Aerenakaa a Mbaapostoli

19 Tsô er Apolo+ lu ken Korinte la, Paulu kar hen uharegh mba ve lu ica a zegemnger la sen va shin Efese.+ A va zua a mbahenen mbagenev her, 2 a pine ve ér: “Yange ne ngohol icighan jijingi shighe u ne hingir mbananjighjigh laa?”+ Ve kaa a na ér: “Se mba a vande ungwan kwagh u icighan jijingi tsô kpaa ga.” 3 Nahan a pine ér: “Tsô lu batisema u nyi i er ne?” Ve kaa ér: “Lu batisema u Yohane.”+ 4 Paulu kaa ér: “Batisema u Yohane eren la lu ikyav i tesen mgemshima;+ lu ôron a ior ér ve na un u lu van ken ijime na la jighjigh,+ ka Yesu je la.” 5 Mba ongo nahan yô, i er ve batisema ken iti i Ter Yesu. 6 Tsô Paulu penda ve ave iyol, maa icighan jijingi sen sha a ve,+ ve gba lamen ijô igen shi ôron kwaghôron u profeti.+ 7 Nomso cii kuma er 12 nahan.

8 Tsô a nyôr ken shinagoge;+ lu ôron kwagh gbar gbar zan zan iwer itiar, tesen shi wasen ior u kaven kwagh u Tartor u Aôndo sha gbenda u vea lumun a mi yô.+ 9 Kpa mbagenev cighir asema venda u nan jighjigh, shi ve lu lamen sha Gbenda u Ter dang+ sha ishigh ki ikpelaior, nahan a kar her sha, a undu ve,+ a pav mbahenen kposo a ve, lu pasen ve mkaanem ma Aôndo ayange ayange ken iyou i makeranta i Tiranu. 10 A er kwagh ne zan zan anyom ahar, nahan mba hen kpentar u Ashia la cii, Mbayuda kua Mbagrika kpaa, ungwa loho u Ter.

11 Shi Aôndo za hemen u eren ityom i kpilighyol tsung sha ikyev i Paulu,+ 12 je yô, mbaadikpo man akondo a a bende un iyol la je kpa, i tôô i za a mi hen mbauangev,+ maa iangev vev mbi bee, shi ujijingi mba bov ve due ken a ve kera.+ 13 Kpa Mbayuda mbagenev mba ve lu zenden hen ijiir la zendan azôv ken ior kera la kpa nôngo ér vea zenda ujijingi mba bov mban ken ior kera ken iti i Ter Yesu; ve lu kaan ér: “M ngu kaan a ven ken iti i Yesu u Paulu a pasen kwagh na la mer due nen kera.”+ 14 Nahan Oryuda ugen lu, i yilan un ér Siva, lu pristi u tamen. Ônov nav mba nomso utaankaruhar lu eren kwagh ne. 15 Kpa kwa gen la, jijingi u bo kaa a ve ér: “M fa Yesu,+ shi m fa Paulu;+ kpa ne mba unô?” 16 Maa or u lu a jijingi u bo la tsue ta sha a ve, a gbidye ve môm môm, a hemba ve, nahan ve yevese ve due ken iyou la kera, a ikyondo iyol shio, shi ve vihi ayol. 17 Ior cii va hingir u fan kwagh ne, ka Mbayuda kua Mbagrika mba ve lu hen Efese je la; mciem gba ve cii iyol, nahan iti i Ter Yesu za hemen u zuan a icivir. 18 Shi ior kpishi ken mba ve na jighjigh la lu van va pasen shi ôron akaa a ve eren la ken igbar. 19 Jighilii yô, ior kpishi mba yange ve eren ahir yô, va a ityakeda ve va kohol i cii ijiir i môm, ve nande i sha ashe a hanma or cii.+ Ve gba ceke ve nenge ishe i ityakeda la kuma agbenger a azurufa 50,000. 20 Nahan loho u Yehova* lu hemban samber shi seer lun a tahav.+

21 Ken masejime yô, Paulu kange ishima ér una kar ken Masedonia+ man Akaya, maa una yem ken Yerusalem.+ A kaa ér: “Me yemen ker yô, shi me za ken Roma kpaa keng.”+ 22 Nahan a tsua iorov uhar ken mba ve wasen un tom la, a tindi ve ken Masedonia, lu Timoteu+ man Erasetu,+ kpa un lu hen kpentar u Ashia her shighe wa karen.

