Wagyz mekdebine hoş geldiňiz!
ÝER ÝÜZÜNDE 200-den gowrak döwletde ýaşaýan millionlarça adamlar Wagyz mekdebinde okaýarlar. Olaryň käbiri ençeme ýyldan bäri, käbiri bolsa ýaňy-ýakynda okap başlady. Bu mekdep ýüz müňden gowrak ýygnaklarda her hepdede geçirilýär. Şol sebäpli sen nirede ýaşasaň-da, Wagyz mekdebine ýazylyp bilersiň. Her bir adam ýaşyna, milletine we bilimine garamazdan, bu mekdepde mugt bilim alyp biler.
1943-nji ýylda Ýehowanyň Şaýatlarynyň ýygnagynda döredilen Wagyz mekdebiniň maksady şeýle düşündirilipdi: «Hudaýyň Sözüni eşidip, iman eden sadyk adamlary beýlekilere-de „öwretmäge ukyply“ etmeli we olaryň her birini ýüregindäki umydy hakda wagyz etmäge doly taýýarlamaly» («Wagyz üçin sapaklar», s. 4, iňl.). Mekdebiň maksady şu günlerem üýtgemedi.
Biz Hudaýyň beren dilini nädip has gowy ulanyp bileris? Mezmurçy şeýle diýýär: «Dem alýan ähli jemende Rebbe sena etsin» (Zeb. 150:6). Biz gökdäki Atamyzy şöhratlandyryp, ony begendirýäris hem-de onuň ýagşylygyna we söýgüsine ýürekden minnetdardygymyzy görkezýäris. Injilde-de mesihçilere «Hudaýa elmydam öwgi gurbanlaryny, Onuň adyny ykrar edýän dodaklaryň miwesini hödürlemek» maslahat berilýär (Ýew. 13:15). Biz Wagyz mekdebi Ýehowany has-da gowy şöhratlandyrmagy öwreder diýen ynam bilen, sizi oňa gatnaşmaga çagyrýarys.
Wagyz mekdebinde labyzly okamaklyga, dilewarlyga we mugallymçylyk tärlerine köp üns berilse-de, bu duşuşygyň peýdasy has köpdür. Mekdebe ýazylanlar özbaşdak okamagy, diňlemegi, ýatda saklamagy, gözleg geçirmegi, derňemegi, ýygnanan maglumaty belli bir tertipde düzmegi, söhbetdeş bolmagy, soraglara jogap bermegi, hat ýazmagy we şuňa meňzeş zatlary öwrenýärler. Mekdepde Mukaddes Ýazgylar hem-de oňa esaslanan edebiýatlar öwrenilip, şoňa görä jogap berilýär we çykyş edilýär. Sen Hudaýyň Sözündäki gymmatly hakykaty bilip, Ýehowa ýaly pikirlenmegi öwrenersiň. Bu saňa durmuşyň ähli ýagdaýlarynda kömek eder. Hudaýyň Sözüniň peýdasy barada XX asyrda ýaşan uniwersitetiň bir mugallymy Uillýam Laýon Felps şeýle diýdi: «Mukaddes Ýazgylary gowy bilýän her bir adama, hakykatdan-da, bilimli diýse bolar... Meniň pikirimçe, Mukaddes Ýazgylaryň berýän bilimi uniwersitetiň biliminden has ýokary. Mukaddes Ýazgylaryň bilimi bolmasa, uniwersitet biliminiň peýdasy ýokdur».
Yhlasly okaň
Elbetde, Wagyz mekdebinde berilýän bilimi doly özleşdirmek üçin köp tagalla etmeli. Pawlus resul ýoldaşy Timoteosa şeýle maslahat berdi: «Bu işlerde yhlasly bol. Ilerleýşiňi hemmeleriň görmegi üçin bular bilen meşgullan» (1 Tim. 4:15). Munuň üçin siz näme edip bilersiňiz?
