Isa pygambere näme üçin Hudaýyň Ogly diýilýär?

Mukaddes Kitabyň jogaby

Mukaddes Kitapda Isa pygambere «Hudaýyň Ogly» diýilýär (Ýahýa 1:49). «Hudaýyň Ogly» diýen jümle Allatagalanyň ähli zadyň, şol sanda Isanyňam Ýaradyjysydygyny we ýaşaýşyň Gözbaşydygyny görkezýär (Zebur 36:9; Ylham 4:11). Mukaddes Kitapda adamlaryňky ýaly göni manyda Hudaýyňam çagasynyň bolandygy aýdylmaýar.

Mukaddes Kitapda perişdelere-de «Hudaýyň ogullary» diýilýär (Eýýup 1:6, çykgyt). Şeýle-de ilkinji ynsan Adam ata hem «Hudaýyň ogly» diýilýär (Luka 3:38). Emma Mukaddes Kitapda Isa Hudaýyň ilkinji ogly diýilýär, sebäbi Hudaý ony öz elleri bilen we ähli zatdan öňürti ýaratdy.

• Isa ýere gelmezinden öň gökde ýaşadymy?

• Isa gökde näme edýärdi?

Isa ýere gelmezinden öň gökde ýaşadymy?

Hudaýyň ilkinji Ogly Isa ýer ýüzünde ynsan bolup dogulmanka, gökde perişdedi. Onuň özi hem: «Men gökden... geldim» diýdi (Ýahýa 6:38; 8:23).

Hudaý Isany ähli zatdan öňürti ýaratdy. Isa barada Mukaddes Kitapda şeýle diýilýär:

• «Ol... ýaradylan zatlaryň ilkinjisidir» (Koloslylar 1:15).

• Ol «Hudaýyň ilkinji ýaradany» (Ylham 3:14).

«Onuň asly gadymy döwürdendir, geçmişdendir» diýen pygamberlik Isada ýerine ýetdi (Mikaý 5:2; Matta 2:4—6).

Isa gökde näme edýärdi?

Onuň gökde beýik orny bardy. Isa doga edende öz orny hakda şeýle diýdi: «Atam, dünýä ýaradylmanka... alan şöhratymy indi maňa gaýtaryp ber» (Ýahýa 17:5).

Ol Atasyna ähli zady ýaratmaga kömek etdi. Isa «ökde ussa kimin» Hudaý bilen zähmet çekdi (Nakyllar 8:30). Mukaddes Kitapda Isa barada şeýle diýilýär: «Gökdäki we ýerdäki ähli zatlar... ol arkaly ýaradyldy» (Koloslylar 1:16).

Hudaý her bir zady, perişdeleri, älem-jahany Isa bilen bile ýaratdy (Ylham 5:11). Jaýyň çyzgysyny çyzýan bilen ony gurýan adamyň bilelikde işleşişi ýaly, Hudaý bilen Isa-da eginme-egin işleşdi.

Oňa Söz diýilýär. Isa ýere gelmänkä-de Söz diýilýärdi (Ýahýa 1:1). Diýmek, Hudaý ony öňem perişdelere habaryny ýetirmek we görkezme bermek üçin ulanypdyr.

Şeýle-de Isa adamlara Hudaýyň habaryny ýetirendir. Hudaý hatda Erem bagynda Adam ata we How ene bilenem Isa arkaly gepleşen bolmaly (1 Musa 2:16, 17). Çölde ysraýyllara ýol görkezen we görkezme beren perişde-de Isa bolmaly. Ysraýyllaram oňa gulak asandyr (2 Musa 23:20—23)a.