Orpasenkwagh

4 Tsô shi m gema m kenger mkighir u i lu kighir ior shin tar la. M nenge a mliam ma mba i lu kighir ve la, man or u surun ve ishima lu ga.+ Mbakighir ve lu a tahav, kpa or u surun ve ishima lu ga. 2 Nahan m wuese mbakpenev mba ve vande kpen kera la, guda ve a mbaumav mba ve lu uma her yô.+ 3 Kpa or u i lu a mar nan ga yô nan ngu guda a ve cii,+ sha ci u nan nenge a aeren a ifer a i eren shin tar la ga.+

4 Shi m nenge er gesa ka a na ior ve nôngo kwagh kpoghuloo, ve kpe iyol ve er tom tsembelee yô;+ kwagh ne kpa ka gbilinkwagh, ka di u zendan ahumbe ityô tsô.

5 Ibumeor ka nan wa ave ikyum, inyam i iyol i nan i saan ishe.*+

6 Guda uwegh ku ku iv a mmem, a ave ahar a a iv a tom u eren kpoghuloo man u zendan ahumbe ityô la.+

7 Tsô m gema ishima m ver sha gbilinkwagh ugen u a lu zan hemen shin tar yô: 8 Orgen ngu tswen, ngu a ma or ga; ngu a wan ga, ngu a anmgbian ga, kpa memen tom u eren kpoghuloo ga. Inyaregh ki kom ashe na sha won kpaa ga.+ Kpa pinen iyol na ér, ‘M ngu eren tom kpoghuloo shi nyumen iyol yam* akaa a dedoo sha ci u ana’ je kpa?+ Kwagh ne kpa ka gbilinkwagh, shi ka tom u kunya kpaa.+

9 Guda uhar a môm,+ sha ci u mba a injar i dedoo* sha tom u ve eren kpoghuloo la. 10 Gadia aluer or ve môm gba yô ugen la nana wase nan u moughon. Kpa or u nan gbe man nan lu a or u wasen nan u moughon ga yô nana er nena?

11 Heela tseegh ga, aluer iorov uhar yav ijiir i môm yô a tsee ve a doo, kpa or môm tseegh nahan a tsee nan nena? 12 Shi or a fatyô u hemban or u nan lu tswen la agee, kpa iorov uhar yô vea fatyô u nôngon kwagh a nan. Kor u i tume u igbar itiar yô a fatyô u tôndon u fese ga.

13 Guda wanye u gban ican u nan lu a kwaghfan, a tor u a bee iyol kpa a lan kwagh,+ a kera lu a mfe u ungwan kwaghwan ga la.+ 14 Gadia a* due ken purusu a za hingir tor,+ shin er i mar un ken ibanave, sha hemen u tor ugen la nahan kpaa.+ 15 M nenge kwagh u mba ve lu uma, ve zenden sha tar la cii, kua er kwagh a ze a gumor u a kar a til sha ityough ki ugen la yô. 16 Shin er ior mba suen un ve gande u ôron iyenge nahan kpa, a saan mba vea va va la iyol a na ga.+ Kwagh ne kpa ka gbilinkwagh, ka di u zendan ahumbe ityô tsô.