«Meniň boýuntyrygymy dakynyň»
1 Biz Isanyň boýuntyrgymy dakynyň diýen mähirli çakylygyna seslenip, gaýgy-aladadan doly dünýäde dynçlyk tapdyk (Mat. 11:29, 30). Hudaýyň Patyşalyk baradaky hoş habaryny wagyz etmek işi aňsat däl, emma ol dynçlyk berýändir. Bu işe gatnaşmak Isanyň boýuntyrygyny dakynmagy aňladýar. Şeýle-de bu adamlara Isanyň ýumşak boýuntyrygyny dakynyp, dynçlyk tapmaga kömek etmegi aňladýar (Mat. 24:14; 28:19, 20).
2 Wagyz gullugy bize dynçlyk berýär. Isa şägirtlerinden ýene-de bir ýüki götermegi talap etmedi. Isa olaryň göterýän agyr ýüküni goýup, onuň ýeňil ýüküni almagy maslahat berdi. Indi bize bu umytsyz zalym dünýä we durmuşyň aladalary agyr ýük bolmaýar. Şeýle-de biz bar güýjümizi durnuksyz baýlyga sarp etmeýäris (Luka 21:34; 1 Tim. 6:17). Biz gündelik zerurlyklarymyz üçin işlesek-de, Hudaýyň Patyşalygyny birinji orunda goýýarys (Mat. 6:33). Eger-de wajyp işlere dogry garaýyşda bolsak, bize wagyz gullugy ýük bolman, gaýtam, dynçlyk berer (Flp. 1:10, 11).
3 Köplenç biz ýüregimize ýakymly zatlary gürrüň bermegi gowy görýäris (Luka 6:45). Ähli mesihçiler Ýehowa bilen ýakyn gatnaşygyny we Hudaýyň wada eden Patyşalygynyň bereketlerini gymmat saýýarlar. Şol sebäpli biz «ýagşy zatlaryň hoş habaryny» wagyz edenimizde, gündelik aladalarymyzy unudyp, dynçlyk tapýarys! (Rim. 10:15). Biz bir işi näçe köp etsek, şonça-da ol işe ökdeleşip, şatlyk tapýarys. Şonuň üçin başardygymyzdan wagyz gullugyna köp wagt sarp etsek, köp dynçlyk taparys. Adamlar hoş habara seslenende, biz has-da ruhlanýarys! (Res. iş. 15:3). Biz biparh we garşylyk bildirýän adamlara duşsak-da, bize wagyz gullugy dynçlyk berýär. Sebäbi biz edýän tagallalarymyzyň Ýehowany begendirýändigini bilýäris we ol bize jomartlyk bilen ak pata berýär (Res. iş. 5:41; 1 Kor. 3:9).
4 Biz Isanyň çakylygyna seslenip, Ýehowanyň Güwäçileri hökmünde, onuň bilen bile işleşmek hormatyna mynasyp bolduk (Iş. 43:10; Ylh. 1:5). Bu bolsa, biziň üçin dynçlykdyr!