Bäşinji Musa
7 Ýehowa Hudaýyňyz tizden sizi mülk edip berjek ýurduna elter+. Ol uly halklary, sizden has köp, güýçli+ ýedi halky: hetleri, girgaşlary, amorlary+, kenganlary, perizleri, hiwileri, ýabuslary+ ýurtdan kowup çykarar+. 2 Ýehowa Hudaýyňyz şol halklary eliňize berer, olary derbi-dagyn edersiňiz+. Olaryň baryny gyryň+, olar bilen ylalaşyk* baglaşmaň ýa-da dözmezçilik etmäň+. 3 Olar bilen garyndaşlyk açmaň, gyz alşyp-berişmäň+. 4 Sebäbi olar ogullaryňyzy başga taňrylara sežde etdirip, menden daşlaşdyrar+. Şonda Ýehowanyň gahary gelip, sizi dessine ýok eder+.
5 Ine, siziň etmeli zadyňyz: olaryň gurbanlyk ojaklaryny* ýumruň, keramatly sütünlerini döwüň+, keramatly pürslerini* çapyň+, oýma butlaryny ýakyň+. 6 Sebäbi siz Ýehowa Hudaýyňyzyň mukaddes halky, Ýehowa Hudaýyňyz sizi ýer ýüzündäki halklaryň arasyndan eziz halky* edip saýlady+.
7 Ýehowa sizi sanyňyzyň köplügine guwanyp saýlamady+, siz halklaryň arasynda iň kiçisidiňiz+. 8 Ýöne şonda-da Ýehowa sizi gowy gördi, ata-babalaryňyza beren sözünde durup+, Ýehowa sizi güýçli goly bilen Müsür gulçulygyndan, faraonyň elinden azat etdi+. 9 Özüňiz gowy bilýäňiz, Ýehowa Hudaýyňyz hak Hudaýdyr. Ol wepaly, sözünde durýan* Hudaýdyr. Hudaýy söýüp, tabşyryklaryny berjaý edýänleriň müňlerçe nesline ýagşylyk edýändir*+. 10 Hudaýy ýigrenýänleri bolsa dessine ýok edip, almytyny berýändir+. Hudaý özüni ýigrenýänleri haýal etmän jezalandyrar, olaryň almytyny berer. 11 Şonuň üçin size berlen tabşyryklara, kanunlara we hökümlere gulak asyp, birkemsiz berjaý ediň.
12 Eger şu hökümlere ünsli bolup, olara hemişe eýerseňiz, berjaý etseňiz, Ýehowa Hudaýyňyz hem ähtine wepaly bolup, ata-babalaryňyza söz berişi* ýaly, size ýagşylyk eder*. 13 Ol sizi söýüp, berekediňizi artdyrar, sanyňyzy has-da köpelder. Hudaý sizi ata-babalaryňyza wada beren ýurduna eltende+, ogul-gyzyňyzy köpeldip+, topragyňyzy hasylly eder. Gallaňyz, täze şerabyňyz, ýagyňyz bol bolar+, süriňizde göle, owlak-guzy köpeler. 14 Halklaryň arasynda rysgal-döwletli halk bolarsyňyz+, araňyzda perzentsiz maşgala bolmaz, hatda mallaryňyz hem owlak-guzusyz bolmaz+. 15 Ýehowa ähli keselleri araňyzdan aýrar, sizi Müsürdäki elhenç kesellere duçar etmez+. Gaýtam olary duşmanlaryňyzyň başyndan inderer. 16 Ýehowa Hudaýyňyzyň eliňize beren halklaryny ýok ediň+, olara haýpyňyz gelmesin+. Olaryň taňrylaryna sežde etmäň+, ýogsam duzaga düşersiňiz+.
17 „Olar bizden köp ahyry, nädip kowup çykaraly?“+ diýip, 18 gorkup oturmaň+. Ýehowa Hudaýyňyzyň faraony we müsürlileri näme edendigini ýada salyň+. 19 Ýehowa Hudaýyňyz güýç-kuwwatly goly bilen sizi Müsürden çykaranda+, gözüňiziň alnynda alamatlar, gudratlar görkezip+, olara jeza beripdi*. Hiç zatdan gorkmaň, Ýehowa Hudaýyňyz beýleki halklary-da şeýle eder+. 20 Olar sizden gaçyp gutuljak bolsa-da, Ýehowa Hudaýyňyz olary güýçden gaçyrar*+, siz diri galanlaryň baryny gyrarsyňyz. 21 Olardan gorkup, howsala düşmäň, beýik hem haýbatly Hudaýyňyz+ Ýehowa ýanyňyzdadyr+.
22 Ýehowa Hudaýyňyz halklary ýurtdan kem-kemden kowup çykarar+. Olaryň hemmesini birbada ýok etmersiňiz, ýogsam ýurtda ýyrtyjy haýwanlar köpelip, size howp salar. 23 Ýehowa Hudaýyňyz şol halklary eliňize berer, baryny gyryp, soňuna çykarsyňyz+. 24 Hudaý olaryň patyşalaryny hem eliňize berer+, olaryň adyny gök astyndan öçürip taşlarsyňyz+. Olary bütinleý ýok edýänçäňiz+, hiç kim size garşy çykyp bilmez+. 25 Olaryň taňrylarynyň oýma butlaryny ýakyň+. Altyn-kümüşlerine göz gyzdyryp, aljak bolmaň+, ýogsam duzaga düşersiňiz. Sebäbi şol zatlar Ýehowa Hudaýyňyz üçin ýigrenjidir+. 26 Ýigrenji zatlary öýüňize getirmäň, ýogsam özüňizem olar bilen ýok edilersiňiz. Olary şeýle bir ýigreniň welin, siz üçin ýürekbulaýjy zat bolsun, sebäbi olar ýok edilmeli zatlardyr.