Sha Uwegh ku Yohane

8 12 Tsô Yesu shi kaa a ve ér: “Mo m ngu iwanger i tar.+ Hanma or u nan dondon mo yô, nana zende ken ime mayange ga, kpa nana lu a iwanger+ i nan uma.” 13 Nahan Mbafarishi kaa a na ér: “U ngu eren shiada sha kwagh wou iyol you; shiada wou ka u mimi ga.” 14 Yesu gema kaa a ve ér: “Mea lu eren shiada sha kwagh wam iyol yam je kpa, shiada wam ka u mimi, sha ci u m fa ape m dugh man ape m lu yemen la kpaa.+ Kpa ne yô ne fa ape m dugh ga, shi ape m lu yemen la kpa ne fa ga. 15 Ne mba er ijir sha mnenge u or;*+ mo m er or môm ijir ga. 16 Man aluer m ngu ôron ijir je kpa, ijirôron yam ka i mimi, sha ci u m ngu tswen ga, kpa Ter u a tindim la ngu vea mo.+ 17 Ken Atindi a en kpa i nger ér: ‘Shiada u iorov uhar ka u mimi.’+ 18 M ngu eren shiada sha kwagh wam iyol yam, shi Ter u a tindim la kpa ngu eren shiada sha kwagh wam.”+ 19 Tsô ve pine un ér: “Teru ngu hana?” Yesu gema kaa ér: “Ne fam ga, shi Terem kpa ne fa un ga.+ Nea fem yô, Terem kpa ma ne fe un.”+ 20 Yesu ôr mkaanem man hen ijiir i veren mbaakwati mba eren iyua,+ shighe u lu tesen ken tempel la. Kpa or môm kôr un ga, sha ci u shighe* na lu a kuma ga.+

21 Tsô shi a kaa a ve ér: “M ngu yemen, ne kerem, nahan cii kpa ne kpe ken isholibo yen.+ Ape m lu yemen la, ne fatyô u van her ga.”+ 22 Tsô Mbayuda gba kaan ér: “Una wua iyol na shinii? Gadia a kaa ér, ‘Ape m lu yemen la, ne fatyô u van her ga.’” 23 Shi a kaa ér: “Ka shin heen ne dugh ye; mo ka sha m dugh ye;+ ne mba ior i tar ne, kpa mo m ngu or u shin tar ne ga. 24 Ka nahan ve m kaa a ven mer: Ne kpe ken asorabo a en ye. Gadia aluer ne na jighjigh ner ka mo un shon ne ga yô, ne kpe ken asorabo a en.” 25 Tsô ve gba pinen un ér: “U ngu ana?” Yesu gema kaa a ve ér: “Er nan ve m ôron kwagh a ven jimi? 26 M ngu a akaa kpishi a ôron sha kwagh wen, shi akaa nga kpishi a me ôr ijir sha mi yô. Jighilii yô, Un u a tindim la ka u mimi, shi ka akaa a m ongo hen a na la je m lu ôron tar ye.”+ 27 Kpa ve fatyô u kaven er lu kwagh u Ter lu lamen a ve sha mi ga. 28 Yesu maa kaa ér: “Ka shighe u ne va kende a Wan u or sha* la,+ ne mase kaven er m lu un,+ shi m gbe eren ma kwagh sha mnenge wam ga,+ kpa akaa a m lu ôron ne, i lu a Ter a tesem la vough ye. 29 Man Un u a tindim la ngu a mo; a undum tswen ga, sha ci u m eren akaa a doon un hanma shighe cii.”+ 30 Er lu ôron akaa ne la, ior kpishi na un jighjigh.

