Wada edilen çaga

Ýusup bilen Merýem Nazarete gitmän Beýtullahamda galýar. Isanyň doglanyna sekiz gün bolanda, olar Hudaýyň ysraýyllylara beren Kanunyna görä, ony sünnetlediler (Lewiler 12:2, 3). Şeýle-de däp boýunça çaga şol gün at dakylýardy. Ýusup bilen Merýem Jebraýyl perişdäniň aýdyşy ýaly, ogluna Isa diýen ady dakýar.

Bir aýdan gowrak wagt geçip, Isanyň doglanyna 40 gün bolupdy. Ýusup bilen Merýem ony Iýerusalimdäki ybadathana alyp barýar. Iýerusalim olaryň ýaşaýan ýerinden birnäçe kilometr uzaklykda ýerleşýärdi. Kanuna görä, oglan bäbek doglansoň, 40 gün diýlende çaganyň ejesi ybadathana gelip, tämizlenmek üçin gurban bermelidi (Lewiler 12:4—8).

Merýem aýdylyşy ýaly-da edýär. Ol iki sany guşy gurban getirýär. Bu bolsa Ýusup bilen Merýemiň garyp ýaşaýandygyny görkezýärdi. Aslynda, Kanun boýunça bir ýaşyna ýetmedik guzy we kepderi gurban getirilmelidi. Eger aýalyň ýagdaýy bolmasa, onda gurban hökmünde iki gumry ýa-da iki kepderi bermelidi. Merýemiň hem gurby çatmansoň, şu zatlary getirýär.

Ybadathanada Ýusup bilen Merýemiň ýanyna Şimgon atly bir gartaşan adam gelýär. Ýehowa oňa dünýäden ötmezinden öň wada edilen Mesihi görjekdigini aýan edipdi. Şol gün Şimgon mukaddes ruhuň täsiri bilen ybadathanada eli bäbekli duran Ýusup bilen Merýemi tapyp, olaryň ýanyna gelýär. Şonda Şimgon çagany eline alýar.

Ol Isany gujagyna alyp, şeýle sözler bilen Hudaýa minnetdarlyk aýdýar: «Eý Älemiň Hökümdary, sen aýdyşyň ýaly, öz guluňa dünýäden rahat gitmäge mümkinçilik berýärsiň. Sebäbi gözlerim seniň halas edişiňi görýär. Sen ony ähli halklar üçin taýýarlapdyň. Ol milletleriň gözünden perdäni aýyrýan nurdur we öz halkyň ysraýylyň şöhratydyr» (Luka 2:29—32).

Ýusup bilen Merýem bu sözleri eşidip, haýran galýarlar. Soňra Şimgon olary patalaýar we ejesine: «Çaga zerarly Ysraýylda köpler ýykylar, köpler dikeler» diýýär. Şeýle-de ol Merýemiň özüniň hem ýüregine gylyç sanjylan ýaly, ejir çekjekdigini aýdýar (Luka 2:34).

Ybadathanada 84 ýaşly Anna atly bir pygamber aýal hem bardy. Ol ybadathanadan gitmän, ol ýerde mukaddes gullugy berjaý edýärdi. Edil şol wagt ol Ýusup, Merýem we Isanyň ýanyna barýar. Ol Hudaýa minnetdarlyk aýdyp, diňlemek isleýän adamlaryň ählisine Isa hakda gürrüň berip başlaýar.

Göz öňüne getiriň, Ýusup bilen Merýem şol gün ybadathanada bolan zatlary görüp, nähili begenendirler! Dogrudanam, bularyň bary wada edilen Mesihiň Isadygyny tassyklaýardy.