Genese
18 Shighe kar yô, Yehova+ va ande hen a na hen uzegembaikyonov mba Mamre,+ zum u a tema hen hunda u tenti oo gera gera yô. 2 Moughon ityough sha yô, a nenge iorov utar tile un ken hemen daalaa.+ Nengen a ve yô, a mough hen hunda u tenti la, a yevese a za kohol ve, tsô a ngurum a sua ityough inya. 3 Maa a kaa ér: “Yehova, aluer doo u a mo yô, de gbe karen hen wanakiriki wou nahan ga. 4 Nea lumun yô, de i va a anmnger ôô nen angahar;+ maa mem nen hen itinekon la. 5 Er ne ve hen wanakiriki wen nahan yô, de m va ne a anberedi ya taver nen agee,* tsô ne mase yemen.” Maa ve kaa ér: “Ka shami. Er ase er u kaa nahan.”
6 Nahan Aberaham kar fese za kohol Sara ken tenti kaa a na ér: “Hôr mwem ma kengese uikyaren* utar fese, kaa ikpenberedi.” 7 Aberaham shi kar heela fese yem hen ikyumuile, za kôr gumbua u dedoo, u leghem inyam. Maa a na wanakiriki na, ngula kpaa yem fese u za sôngon. 8 Maa a tôô bôta* man atumba a lun aratata kua gumbua u i jiidi la, a va ver kwaghyan la sha ishigh vev. Tsô a hide a tile ve hen kpe, hen itinekon la, er ve lu yan kwagh la.+
9 Ve pine un ér: “Kwase wou Sara ngu hana?”+ A kaa ér: “Ngu ken tenti heen.” 10 Nahan môm ken a ve kaa ér: “Inyom i sha me hide hen a we hen shighe ne kpee je, man nenge! kwase wou Sara una mar wan u nomso.”+ Sara gema lu sha hunda u tenti u u lu or la ken ijime la, lu ungwan. 11 Aberaham man Sara yange ve bee iyol, ve za ayange.+ Shi Sara kar mar.*+ 12 Tsô Sara gba sen shin ishima kaan ér: “Er m bee iyol, shi terem kpa a bee iyol kera ne nahan, mimi je me fatyô u zuan a msaanyol nee?”+ 13 Maa Yehova pine Aberaham ér: “Er nan ve Sara a lu sen kaan ér, ‘Er m bee iyol nahan kpa, mimi je me fatyô u maren wanaa?’ 14 Ma kwagh ngu u una hemba Yehova u eren yôô?+ Inyom i sha me hide hen a we hen shighe ne nahan, Sara una mar wan u nomso.” 15 Kpa Sara gba tunan kaan ér, “M se ga!” sha ci u lu cian. Kpa a kaa a na ér: “Ei! U se.”
16 Ior mbara mba moughon u yemen, mba veren ishigh vegher u Sodom la yô,+ Aberaham gba veren ve gbenda. 17 Yehova maa kaa ér: “Doo u me yer Aberaham kwagh u m soo u eren nee?+ 18 Gayô, ka u Aberaham una hingir zegeikyurior i ageegh kpee je, man akuraior a sha tar cii, aa zua a iveren sha ikyev na.+ 19 Gadia m va hingir u fan un, sha er una wa ônov nav mba una va mar la man ya na kwagh ér, ve eren kwagh u mimi man u vough er Yehova a soo la, kua shighe u una kera lu ga kpaa,+ sha er Yehova una er kwagh u yange tôndo zwa u eren a Aberaham la yô.”
20 Nahan Yehova kaa ér: “Mliam ma i vaa sha kwagh u Sodom man Gomora la ngee tsô,+ shi isholibo ve kpaa i kehe kpishi.+ 21 Me sen me za nenge aluer ieren ve zua sha mliam ma ma nyer hen a mo sha kwagh ve la yô, man a lu nahan ga kpa me fa.”+
22 Maa ior mbara kar heela yem vegher u Sodom la, kpa Yehova+ yô lu vea Aberaham her. 23 Maa Aberaham kporom pine ér: “Mimi je u tim orperapera a iferor imôngo?+ 24 Aluer mbaperapera mba ken gar la 50 yô, u tim ve kera, u zungwe ijiir la mhôônom sha ci u mbaperapera mba 50 mba ve lu ker la gaa? 25 Tuna u kaan ér we nahan ú er imbakwagh la, ú tim orperapera a iferor imôngo. Gadia aluer u er nahan yô, mkposo a kera lu hen atô u orperapera a iferor ga!+ Kwagh ne tuna sha a we tsô.+ Orjir u tar cii una kera er kwagh u vough gaa?”+ 26 Maa Yehova kaa ér: “Aluer m zua a mbaperapera 50 ken gar u Sodom yô, me zungwe ijiir la cii mhôônom sha ci ve.” 27 Kpa Aberaham shi kaa ér: “Ku, nenge m gbe cihin ôron kwagh a Yehova tsô, man yô m ngu vuulevu kua mtwem. 28 Aluer yina iorov utaan u lun mbaperapera 50 di ye, u tim gar la cii sha ci u mbautaan mba ve yen mbara?” Maa a kaa ér: “Aluer m zua a ve 45 ker yô, me tim un ga.”+
29 Kpa shi a pine un ér: “Aluer ka mbaperapera 40 u zough a mi ker di ye?” A kaa a na ér: “Sha ci u ve mba 40 mbara yô me tim un ga.” 30 Kpa shi a za hemen a kaa ér: “Yehova, wea lumun yô de vihin ishima ga,+ kpa de shi m pine u: Aluer ka mbaperapera 30 tseegh u zough a mi ker di ye?” A gema a kaa ér: “Aluer m zua a ve 30 ker yô me tim un ga.” 31 Kpa shi a za hemen a kaa ér: “Ku, nenge m cihi m ngu ôron kwagh a Yehova. Aluer ka mbaperapera 20 tseegh u zough a mi ker di ye?” A gema a kaa ér: “Sha ci u ve mba 20 mbara yô, me tim un ga.” 32 A mase kaan ér: “Yehova, wea lumun yô, ishima i de vihin we ga, kpa de m mase pinen we kwa ne tsô: Aluer ka pue tseegh i zough a mi ker di ye?” A gema a kaa ér: “Sha ci u mbapuev mbara yô, me tim un ga.” 33 Yehova lamen a Aberaham been yô a yem kwagh na,+ Aberaham kpa cin hide hen ijiir na.