Esera
10 Er Esera lu eren msen,+ pasen asorabo, vaan shi yaven inya sha ishigh ki Aôndo u mimi la, ikpelaior i Iserael va kase un, lu nomso man kasev man mbayev, gadia ior lu vaan tsung. 2 Maa Shekania wan u Yehiel+ u ken ônov mba Elam,+ kaa a Esera ér: “Se er Aôndo wase kwaghbo, er se vese kasev mba ken atôatyev a hen tar ne* yô.+ Nahan cii kpa, kwagh u Iserael ngu a gande ga. 3 Nahan se ya nen ikyur a Aôndo wase,+ se zenda nen kasev mban kua mbayev mba ve mar la ve yem, er Yehova kua mba ve tesen icivir* sha tindi u Aôndo wase ve tese nahan.+ Se er nen kwagh u Tindi a kaa la. 4 Mough sha, gadia kwagh ne ka tom u i gbe u u er yô, shi se mba a we. Lu taveraa, er kwagh sha ikyaa ne.”
5 Tsô Esera mough sha, na mbavesen mba upristi kua Mbalevi man Iserael cii ve bum ér vea er kwagh u i ôr la.+ Nahan ve tsegha zwa. 6 Esera maa mough hen ishigh ki iyou i Aôndo u mimi la yem ken kparyou u* Yehohanan wan u Eliashibi. Er za her nahan kpa, a ya kwagh ga, shi a ma mngerem ga. Gadia lu zungwen sha ci u kwaghbo u ior mba ve hide ken uikyangen la.+
7 Maa ve yôô ken Yerusalem kua agar agen ken Yuda cii ér, mba yange ve due ken uikyangen la ve va kohol ken Yerusalem; 8 man sha kwagh u mbahemenev kua mbatamen ôr yô, aluer or va ga zan zan ayange kar atar yô, a ngohol nan ikyav cica* shi a zenda nan ken nongo u ior mba ve due ken uikyangen la kera.+ 9 Nahan nomso mba ken Yuda man ken Benyamin cii ve va kohol ken Yerusalem ken atô u ayange atar, lu ken uwer u sha utaankarunyiin ayange a u 20. Ior cii tema hen tembe u iyou i Aôndo u mimi la, ve lu gbidyen akarkase iyol sha ci u ikyaa i i lu inya la, shi ve lu kunden sha ci u ura lu nôôn cam cam.
10 Maa pristi Esera mough sha kaa a ve ér: “Ne er kwaghbo sha u vôson kasev mba ken atôatyev,+ nahan ne na Iserael seer ngun a ibo. 11 Nahan yô, pase nen asorabo a en hen Yehova Aôndo u uter enev shi er nen ishima na. Pav nen a ior i tar ne, shi pav nen a kasev enev mba ken atôatyev mban.”+ 12 Tsô ior mba ve kohol her la cii ôr sha ikyenge i genger genger ér: “Se er kwagh u u ôr la vough. 13 Nahan kpa, ior ngee, shi ka fam kpaa. Se fatyô u tilen ken won heen ga, shi kwagh ne una tôô iyange i môm shin ayange ahar tseegh ga, gadia se hemba ato sha kwagh ne je gande. 14 Sha nahan yô, de mbahemenev asev ve tile sha ityough ki nongo ne;+ shi ior mba ken agar a ase mba ve vese kasev ken atôatyev la cii ve va sha shighe u a ver yô; ve kua mbatamen man mbaajiriv mba ken hanma gar. Nahan Aôndo wase una kera vihi ishima a vese sha ikyaa ne ga.”
15 Nahan kpa, Yonatan wan u Asahel man Yaseia wan u Tikiva lumun a kwagh ne ga, shi Meshulam kua Shabetai+ mba ve lu Mbalevi la kpa ta ikyaa a ve. 16 Kpa ior mba ve due ken uikyangen kera ne er kwagh u i gba zwa môm ér a er la. Nahan pristi Esera kua mbavesen mba sha uya vev, hanmô ve cii sha ati ati, ve kohol ve tseegh sha iyange i hiihii i uwer u sha pue la, sha u nengen sha ikyaa ne. 17 Sha iyange i hiihii i uwer u hiihii la nahan, ve nenge sha kwagh u ior mba ve vôso kasev ken atôatyev la cii ve bee. 18 I va mase kaven er mbagen ken ônov mba upristi kpa vôso kasev ken atôatyev yô:+ ken ônov mba Yeshua+ wan u Yehosadaki man anmgbianev nav yô, lu Maaseia man Elieser man Yaribi man Gedalia. 19 Kpa ve tôndo zwa* ér vea zenda kasev vev mbara, shi er ve lu a ibo yô, vea na nomiyôngo môm ken ilev vev sha ci u ibo ve la.+
20 Ken ônov mba Imer yô,+ lu Hanani man Sebadia; 21 ken ônov mba Harim yô,+ lu Maaseia man Eliya man Shemaia man Yehiel kua Ushia; 22 ken ônov mba Pashur yô,+ lu Elioenai man Maaseia man Ishemael man Netanel man Yosabadi kua Eleasa. 23 Man ken Mbalevi yô, lu Yosabadi man Shimei man Kelaia (ka Kelita je la) man Petahia man Yuda man Elieser; 24 ken mbawanatsam di, lu Eliashibi; ken mbakuran ihindagar yô, lu Shalum man Telem man Uri.
25 Ken Iserael, ken ônov mba Paroshi yô,+ lu Ramia man Ishia man Malkiya man Miyamin man Eleasar man Malkiya kua Benaia; 26 man ken ônov mba Elam yô,+ lu Matania man Sekaria man Yehiel+ man Abedi man Yeremoti kua Eliya; 27 ken ônov mba Satu yô,+ lu Elioenai man Eliashibi man Matania man Yeremoti kua Sabadi man Ashisa; 28 ken ônov mba Bebai yô,+ lu Yehohanan man Hanania man Sabai man Atelai; 29 ken ônov mba Bani yô, lu Meshulam man Maluki man Adia man Yasubi kua Sheal man Yeremoti. 30 Ken ônov mba Pahati-moabi yô,+ lu Adena man Kelal man Benaia man Maaseia man Matania kua Besalel man Binui man Manase; 31 ken ônov mba Harim yô,+ lu Elieser man Ishiya man Malkiya+ man Shemaia man Shimeon, 32 man Benyamin man Maluki man Shemaria. 33 Ken ônov mba Hashum yô,+ lu Matenai man Matatah man Sabadi man Elifeleti man Yeremai man Manase kua Shimei; 34 ken ônov mba Bani yô, lu Maadai man Amram man Uel, 35 man Benaia man Bedeia kua Keluhi, 36 man Vania man Meremoti man Eliashibi, 37 kua Matania man Matenai man Yaasu; 38 ken ônov mba Binui yô, lu Shimei, 39 man Shelemia man Natan man Adia, 40 man Makenadebai man Shashai man Sharai, 41 man Asarel man Shelemia man Shemaria, 42 kua Shalum man Amaria man Yosev; 43 man ken ônov mba Nebo yô, lu Yeiel man Matitia man Sabadi man Sebina kua Yadai man Yoel kua Benaia. 44 Mban cii yange ve vôso kasev ken atôatyev,+ nahan ve zenda kasev mbara kua ônov vev.+