U Hiihii u Peteru
3 Ne kasev kpaa, wa nen ayol a en sha ikyev i noov enev,+ sha er aluer vea lu mba wan kwaghôron u Aôndo ikyo ga je kpa, a urugh ve vea hingir u eren nahan, a lu sha kwaghôron ga, kpa a lu sha ieren i kasev vev yô,+ 2 sha ci u vea nenge a ieren yen i wang la sha ashe a ve,+ kua icivir i ne ne ve tsung la. 3 Hwe wen a̱ de lu u ken won ga, er ityough ki kuran man u wuhan iyol sha akaa a sha zanaria a eren hwe a mi+ shin sha akondo a dedoo nahan, 4 kpa i̱ lu hwe u ken ishima, u or u ken myer, u a saan ishe ga la, ka ishima i legh legh man ieren i lun ving je la,+ aeren ne gba kwagh sha ishigh ki Aôndo kpen kpen. 5 Gadia kape uicighanmbaukasev mba sha ayange a tsuaa, mba ve suur sha Aôndo la kpa yange ve eren hwe je la, ve wa ayol a ve sha ikyev i noov vev, 6 vough er Sara ungwan imo i Aberaham je yô, yilan un ér “terem” nahan.+ Man ne hingir ônov nav,* aluer ne za hemen u eren kwagh u dedoo, ne cia kwagh ga yô.+
7 Ne noov kpaa, lu nen vea ve sha mkav.* Eren nen kwagh a ve sha icivir,+ er ka i er a ikyagh ki ki ngôôr hemben ga nahan, ka kwase je la, gadia ve kpa mba mbayandyako+ u uma u i lu nan sha mhôôn la a ven imôngo, sha er Aôndo una venda u ungwan mbamsen enev ga yô.
8 U masen yô, ne cii lu nen ishima i môm,*+ zungwen nen a mbagenev imôngo, doo nen ayol a en er ka anmgbianev nahan, zungwen nen mbagenev mhôônom tsung,+ shi hiden nen a iyol ijime.+ 9 De oron nen iyev i ifer sha ifer ga,+ or a̱ laha ne kpa, ne de lahan nen nan ga.+ Kpa gema sôn nen iveren sha ci u nan,+ gadia ka kwagh u i yer ne ér ne̱ er je ne, sha er ne ya dyako u iveren yô.
10 Gadia “hanma or u uma a doo nan ishima shi i sar nan u nengen a ayange a dedoo yô, gba u nana kura nombor u nan sha er ua ôr kwagh u bo ga,+ kua zwa u nan sha er ua er aie ga yô. 11 Nana̱ de ifer,+ nana̱ eren kwagh u dedoo;+ nana̱ ker bem shi nana̱ zenda un ityô kpaa.+ 12 Gadia ashe a Yehova* nga sha mbaperapera, ka a kegh ato a mbamsen vev mba zamber,+ kpa Yehova* tsughur ishigh sha a mba eren akaabo.”+
13 Jighilii yô, aluer ne mba a gbashima sha kwagh u dedoo yô, ka an nana bula ne?+ 14 Aluer ne mba yan ican sha ci u kwagh u perapera je kpa, a saan ne iyol.+ Nahan kpa, de cie nen kwagh u a cier ve iyol* la ga, ishima kpa i̱ de ze ne iyol ga.+ 15 Kpa tsegha nen Kristu ken asema a en ner ngu Ter wen, hanma shighe yô, waan nen iyol keghen nen a kegh u pasen kwagh sha ishigh ki hanma or u nana pine ne ityôkyaa i ishimaverenkeghen yen yô, kpa eren nen nahan a ishima i legh legh+ man sha icivir tsung.+
16 Za nen hemen u lun a imoshima i dedoo,+ sha er aluer ka nyi je i lu ôron sha a ven kpa, mba ve ôron akaa sha a ven la vea va ahenge+ sha ci u ieren yen i dedoo i mbadondon Kristu la yô.+ 17 Gadia hemba kan a inja u ne yan ican sha ci u ne mba eren kwagh u dedoo,+ aluer ka ishima i Aôndo u den ér i lu nahan yô, a u ne yan ican sha ci u ne mba eren kwaghbo la.+ 18 Gadia Kristu yange kpe sha ci u asorabo kwa môm vough maa kure kwagh la gbem sha won,+ orperapera môm kpe sha ci u mbaerenakaabo,+ sha er una za a ven hen Aôndo yô.+ Yange i wua un shighe u lu ken iyol i inyam man awambe la,+ kpa i nder un ngu uma ken jijingi.+ 19 Man ka ken mlu ne yange za pase ujijingi mba ve lu uikyangen ken purusu la kwagh ye,+ 20 ka ujijingi mba ngise ve lu hemban ato shighe u Aôndo lu wan ishima keghen sha ayange a Noa,+ zum u i lu gban tso la. Ka ker man iorov kpuaa,+ ka uumace* anigheni je la, va nyôr lu sha zarmnger, nahan ve war ye.+
21 Kwagh ne zua sha batisema, u un kpa a lu waren ne hegen (i lu sha u wanger hôngor u sha iyol kera ga, kpa i lu sha u sônon Aôndo sha u a̱ na ne lu a imoshima i dedoo)+ sha mnder u shin ku u Yesu Kristu la. 22 Ngu ken uwegh ku iyanegh ku Aôndo,+ gadia yange kôndo yem sha, nahan i gema mbatyomov man mbautahav kua tahav cii, i wa un sha ikyev.+