Duteronomi

6 “Ka atindi man akaawan kua atindiakaa a Yehova Aôndo wen a ne, sha u tesen ne, sha er ne kuran a zum u ne per ne nyôr ken tar u ne lu za ngohol u la je ne, 2 sha er u cian Yehova Aôndo wou, shi u dondon akaaôron a na man atindi a na a m lu wan we nyian ne—we man wan wou kua wan u wan wou+—sha ayange a uma wou cii, nahan u tsa gbem yô.+ 3 Yô we Iserael, gba u u kegh ato shi u wa ikyo tsung u kuran a, sha er ne za ikyura shi ne seer iyenge ken tar u u mgbough a atumba man iyough la yô, vough er Yehova Aôndo u uter ou yange tôndo zwa a we nahan.

4 “Kegh ato, we Iserael, Yehova Aôndo wase ka Yehova tswen.+ 5 Yehova Aôndo wou a doo u ishima a ishima you cii man a uma*+ wou cii man a agee* a ou cii.+ 6 Akaa a m lu ôron we nyian ne a lu u ken ishima. 7 Tesen ônov ou a,*+ shi ôron kwagh u a zum u wea tema hen ya wou, man zum u wea zenden sha gbenda, man zum u wea yav inya kua zum u wea mough sha kpaa.+ 8 Kange a sha uwe, a lu u kwagh u umbur shi a lu u kwagh u kangen sha icul* kpaa.+ 9 Nger a sha ikpandehinda i hen ya wou, kua sha ihindagar you.

10 “Zum u Yehova Aôndo wou una nyôr a we ken tar u yange bum a uter ou, Aberaham man Isaka man Yakob ér una na u la+—ka ugar mba vesen man mba doonashe mba i lu we u maa ga,+ 11 kua ayou a a iv a akaa a dedoo ker atô kposo kposo a u er tom sha ci u a ga, man azôr a ombon mngerem shimi a i lu we u tim ga, kua ishule i wain man ikyon i olev i i lu we u lee ga la je la—man u ya kwagh u ide yô,+ 12 wa ikyo sha er u hungur Yehova, un u a dugh a we ken tar u Igipiti, hen ya u kpan kera la ga yô.+ 13 Ka Yehova Aôndo wou u cian ye,+ ka un u eren un tom ye,+ shi ka ken iti na kpaa u bumun ye.+ 14 De dondon nen mbaaôndo mbagenev ga, aôndo u akuraior a a kase ne la môm kpa de dondon nen ga.+ 15 Gadia Yehova Aôndo wou u a lu her atô wou la, ka Aôndo u a soon ér i civir un tseegh yô.+ Aluer u er nahan ga yô, ishima ia vihi Yehova Aôndo wou a we tsung,+ nahan una tim u sha tar kera.+

16 “De karen nen Yehova Aôndo wen+ er yange ne kar un hen Masa+ nahan ga. 17 Ver nen ishima zulee, kuran nen atindi a Yehova Aôndo wen, kua akaa a a umbur ne la man atindiakaa a a kaa ér we u eren sha mi la. 18 Eren kwagh u a lu u vough man u dedoo sha ishigh ki Yehova yô, nahan u za ikyura, shi u nyôr u za ngohol tar u dedoo u Yehova yange bum a uter ou sha kwagh u u la,+ 19 sha u zendan mbahyomov ou cii sha ishigh you kera, vough er Yehova a tende zwa nahan.+

20 “Zum u wan wou nana va pine u ken hemen ér, ‘Inja i akaa a i umbur se ne, man akaawan kua atindiakaa a Yehova Aôndo wase a we ne ne ér nyi?’ yô, 21 kaa a wan wou la wer, ‘Yange se za hingir ikpan i Farou ken Igipiti, kpa Yehova za due a vese ken Igipiti kera sha uwegh ku ageegh. 22 Yehova lu eren akaa a kpilighyol kua uivande mba vesen man mba vihin tsung sha ashe ase, a va a akaa ne sha Igipiti+ man sha Farou kua sha ya na cii.+ 23 A due a vese ker kera sha er una va a vese heen, una va na se tar u yange bum a uter asev sha kwagh u u la yô.+ 24 Maa Yehova kaa a vese ér se kuran atindiakaa ne, shi se cian Yehova Aôndo wase, sha er a kpe se iyol gbem,+ se lu uma her+ er se lu nyian nahan yô. 25 Man aluer se ver ishima zulee, se mba ungwan imo i Yehova Aôndo wase sha u kuran atindi ne cii,* er a ôr a vese nahan yô, a nenge ér se mba mbaperapera.’+