Patyşalygyň ýeňişleri — Hoş habary kanun taýdan wagyz etmek hukugyny gazanmak

SIZ öýden-öýe wagyz edip ýörkäňiz, bir maşyn gelip durýar-da, ondan polisiýa işgäri düşýär. Ol siziň ýanyňyza gelip: «Öýme-öý aýlanyp, wagyz edip ýören siziň ikiňiz dälmi? Siziň üstüňizden bize arz etdiler» diýýär. Şonda siz oňa hormat bilen jogap berip, özüňiziň Ýehowanyň Şaýatlarydygyňyzy aýdýarsyňyz. Soňra näme bolýar?

Bu, esasan, siziň ýurduňyzyň taryhyna bagly bolar. Geçen ýyllarda siziň ýurduňyzyň hökümeti Ýehowanyň Şaýatlaryna nähili garaýardy? Häzir siziň ýaşaýan ýeriňizde din azatlygy barmy? Eger bar bolsa, onda ençeme ýyllaryň dowamynda «hoş habary gorap, kanun taýdan wagyz etmek hukugyny gazanmaga» jan eden imandaşlaryňyz öwgä mynasyp (Flp. 1:7). Siz nirede ýaşasaňyz-da, Ýehowanyň Şaýatlarynyň kanun taýdan gazanan üstünlikleri barada bilseňiz, imanyňyzy berkidersiňiz. Biz şu bölümde olaryň käbirine serederis. Gazanylan ýeňişler Patyşalygyň, hakykatdanam, höküm sürýändigini subut edýär, çünki biz öz güýjümiz bilen şeýle köp üstünliklere ýetip bilmezdik!