Genese

16 Sarai kwase u Aberam yange mar un wan ga,+ kpa gema lu a kpankwase u ken Igipiti* i yilan un ér Hagar.+ 2 Nahan Sarai kaa a Aberam ér: “Yehova yangem mar, yô wea lumun yô tsa a kpankwase wam. Alaghga me zua a ônov hen a na.”+ Nahan Aberam ungwa kwagh u Sarai ôr la. 3 Aberam yange tsa ken tar u Kaanan anyom pue, maa Sarai kwase u Aberam tôô Hagar, kpankwase na u ken Igipiti la gema na nom na Aberam ér a lu kwase na. 4 Tsô a tsa a Hagar, maa a wa iyav. Kaven ér un wa iyav yô, ngô na kera gba gban kwagh sha ishigh nagh ga.

5 Nahan Sarai kaa a Aberam ér: “Kwagh u i erem u vihin ne ka ibo you. Ka mo yange m gema kpankwase wam m na u ye, kpa va kaven ér un wa iyav yô, a hii u nengen ér mo m gba kwagh ga.* Yehova a ôr ijir hen atô wam a we.” 6 Nahan Aberam kaa a Sarai ér: “Nenge! Kpankwase wou ngu sha ikyev you. Er kwagh u u nenge i doo u cii a na.” Maa Sarai hee un nahan a yevese un.

7 Shighe kar yô, ortyom u Yehova va zua a na hen imbormnger i ken taaikyôngo, imbormnger i i lu sha gbenda u yemen Shur la.+ 8 A pine un ér: “Hagar, kpankwase u Sarai, u mough hana? Man u ngu zan hana?” Maa a kaa ér: “M ngu yevese ngôm Sarai.” 9 Tsô ortyom u Yehova kaa a na ér: “Hide yem hen ngôu, za hide a iyol you ijime, lu sha ikyev na.” 10 Ortyom u Yehova maa shi kaa ér: “Me seer ônov ou* kpishi, vea ngee je a gande u ôron.”+ 11 Ortyom u Yehova shi kaa a na ér: “Nenge, u ngu iyav, u mar wan u nomso, u ii un iti wer Ishemael,* sha ci u Yehova ungwa u ken ican you. 12 Una lu or u lun inja er ka jakitoho nahan,* uwegh nagh ku a lu num a hanma or, shi uwegh ku hanma or kpaa ku a lu num a na, una tema paleghaa a anmgbianev nav cii.”*

13 Maa a yila sha iti i Yehova u lu lamen a na la, a kaa ér: “We u ngu Aôndo u nengen.+ Mimi je m nenge a un u a nengen a mo laa?” 14 Ka nahan man i yilan ijôr la ér Ber-lahai-roi* ye. (Ngi hen atô u Kadeshi man Berede.) 15 Nahan Hagar mar Aberam wan u nomso, Aberam na wan na u Hagar mar la iti ér Ishemael.+ 16 Aberam lu anyom 86 zum u Hagar mar un Ishemael la.