U Hiihii hen Mbatesalonika
4 U masen yô, anmgbianev, er yange se tese ne er ne zende ve a doo Aôndo,+ shi ne lu zenden nahan vough yô, se mba zamber shi kaan a ven ken iti i Ter Yesu ser, za nen hemen u eren nahan i̱ hemba ave a tse. 2 Gadia ne fa akaa a yange se tese ne* ken iti i Ter Yesu la.
3 Gadia ishima i Aôndo yô ka u ne̱ lu wang+ shi ne̱ nyagh idya.*+ 4 Hanma wen nana̱ fa u kôron iyol i* nan tsaha+ sha er ia lu wang+ shi ia lu a icivir yô. 5 De eren nen hua sha u lun a isharen i yaven a or,+ i ior ve kôron iyol tsaha sha mi ga, er akuraior a a fe Aôndo ga la a eren nahan la ga.+ 6 Or môm nana̱ de peren atindi a sha kwagh u aeren a wang la, nahan nana̱ eren anmgbian u nan kwagh u dang ga. Sha ci u Yehova* ve a mtsaha sha akaa ne cii, vough er se vande ôron ne shi se te ne icin gbang gbang nahan. 7 Gadia Aôndo yila se ér se̱ eren akaa a hôngorough ga, kpa ka u se̱ lu wang.+ 8 Nahan or u nan we kwagh ne ikyo ga yô, ka orumace nan lu hemban nan ato ga, kpa ka Aôndo+ u a nan ne icighan jijingi la.+
9 Nahan kpa, sha kwagh u dooshima u hen atô u anmgbianev la yô,+ saa se nger ne kwagh sha mi keng ga, gadia Aôndo ngu tesen ne u doon ayol a en.+ 10 Jighilii yô, ne mba vanden eren a anmgbianev mba ken Masedonia cii nahan. Kpa, anmgbianev, se mba taver ne ishima ser, za nen hemen u eren nahan i̱ hemba ave a tse. 11 Nôngo nen sha afatyô wen cii luun nen ving,+ de we nen ave sha akaa a ior ga,+ shi eren nen tom sha ave a en,+ vough er se tese ne nahan, 12 sha er ne zenden sha inja sha ishigh ki ior mba ken inya,+ shi ma kwagh a ban ne ga yô.
13 Kwagh ugen yô, anmgbianev, sar se u ma ne lan kwagh u mba ve kpe*+ la ga, sha er ne zungwe er mba ve lu a ishimaverenkeghen ga ve eren la ga yô.+ 14 Gadia aluer se na jighjigh ser Yesu kpe shi a nder shin ku yô,+ kape mba ve kpe ken Yesu la kpa Aôndo una nder ve sha u ve̱ lu a na imôngo je la.+ 15 Man ka kwagh u se lu ôron ne sha imo i Yehova* je ne, ser: Se mba se lu uma zan zan shighe u Ter la, mayange se vande a mba ve kpe la ga, 16 sha ci u Ter iyol na una sen sha una va kaa imo sha ikyenge i ortyom u tamen+ man sha busa u Aôndo, nahan mba ve kpe ken Kristu la vea vande nderen shin ku.+ 17 Maa a tôô se mba se lu uma her la vea ve imôngo a yem a vese sha abeen,+ se za kohol Ter+ sha ahumbe; nahan se za hemen u lun vea Ter gbem.+ 18 Yô surun nen hanmô wen ishima sha mkaanem man.