Esera

9 Yange mba been a bee akaa ne nahan maa, mbahemenev va va kaa a mo ér: “Ior i Iserael kua upristi man Mbalevi mba a pav a ior i tar ne man aeren a ve a hôngorough la ga,+ ka Mbakaanan man Mbahiti man Mbaperishi man Mbayebushi kua Mbaamon man Mbamoabi man Mbaigipiti+ kua Mbaamor+ je la. 2 Ve vôso ônov vev mba kasev sha ci ve kua sha ci u ônov vev mba nomso.+ Nahan ve mba ve lu ônov mba i tsegh ve*+ ne nungwa iyol a ior mba hen tar ne.+ Ka mbahemenev man imuetor je ve lu hemban peren atindi ne ye.”

3 M ongo kwagh ne yô, m ande akondo a am, shi m gbera ice yam i sha ityo man i shin gbem, m shar inya m tema jikii. 4 Nahan hanma or u nan tesen icivir* sha mkaanem ma Aôndo u Iserael cii nan va kasem, sha ci u tindi u peren u ior mba ve hide uikyangen ne, er m shar inya m lu jikii zan zan shighe u nan nagh ku sha samuyia ku aikighe la.+

5 Sha shighe u nan nagh ku sha samuyia ku aikighe la,+ m mough hen ape m tema a ihyeen iyol la, a akondo a am a anden iyol, m gure anu inya, m naregh ave hen Yehova Aôndo wam. 6 M kaa mer: “Aye, Aôndo wama, m va ahenge, kunya kôrom u moughon ishigh sha kenger sha a we, Aôndo wam, gadia asorabo a ase ngee sha ityough yasegh kpishi shi ibo yase tav nyôr aôndo.+ 7 Hii sha ayange a uter asev je ibo yase ngee zan zan nyian;+ man er se er asorabo yô, se kua utor asev man upristi asev cii, i na se sha ikyev i utor mba ityar igen, i wua se sha sanker,+ i yem a vese uikyangen,+ i ya se ishar,+ shi se hee, er i lu nyian nahan.+ 8 Kpa hegen, we Yehova Aôndo wase, u zungwe se mhôônom sha u den wer asande agen a̱ war shi den wer se tema kundu kundu* hen icighanjiir wou,+ kua sha u nan wer ashe a ase a wanger, we Aôndo wase, man sha u nan se mpeveryol sha anshighe kpuaa ken mlu wase u ken kpan la. 9 Shin er se lu ikpan nahan kpa,+ Aôndo wase undu se ken kpan ga; kpa a tese se dooshima na u a been mayange ga la sha ishigh ki ator a Pershia,+ sha u nan se mpeveryol sha er se hide se maa iyou i Aôndo wase+ i yange i lu ice la yô, kua sha u nan se girgar u sha awen* ken Yerusalem man agar agen ken Yuda.

10 “Kpa hegen u akaa ne a er cii ne yô, shi se kaa ser nyi, Aôndo wase? Gadia se undu atindi a ou, 11 a yange u na se sha ikyev i mbatomov ou uprofeti la, u kaa wer: ‘Tar u ne lu zan u za ngohol u la u hôngor, sha ci u hôngor u ior mba ve lu ker la. Gadia ve iv hanma vegher u tar la cii a aeren a ve a ndôhôrshima la.+ 12 Nahan yô, de naan nen ônov enev mba kasev ner ônov vev ve vôso ga, shi de vôson nen ônov vev mba kasev naan nen ônov enev ga.+ Mayange de keren nen bem ve kua mzehemen ve ga,+ sha er ne taver shi ne ya akaa a dedoo a ken tar la, ne ngohol u ua lu kwagh u ônov enev gbem sha won yô.’ 13 Nahan hegen u akaa ne a er se sha ci u inja yase i dang man ibo yase i vesen ne—gadia we Aôndo wase, u kimbi se injar sha kwaghbo wase ga,+ shi u de se mba se lu heen ne se war+— 14 doo u shi se per atindi a ou se za vôso ior mba ve eren akaa a hôngorough angan nee?+ U kera vihi ishima a vese je u tim se cica, or u waren a kera lu ga gaa? 15 We Yehova Aôndo u Iserael, u ngu u perapera,+ gadia se mba asande a mba ve war zan zan i va ar sha iyange i nyian ne yô. Se tile sha ishigh you hegen a ibo iyol, shin er kwagh u se er la a na i taver u tilen sha ishigh you nahan kpaa.”+