Washika u Yakobu
3 Ne cii de hingir nen mbatesen ga, anmgbianev av, gadia ne fa er se mba se tesen la Aôndo una hemba ôron se ijir* vighe vighe yô.+ 2 Gadia se cii ka se nôngo gbeev acin imôngo.+ Or u nan nôngon gbeev sha kwaghôron ga yô, nan ngu or u vough, shi nana fatyô u kôron iyol i nan cii tsaha.* 3 Ka sea wa anyinya ulijam sha zwa sha u a̱ er kwagh u se soo la yô, iyol i a jimin cii kpa se kôôm. 4 Nenge ase kwagh u utso kpaa: Shin er ve kehe kpishi shi ahumbe a taver ka a mgbeghan ve a yemen a mi nahan kpa, ka i kôôm ve sha an-naha u cuku, ve yem ape or u nahan la nan soo u zan cii.
5 Kape nombor wase kpa u lu ilyeegh ki iyolough ki cuku, kpa ka u ôron uzegembaakaav je la. Nenge er sha an-usu u cuku tseegh kpa ka i nande zegeikyô yô! 6 Nombor kpa ka usu.+ Nombor ka ilyeegh ki iyol yase, ki ki iv a hanma kwagh u ifer cii yô, gadia ka u hôngor iyol jimin cii,+ shi ka u nande uma jimin cii* sha usu, man usu u u due ka shin Gehena* je. 7 Gadia uumace vea fatyô u kôôm hanma inja inyamtoho man inyon man kwaghuma u a kpelan a kpela inya kua kwaghuma u shin zegemnger cii, una hingir u ungwan ve, shi ka ve er nahan. 8 Kpa orumace môm nana fatyô u kôôm nombor ga. Ngu ongo kwagh ga, ka bokwagh, u iv a megh ku wuan or.+ 9 Ka sha u ka se wuese Ter Yehova* ye, shi ka sha u môm môm ka se wa uumace mba i gbe “sha ibeen i Aôndo” la ifyan ye.+ 10 Ka sha zwa môm ka se na or iveren shi se wa or ifyan ye.
Anmgbianev av, doo u kwagh a lu nahan ga.+ 11 Imbormnger duen mngerem ma dedoo man ma nyohon* hen zwa mômôô? 12 Anmgbianev av, kon u tur ua fatyô u umen atam a olev shin atam a wain kpa?+ Kape mngerem ma bar kpa ma a fatyô u duen hingir mngerem ma dedoo ga je la.
13 Ka an ken a ven nan lu orfankwagh man orkavenkwagha? Nana̱ tese sha ieren i nan i dedoo ér nan eren kwagh sha ishima i legh legh, i̱ kwaghfan ka a na or nan lu a mi la. 14 Kpa aluer ne iv a iyuhwe ken asema a en,+ shi ne mba a ieren i gban ayôôso la ken a ven* yô,+ de te nen ihyagh a kwaghfan wen la ga,+ ne er nahan yô, ne lu eren aie. 15 Kwaghfan la ka u a dugh sha la ga; ka u taregh,+ u sha inja i iyolough, ka u azôv. 16 Gadia ape iyuhwe man ayôôso a lu yô,* anzughul kpa aa lu her, kua hanma kwagh u bo cii.+
17 Kpa kwaghfan u a dugh sha la, hiihii yô ngu wang,+ shi ngu a bemshima,+ sendegh ikyaa ga,+ a kegh iyol u ungwan kwagh, a iv a mhôônom ma zungwen man atam* a dedoo,+ sangen a sange ga,+ shi eren atseregh ga.+ 18 Bee kera yô, ka i lôô ityamegh ki perapera ken bem+ sha ci u mba ve lu keren bem la.*+