Hen Mbaefese
5 Sha nahan yô, hingir nen mbakaven Aôndo,+ sha ci u ne mba ônov nav mba doon un ishima, 2 shi za nen hemen u zenden sha dooshima,+ vough er Kristu kpa se* doo un ishima+ shi a ne iyol na sha ci wase,* i lu nagh ku human doon Aôndo nahan.+
3 Idya* man nyityôkwagh i wang ga shin hua cii, u teren tsô kpa i de teren hen atô wen ga,+ vough er i doo u uicighanmbaiorov vea eren nahan;+ 4 shi palegh nen ieren i kunya man iliam i ibume man asenge a dang kpaa+—akaa a a kom sha a ven ga ne—kpa gema sughun nen Aôndo.+ 5 Gadia ne fa kwagh ne, ne ayol a en ne fa, or u eren idya*+ shin or u lun wang ga shin or u eren hua,+ ka or u civir akombo je la, nan ngu a ma dyako ken Tartor u Kristu man u Aôndo ga.+
6 Or môm nana̱ de tsughun ne sha akaaôron a gbilinigh ga, gadia ka sha ci u akaa ne iyugh i Aôndo i lu van sha ônov mba hemban ato ye. 7 Sha nahan yô, de nyôron nen nongo a ve sha akaa ne ga; 8 gadia yange ne lu ime, kpa hegen ne mba iwanger+ ken Ter.+ Za nen hemen u zenden er ônov mba iwanger nahan, 9 gadia ityamegh ki iwanger ki a hanma ieren i dedoo man i perapera man i mimi.+ 10 Keren nen u fan ishima i Ter*+ hanma shighe cii; 11 shi dugh nen ave sha ityom i gbilinigh i ken ime la kera,+ gema pon nen i, i̱ due ken igbar. 12 Gadia akaa a ve eren ken myer la kôr kunya je u teren kpa doo ga. 13 Nahan akaa a i lu duen a mi ken igbar* la cii, ka iwanger i ne ve a lu duen ken igbar ye, gadia hanma kwagh u i lu duen a mi ken igbar cii ka iwanger. 14 Sha nahan yô, i nger ér: “Nder, we or u yaven, nder shin ku,+ nahan Kristu una ta iwanger sha a we.”+
15 Nahan ver nen ishima sha zende wen tsembelee, u de lu er u mbalanenkwagh nahan ga, kpa zenden nen er mbafankwagh nahan, 16 eren nen kwagh a shighe wen sha inja,*+ sha ci u se mba ken ayange a bo. 17 Sha nahan yô, de kera eren nen kwagh sha ibume ga, kpa keren nen u fan ishima i Yehova.*+ 18 Shi de hunden nen msôrom ga,+ dang ngu* ker, kpa za nen hemen u ivin a jijingi. 19 Nea lamen a mô wen* yô, waan nen upasalami kpaa, wuese nen Aôndo, shi waan nen atsam a civir Aôndo, waan nen+ shi kuhwan nen ityougholov ken asema a en*+ sha ci u Yehova,*+ 20 sughun nen Aôndo Ter wase hanma shighe cii,+ sha hanma kwagh ken iti i Ter wase Yesu Kristu.+
21 Ungwan nen imo i hanmô wen cii+ sha u cian Kristu. 22 Kasev ve wa ayol a ve sha ikyev i noov vev,+ er ve we ayol a ve sha ikyev i Ter nahan, 23 sha ci u nom ngu ityough ki kwase u nan,+ vough er Kristu a lu ityough ki nongo na,+ iyol na i a lu or u yiman i la nahan. 24 Jighilii yô, er nongo u Kristu u lu sha ikyev na nahan, kasev kpa ve wa ayol a ve sha ikyev i noov vev sha hanma kwagh cii. 25 Noov, kasev enev ve za hemen u doon ne ishima,+ vough er Kristu kpa yange nongo na doo un ishima ve na iyol na sha ci u u nahan,+ 26 sha er una wanger u, una ôô u sha mnger, ka mkaanem ma Aôndo je la,+ 27 sha u u engem sha ishigh nagh, u de luun a acan shin u zulugh iyol shin u luun a ambaakaa la nahan iyol ga,+ kpa u lu wang a acôghor iyol shio yô.+
28 Kape noov kpa kasev vev ve̱ doo ve ishima er iyol ve i doo ve ishima nahan la. Or u kwase u nan a doo nan ishima yô, iyol i nan doo nan ishima, 29 gadia mayange je or kôron iyol i nan ihyom ga, kpa ka nan koson i shi nan waan i ikyo, vough er Kristu a eren a tiônnongo nahan, 30 sha ci u se mba alegh a iyol na.+ 31 “Sha ityôkyaa ne yô, or nana undu ter u nan kua ngô u nan, nana var ken kwase u nan, ve uhar cii vea hingir iyol i môm.”+ 32 Icighan kwaghmyer+ ne ngu a inja tsung. M ngu ôron kwagh u Kristu man nongo na.+ 33 Nahan kpa, hanma wen yô, kwase u nan a doo nan ishima+ er iyol i nan i doo nan ishima nahan; kwase di nana naan nom u nan icivir tsung.+