Aradan çykan adamlar direlermi?

MUKADDES KITAPDA NÄME DIÝILÝÄR?

«Dogruçyllar hem-de erbetler direler» (Resullar 24:15).

SIZE NÄME PEÝDASY BAR?

Ýakynyňyz aradan çykanda, teselli taparsyňyz (2 Korinfliler 1:3, 4).

Ölümden gorkmarsyňyz (Ýewreýler 2:15).

Aradan çykan dogan-garyndaşlaryňyzy görmäge umydyňyz bolar (Ýahýa 5:28, 29).

MUKADDES KITABA YNANSA BOLÝARMY?

Hawa, munuň azyndan üç sebäbi bar:

• Ähli zady Hudaý ýaratdy. Mukaddes Kitapda Ýehowa Hudaýa «Ýaşaýşyň Gözbaşy» diýilýär (Zebur 36:9; Resullar 17:24, 25). Ähli zady ýaradan Hudaý aradan çykan adamlary hökman direlder.

• Hudaý geçmişde ölen adamlary direltdi. Mukaddes Kitapda sekiz adamyň direlendigi aýdylýar. Olaryň arasynda ýaş, garry, aýal we erkek adamlar bardy. Olaryň käbiri ölenine köp wagt geçmänkä direldi, ýöne biri dört günden soň direldi! (Ýahýa 11:39—44).

• Hudaý aradan çykan adamlary ýene-de direltmek isleýär. Ýehowa Hudaý ölümi ýigrenýär we ony duşman hasaplaýar (1 Korinfliler 15:26). Ol şol duşmany direliş arkaly hemişelik ýok etmek isleýär. Hudaý ýadyndaky adamlary direlder, sebäbi olary «küýseýär» we ýene-de ýer ýüzünde ýaşatmak isleýär (Eýýup 14:14, 15).