 6 Yehova gba karen sha ishigh nagh yôôn ér: “Yehova, Yehova, Aôndo u zungwen mhôônom+ shi kunya kôron un a ior,+ u vihin ishima fele ga,+ tesen dooshima wuee+ shi eren kwagh sha mimi,+ 7 tesen ior udubu imôngo dooshima a ikighir shio,+ den ior kwaghbo man tindi u peren man isholibo;+ kpa oriboogh yô ka a tsaha nan keng ka bunden ga,+ tsahan ônov man ônov mba ônov sha kwaghbo u uter vev, zan zan kov u sha utar man kov u sha unyiin kpaa.”+

8 Tsô Mose gure fese kuma ishigh inya. 9 Maa a kaa ér: “Yehova, aluer doo u a mo yô, m ngu zamber we Yehova, za a vese imôngo,+ shin er se lu ior mba taver ityough* nahan kpaa,+ gba den se kwaghbo wase man isholibo yase tsô,+ tôô se se hingir kwagh wou.” 10 A gema a kaa ér: “Nenge, m ngu yan ikyur a ven: Me er akaa a kpilighyol sha ishigh ki ior ou cii, a i lu je i lu a er sha tar shin ken ma ikyurior ga yô,+ nahan akuraior a u lu hen atô u a la cii aa nenge a tom u Yehova, sha ci u ka kwagh u kpilighyol m lu eren a we ye.+

11 “Ver ishima sha kwagh u m lu ôron we nyian ne.+ Nenge, m ngu zendan Mbaamor man Mbakaanan man Mbahiti man Mbaperishi man Mbahivi kua Mbayebushi sha ishigh you kera.+ 12 Wa ikyo, de ye ikyur a ior mba ve tem ken tar u u lu zan ker la ga,+ gayô a va hingir kwaghhônon hen a we.+ 13 Kpa gema yôhôr nen atse ve a nan nagh, shi hembe nen mtôm vem ma akombom ma awenem, shi gber nen mtôm vem ma akombom ma sha ikyon* haa nen inya.+ 14 De gur aôndo ugen inya ga,+ sha ci u Yehova* soon ér i civir un tseegh.* Un ka Aôndo u a soo ér i civir un tseegh yô.+ 15 Wa ikyo sha er u ya ikyur a ior mba ve tem ken tar la ga yô, sha ci u zum u ve lu eren idya a mbaaôndo vev shi nan mbaaôndo vev iniav yô,+ or a lôhô u, nahan u za ya nagh ku nan.+ 16 Nahan u va hingir u vôson ônov vev mba kasev nan ônov ou,+ nahan ônov vev mba kasev vea er idya a mbaaôndo vev, shi vea na ônov ou kpaa vea er idya a mbaaôndo vev mbara.+

17 “De eren mbaaôndo mba sha iyôgh ki keren a ker ga.+

18 “Eren Iniongo i Beredi u I We Kwa sha Mi Ga la.+ Yaan beredi u i we kwa sha mi ga yô, vough er m kaa u nahan. Eren kwagh ne ayange ataankarahar sha shighe u i ver la, ken uwer u Abiba,*+ sha ci u ka ken uwer u Abiba u due ken Igipiti kera ye.

19 “Hanma wannomso u i hii maren* cii ka u wam,+ kua hanma waniunda u zendenya wou kpaa, a̱ lu nombua u i hii maren shin a lu nomiyôngo u i hii maren kpaa.+ 20 Wan u jaki you i hii maren yô, paa un sha iyôngo. Kpa aluer u paa un ga yô, gema sombo un mon. Gba u u paa hanma waniunda wou u nomso cii.+ Or môm nana de ve sha ishigh yagh ave ave ga.

21 “Eren tom ayange ataratar, kpa sha iyange i sha utaankaruhar la yô u mem.*+ A̱ lu sha shighe u lôôn shin sha shighe u sundan kpaa, u mem.

22 “Shi eren Iniongo i Ulahadi, sha alakema u u hii sundan la, shi eren Iniongo i Kurun a Iyiav* sha mbee u inyom.+

23 “Nomso ou cii ve vaan sha ishigh ki Yehova Ter u mimi, Aôndo u Iserael kwa tar ken inyom.+ 24 Gadia me zenda akuraior agen la cii sha ishigh you kera,+ shi me gbanger a tar wou, shi or môm nana tôm inya you zum u u zaan u za nengen a ishigh ki Yehova Aôndo wou kwa tar ken inyom la ga.

25 “De nungwan kwagh u i we kwa sha mi sha awambe a nagh ku i lu nan mo la ga.+ Shi nagh ku iniongo i Paseka la ku de tse her ga.+

26 “Va a iyiav mbi hiihii mbi hemban doon, mbi u zough a mi ken sule wou la hen iyou i Yehova Aôndo wou.+

“De jiidi wanivo sha atumba a ngô na ga.”+

27 Yehova shi kaa a Mose ér: “Nger mkaanem man inya,+ sha ci u ka sha mkaanem man m lu yan ikyur a we man Mbaiserael ye.”+ 28 Mose lu vea Yehova her ayange 40, tugh man atetan cii. A ya kwagh* ga, mngerem kpa a ma ga.+ A nger mkaanem ma ikyuryan la sha ikpandeawen la, ka Atindi a Pue la* je la.+

29 Tsô Mose hungwa sha Uwo u Senai a ikpandeawen i Shiada i ihiar la ken uwe.+ Mose hongo sha uwo yô, ishigh nagh mondo iwanger sha ci u lu za lamen a Aôndo, kpa a fa ga. 30 Zum u Aron man Mbaiserael cii ve nenge a Mose yô, ve kav er ishigh nagh mondo iwanger yô, nahan ve lu cian u zan ikyua a na.+

31 Kpa Mose yila ve, nahan Aron man mbavesen mba nongoior la cii va hen a na, tsô Mose lam a ve. 32 Maa Mbaiserael mbagen mbara cii kpaa kporom ikyua a na, nahan a ôr ve atindi a Yehova na un sha Uwo u Senai la cii.+ 33 Mose una lamen a ve a been yô a cir ikyondo sha ishi.+ 34 Kpa shighe u Mose una nyôron hen ishigh ki Yehova u za lamen a na yô, a bugh ikyondo la sha ishi kera.+ Una been yô maa a due, a za ôr Mbaiserael kwagh u i kaa un la.+ 35 Mbaiserael lu nengen er ishigh ki Mose ki mondo yô; nahan Mose a hide a cir ikyondo la sha ishi, zan zan saa shi shighe u a nyer u za lamen a Aôndo* yô.+