Mümkin boldugyndan, Wagyz mekdebine her hepde gatnaşjak boluň. «Wagyz mekdebi» kitabyny paýhasly ulanyň. Kitabyň birinji sahypasyndaky ýörite bellenen ýere adyňyzy ýazyň. Mekdebe geleniňizde, kitaby getirmegi ýatdan çykarmaň. Bu kitap ýörite ulanmak üçin niýetlenendir. Siz wajyp pikirleriň aşagyny çyzyp bilersiňiz. Her sahypada gerekli bellikleri etmek üçin boş ýerler bar. Oňa mekdepde aýdylan peýdaly maslahatlary ýazyp bilersiňiz.
Mekdebe her hepde taýýarlananyňyzda, esasy okuw kitabynyň Mukaddes Ýazgylardygyny unutmaň. Ilki bilen, her hepdede Mukaddes Ýazgylardan okalmaly aýatlary okamaly. Şeýle-de başga ýumuşlara degişli temalary hem öňünden okamak peýdalydyr.
Mekdepde käte diňleýjileriň hem gatnaşmagyna mümkinçilik berilýär. Olara doly gatnaşjak boluň. Bu size eşiden zatlaryňyzy ýatda saklamaga we olary durmuşyňyzda ulanmaga kömek eder.
Mekdebe ýazylanlaryň ählisine çykyş etmäge we sahna taýýarlamaga mümkinçilik berilýär. Şeýle mümkinçiligi sypdyrmaň. Berlen sapagyň üstünde jan edip işläň. Tejribe toplamagyňyz üçin size maslahatlar berler. Olary ýürekden kabul ediň. Berlen görkezmäni kitabyňyza bellik ediň. Adam öz kemçiligini görüp bilmeýär, şol sebäpli Mukaddes Ýazgylar esasynda söýgi bilen berlen maslahatlar size ruhy taýdan ösmäge ýardam eder. Şeýle maslahatlar Mekdepde köp ýyldan bäri okaýanlara-da peýdaly bolar (Sül. tym. 1:5).
Siz ruhy taýdan çalt ösmek isleýärmisiňiz? Munuň üçin her bir ýumşa öňünden taýýarlanmaly. Kimdir biriniň ýerine çykyş etmeli bolanda, siz öz kömegiňizi teklip edip bilersiňiz. Bu size tejribe toplamaga kömek eder. Başgalar çykyş edende, olary ünsli diňläň. Sebäbi biz biri-birimizden öwrenýäris.
Şeýle-de bu okuw kitabyny ýagdaýyňyza görä özbaşdak öwrenseňiz, size mugallymçylyk ukyplaryňyzy ösdürmäge kömek eder. Kitabyň başyndaky 15 bölümi öwrenip, soňra 78-nji sahypadan başlanýan «Dilewarlyk we mugallymçylyk tärlerini ösdürmek üçin meýilnama» boýunça taýýarlanmagy dowam ediň. Ilki, sapagy öwrenip, soňra oňa degişli gönükmeleri ýerine ýetiriň. Öwrenen zatlaryňyzy wagyzda ulanyň. Şonda siz dilewarlyk tärlerini öwrenip, Hudaýyň Sözüniň ökde mugallymy bolarsyňyz.
Wagyz mekdebinde öwrenen zatlaryňyz size durmuşda iň wajyp işi berjaý etmäge kömek eder. Biz Hudaýy şöhratlandyrmaly, sebäbi biz Ol arkaly ýaşaýandyrys. Ýehowa Hudaý beýik şöhrata mynasypdyr (Ylh. 4:11). Wagyz mekdebiniň berýän bilimi bize Ýehowany şeýle şöhratlandyrmaga mümkinçilik döredýär, çünki biz aýdyň pikirlenmegi, paýhasly bolmagy we ajaýyp hakykaty ökdelik bilen wagyz etmegi öwrenýäris.