31 Tsô Yesu gba ôron a Mbayuda mba ve na un jighjigh la ér: “Aluer ne mba eren sha kwaghôron wam hanma shighe yô, ne mba mbahenen av jim jim, 32 shi ne fa mimi,+ nahan mimi una pase ne, ne kera lu uikyangen ga.”+ 33 Ve kaa a na ér: “Se mba ônov mba Aberaham, shi mayange or ngu a kôr se kpan ga. Man er nan u kaa wer, ‘A pase ne, ne kera lu uikyangen ga’?” 34 Yesu gema kaa a ve ér: “Mimi mimi je* me kaa ne, hanma or u nan eren isholibo cii nan ngu kpan u isholibo.+ 35 Bee kera yô, kpan lun hen ya gbem sha won ga, kpa wan yô ka nan lu gbem sha won. 36 Sha nahan yô, aluer Wan pase ne, ne kera mba uikyangen ga yô, mimi je ne kera lu ikpan ga. 37 M fa ne mba ônov mba Aberaham. Kpa ne mba keren u wuan mo, sha ci u kwaghôron wam tem ken a ven ga. 38 Ka akaa a yange m nenge shighe u m lu vea Terem la m ôron ye,+ kpa ne yô, ne mba eren akaa a ne ongo hen Ter wen la.” 39 Ve gema ve kaa a na ér: “Ter wase ka Aberaham.” Yesu kaa a ve ér: “Nea lu ônov mba Aberaham yô,+ ma ne lu eren ityom i Aberaham. 40 Kpa hegen ne, ne mba keren u wuan mo, mo u m lu ôron ne kwagh u mimi u m ongo hen Aôndo ne.+ Aberaham yange er kwagh u ne eren ne ga. 41 Ne mba eren ityom i ter wen.” Ve kaa a na ér: “Ka sha idya* i mar se ga; se mba a Ter môm tsô, ka Aôndo.”

42 Yesu kaa a ve ér: “Luun er Aôndo ka Ter wen yô, ma m doo ne ishima,+ sha ci u ka hen Aôndo m dugh m va lu heen ye. M gba karen a ishima yam van ga, kpa ka Un shon la a tindim ye.+ 43 Er nan ne kaven kwagh u m ôron ne ga? Ka sha ci u ne kegh ato a kwaghôron wam ga. 44 Ne due hen ter wen Diabolo, nahan sar ne u eren sha asaren a ter wen.+ Ngula lu orwuanor sha hiihii je,+ shi yange va undu mimi, sha ci u mimi ngu ken a na ga. Ka una eren aie yô, i lu sha mlu na je a lamen ye, sha ci u ngu oraie shi ka ter u mbaerenaie kpaa.+ 45 Mo yô, m ôr ne mimi, kpa ne nam jighjigh ga. 46 Ka an wen nan lu a ikyav i tesen ér mimi je m er ma isholibo? Aluer m ngu ôron ka mimi yô, er nan ne nem jighjigh ga? 47 Or u nan dugh hen Aôndo yô, nan ongo akaaôron a Aôndo.+ Ka nahan ne keghen ato ga ye, sha ci u ka hen Aôndo ne dugh ga.”+

48 Mbayuda gema kaa a na ér: “Ka nahan ve kwagh u se kaan ser, ‘U ngu Orsamaria+ shi u ngu a jijingi u bo’* la i lu shami ye gaa?”+ 49 Yesu gema kaa ér: “M ngu a jijingi u bo ga, kpa m ngu nan Terem icivir, man ne gema ne mba heen mo. 50 Kpa m ngu keren icivir yam iyol yam ga;+ ka Un u a soo ér m zua a icivir la, shi a ôron ijir ye. 51 Mimi mimi je me kaa ne, aluer or ngu wan kwaghôron wam ikyo yô, nana nenge a ku ashe mayange ga.”+ 52 Mbayuda kaa a na ér: “Hegen yô se fa dedoo u ngu a jijingi u bo. Aberaham kpe, uprofeti kpa nahan, kpa u ngu kaan wer, ‘Aluer or ngu wan kwaghôron wam ikyo yô, nana nenge a ku ashe mayange ga.’ 53 U hemba ter wase Aberaham u a kpe laa? Uprofeti kpa kpe. U henen wer u ngu ana?” 54 Yesu gema kaa ér: “Aluer m ngu keren icivir yam yô, icivir yam la ka i gbilinigh. Ka Terem a ne m lu a icivir ye,+ un u ne kaan ner ka Aôndo wen la. 55 Nahan kpa, ne fa un ga;+ mo m fa un.+ Shi aluer m kaa mer m fa un ga yô, me lu oraie er ne nahan. Kpa m fa un, shi m we kwaghôron na ikyo. 56 Yange saan ter wen Aberaham iyol tsung, sha ci u lu veren ashe u va nengen a iyange yam; yange nenge a i ken ishima, nahan saan un iyol.”+ 57 Mbayuda kaa a na ér: “U ngu a kuma anyom 50 kpaa ga, nahan yange u nenge a Aberaham hana?” 58 Yesu kaa a ve ér: “Mimi mimi je me kaa ne, m vande lun kera cii i mar Aberaham ye.”+ 59 Maa ve tôô awen ér vea ta un, kpa Yesu ôso teghelee, due ken tempel kera.