23 Sha shighe la, ayôôso+ mough taveraa sha kwagh u Gbenda u Ter,+ 24 sha ci u, orvaren iwa i azurufa ugen lu, u eren ayou-akombo a Atemi yô, i yilan un ér Demeteriu. Tom na ne va mbavareniwa mba hen ijiir la a liba kpishi.+ 25 A yila ve kua mbagenev mba eren ambaakaa la cii va kohol, maa a kaa ér: “Ne ior av, ne fa dedoo er i lu kpenga ne u ne se ze ikyura yô. 26 Hegen yô, ne mba nengen shi ungwan kpaa, er or u i yer ér Paulu ne a lu urugh ikpelaior i vesen, geman ve asema sha u ve̱ lu a mnenge ugen kposo yô. Man ka hen Efese heen tseegh ga,+ kpa nôngo u lun hanma ijiir hen kpentar u Ashia jimin cii. Ngu kaan ér mbaaôndo mba i eren ve sha ave la ka mbaaôndo kpôô kpôô ga.+ 27 Man aluer se er beer yô, a va lu kpenga wase ne tseegh ua zua a iti i bo ga, tempel u Atemi, inmgbianaôndo* u hemban ne je kpa ior vea va kera nenge ér ngu kwagh ga, nahan un shon u i civir hen kpentar u Ashia jimin cii kua hanma ijiir sha tar ne una kera lu a icivir ga.” 28 Ior mbara mba ongo kwagh ne yô, asema gba ve awambe, maa ve gba ôron genger genger ér: “Atemi u Mbaefese hemba cii!”

29 Tsô gar cii num kpugh, ior cii hembe ayem gba yemen hen ijiir i eren anumbe; ve kôr Gayu man Aristareku,+ Mbamasedonia mba ve lu zenden vea Paulu la, ve lu yemen a ve. 30 Paulu gema soo u nyôron za kohol ior mbara, kpa mbahenen lumun a na ga. 31 Mbanengen sha kwagh u uiniongo man anumbe, mba ve eren a na doo doo la je kpa tindi loho hen a na, ve zamber a na ér a de nyer ken ijiir i eren anumbe la ga. 32 Jighilii yô, anzughul gba hen atô u ikpelaior la; ior lu ngoron ôron akaa kposo kposo, shi mbagenev kpishi ken a ve fa ityôkyaa i ve va kohol imôngo ga. 33 Tsô ve due a Alekezanda ken ikpelaior la kera, Mbayuda lu daan un yemen a na sha hemen, nahan Alekezanda er ve uwegh ér ve tile; yange soo u ôron kwagh a ior sha u una palegh iyol na yô. 34 Kpa mba kaven er a lu Oryuda yô, ve cii ve gba ôron genger genger ér: “Atemi u Mbaefese hemba cii!” Ve ôr kwagh ne kuma ahwa ahar.

35 Or u nengen sha gar la va nôngo ikpelaior la huan ayôôso, maa a kaa ér: “Ne ior i Efese, mimi je ka an ken uumace nan fe er i lu gar u Mbaefese ne a kuran tempel u Atemi u a hembe cii, shi eev nav mbu sen sha la ga? 36 Er anyiman a lu sha kwagh ne ga yô, gba nen ishima ikyôr, de eren nen kwagh gagher ga. 37 Gadia ne va a ior mban heen, man ve ii ma kwagh ken utempel ga, shi ve laha inmgbianaôndo* wase kpaa ga. 38 Nahan aluer Demeteriu+ kua mbavareniwa mba ve lu a na imôngo la mba a zayol a or yô, ayange nga a teman ijir, shi ugomna kpa mba, nahan mba a ian i za yilan ijir, or la kpa nahan. 39 Kpa aluer kwagh ugen kpa ngu u ne soo ner i nenge sha mi yô, a yila mkohol a kure ikyaa shon sha tindi. 40 Aluer se wa ikyo ga yô, a va kaa ér se mba hendan a gomoti sha kwagh u a ze hemen nyian ne, sha ci u atôakyaa nga a se fatyô u pasen er i hii man ikpelaior i mough ayôôso nahan ga.” 41 Ôron kwagh ne yô, a kaa ikpelaior la yem.