Mukaddes Kitapda Isa pygamberiň durmuşy hakda aýdylýan zatlar dogrumy?

Mukaddes Kitabyň jogaby

Mukaddes Kitapda Isanyň durmuşy hakda beýan eden Luka: «Men bolan zatlaryň ählisini başdan-aýak jikme-jik barladym» diýip ýazdy (Luka 1:3).

Köp adamlar Isanyň döwürdeşi bolan Mattanyň, Markusyň, Lukanyň hem-de Ýahýanyň ýazan dört hoş habarynda Isanyň durmuşy barada aýdylýan zatlaryň b. e. 300-nji ýyllarynda üýtgedilendigini aýdýarlar.

Emma 1900-nji ýyllaryň başynda Müsürde Ýahýa resulyň hoş habarynyň wajyp golýazmasy tapylýar. Bu golýazma başgaça Raýlendzyň papirusy 457 (P⁵²) hem diýilýär. Ol häzire çenli Angliýanyň Mançester şäherindäki Jon Raýlendzyň kitaphanasynda saklanýar. Golýazmada häzirki Mukaddes Kitapdaky Ýahýa 18:31—33, 37, 38-nji aýatlar bar.

Ol Injil kitabynyň iň gadymky golýazmasy hasaplanýar. Alymlaryň köpüsi onuň takmynan b. e. 125-nji ýylynda ýazylandygyny aýdýarlar. Diýmek, bu golýazma asyl nusganyň ýazylanyna bary-ýogy 25 ýyldan gowrak wagt geçensoň ýazylypdyr. Ondaky ýazylan zatlar soňky golýazmalar bilen hem sözme-söz diýen ýaly deň gelýär.