Nehemia

8 Tsô ior cii kohol imôngo a awashima môm, hen tembe u sha ishigh ki Hundagar u Mnger la.+ Nahan ve kaa a Esera,+ orngeren la ér a va a takeda u Tindi u Mose+ u Yehova yange na Iserael la.+ 2 Tsô pristi Esera va a Tindi la sha ishigh ki mba ve kohol* la,+ nomso man kasev, man hanma or u nana ungwa nana kav cii. Lu sha iyange i hiihii i uwer u sha utaankaruhar la.+ 3 Nahan a ôr a genger genger+ sha ato a nomso man kasev, man hanma or u nana fatyô u kaven cii, hen tembe, hen ishigh ki Hundagar u Mnger la, hii pepe zan zan iyange sha tembe. Ior kegh ato zulee+ lu ungwan kwagh u i lu ôron ken takeda u Tindi la. 4 Esera orngeren la, tile sha tsembe u i mande sha ikyon sha ci u mkombo ne yô; mba ve tile ikyua a na ken uwegh nagh ku iyanegh yô, lu Matitia man Sema man Anaia man Uria man Hilkia kua Maaseia. Man mba ve tile ikyua a na ken uwegh nagh ku imesegh yô, lu Pedaia man Mishael man Malkiya+ man Hashum man Hashe-badana man Sekaria kua Meshulam.

5 Tsô Esera bugh takeda la sha ishigh ki ior cii, sha ci u yange tile kar hanma or cii. Bughun u yô, ior cii mough tile sha. 6 Maa Esera wuese Yehova Aôndo u mimi, U a lu u hemban la. Tsô ior cii kaa ér, “Amen!* Amen!”+ shi ve kende ave sha. Tsô ve gure sha ishigh ki Yehova ve kuma ishiv inya. 7 Nahan Yeshua man Bani man Sherebia+ man Yamin man Akubi man Shabetai man Hodia man Maaseia man Kelita man Asaria man Yosabadi+ man Hanan man Pelaia, mba ve lu Mbalevi la lu pasen ior Tindi la,+ er ior tile sha ve lu her la je. 8 Ve za hemen u ôron Tindi u Aôndo u i nger ken takeda la genger genger. Ve lu pasen ior un wanger wanger shi tan iwanger sha mi kpaa; nahan ve wase ior u kaven inja i kwagh u i lu ôron la.+

9 Tsô Nehemia, u lu gomna* hen shighe ne la, man Esera+ u lu pristi man orngeren la, kua Mbalevi mba ve lu tesen ior la, gema kaa a ior cii ér: “Iyange ne ka icighan iyange i Yehova Aôndo wen,+ de kera zungwen shin vaan nen ga.” Gadia ior cii lu vaan zum u ve ungwa mkaanem ma ken Tindi la yô. 10 A kaa a ve ér: “Yem, za ya nen akaa a dedoo* shi ma nen akaa a nyohon, shi tindi nen a akaayan+ i za na mba ve lu a kwagh ga la ci ve; gadia iyange ne ka icighan iyange i Ter wase. De kera zungu nen ga, gadia iember i Yehova a ne ne la ka agee a en.”* 11 Shi Mbalevi lu kumbur ior cii, kaan ér: “Huan nen! Gadia iyange ne ka icighaniyange je, de kera zungu nen ga.” 12 Tsô ior cii hembe yem u za yan kwagh shi man kwagh shi tindin mbagenev a kwaghyan u ve kar kwar ve ne ve la, man sha u za ember tsung.+ Gadia mkaanem ma i pase ve la wanger ve.+

13 Sha iyange i sha uhar la, mbayaav mba nongoior la cii, kua upristi man Mbalevi, va kohol hen Esera, orngeren la, sha u vea seer zuan a mkav sha akaa a i ôr ken Tindi la yô. 14 Maa ve va kav er i nger ken Tindi u Yehova yange na sha ikyev i Mose la ér Mbaiserael ve tsaan ken atumbe* sha shighe u i lu eren iniongo i sha uwer u sha utaankaruhar la yô,+ 15 shi ér ve yôô+ ken agar a ve cii, kua ken Yerusalem cii kpaa, ve̱ kaa ér: “Due za nen sha iwo za gber nen agbaa a kon u olev man a kon u pain man a kon u metul man andar a avilegh man agbaa a ikyon i lun a ahu igen kpaa, va er nen atumbe, vough er i nger nahan.”

16 Tsô ior due za va a akaa ne va er atumbe a ve a mi, hanma or sha haav mbu nan, shi ve er sha ityembe ve man sha ityembe i iyou i Aôndo u mimi+ kua hen tembe u Hundagar u Mnger+ man hen tembe u Hundagar u Eferaim+ la kpaa. 17 Kape nongoior u u due ken uikyangen u hide la cii er atumbe shi lu tsan ken a je la. Gadia Mbaiserael kera er kwagh ne sha gbenda ne nahan ga, hii sha ayange a Yoshua+ wan u Nun la, zan zan va ar sha iyange la; nahan saan hanma or iyol kpishi.+ 18 Man hanma iyange yô, i ôr takeda u Tindi u Aôndo u mimi la,+ hii sha iyange i hiihii la zan zan va ar sha iyange i masetyô la. Ve er iniongo ne ayange ataankarahar. Sha iyange i sha anigheni la yô, lu icighanmkohol, er tindi tese nahan.+