Yshak 40 ýaşynda Rebeka atly owadan gyza öýlenýär. Ol aýalyny gowy görýärdi. Olaryň ekiz ogullary bolýar.

Olar uly ogluna Ysaw, kiçisine Ýakup diýip at dakýarlar. Ysaw awçydy, köplenç aw awlamaga gidýärdi. Ýakup bolsa öýde bolmagy gowy görýärdi, ol öý işlerini edýärdi.

Gadymy döwürde bir adam ölse, onuň köp ýeri we baýlygy iň uly ogluna berilýärdi. Şol zatlara miras diýilýär. Olary alýana bolsa mirasdüşer diýilýär. Ýadyňda bolsa, Ýehowa Ybraýyma: «Çagalaryňy köpelderin, olar arkaly ähli adamlara ýagşylyk ederin» diýipdi. Diýmek, Ýehowa ony Yshagyň uly ogly arkaly etmelidi. Ýöne Ysaw Ýehowanyň aýdanlary barada oýlanmaýardy. Ýakup bolsa Ýehowanyň beren sözi hakda hemişe oýlanýardy.

Bir gün Ysaw awdan ýadap gelýär. Ýakup şol wagt nahar bişirip otyrdy. Ysaw naharyň ysyny alyp: «Aç öldüm, gyzyl çorbaňdan guýup bersene» diýdi. Ýakup bolsa: «Kakamyň mirasyny maňa berseň, guýup bereýin» diýdi. Ysaw: «Kakamyň mirasam, hiç zadam gerek däl. Çaltrak nahar guýsa-na, aç ölüp barýan» diýdi. Ysaw dogry etdimi? Ýok, ol ýalňyşdy. Bir jam nahar üçin mirasdan geçdi.

Köp ýyl geçdi, Yshak garrady. Indi uly ogluna ak pata bermeli wagty geldi. Ýöne ak patany kiçi ogly Ýakup aldy. Oňa ejesi Rebeka kömek etdi. Ysawyň ak patany alyp bilmändigine gahary geldi. Şonuň üçin inisini öldürjek bolýardy. Yshak bilen Rebeka muny bilip, Ýakuby gaçyryp goýberdi. Olar: «Bar, oglum, doganyň köşeşýänçä Laban daýyňlarda ýaşa» diýdi. Ýakup hem ene-atasyna gulak asyp, daýylaryna gitdi.

Ýehowa Ybraýym bilen Yshagy goraýşy ýaly, Ýakuby hem gorady. Ýakup Haran şäherinde ýaşady. Şol ýerde öýlendi, köp çagalary boldy we baýady.

Bir gün Ýehowa Ýakuba: «Indi öýüňe git» diýýär. Ýakubam maşgalasy bilen öýüne tarap ýola düşýär. Ýolda barýarka: «Doganyň ýetip gelýär, ýanynda 400 adam bar» diýip habar berýärler. Ýakup: «Agam meni hem, çagalarymy hem öldürer» diýip gorkýar. Ol Ýehowa: «Meni doganymyň elinden halas et» diýip doga edýär. Ertesi gün Ýakup doganyna köp goýun, geçi, sygyr, düýe we eşek sowgat iberýär.

Şol gün agşam Ýakubyň ýeke özi otyrdy. Birdenem perişde peýda bolýar, ol Ýakup bilen göreşip başlaýar. Olar daň atýança göreşýärler. Perişde Ýakubyň aýagyny agyrdýar, ýöne ol şonda-da göreşýär. Perişde: «Goýber meni, gideýin» diýýär. Ýakup bolsa: «Ýok, ak pata berýänçäň goýbermerin» diýýär.

Şeýdip, perişde Ýakuba ak pata berýär. Şondan soň Ýakup Ýehowanyň Ysawdan gorajagyna ynandy.

Daň atanda, Ýakup Ysawyň 400 adam bilen gelýänini görýär. Ol doganynyň öňünden çykyp, ýedi gezek baş egýär. Ysaw hem ylgap gelip, inisini gujaklaýar. Olar bir-birini gujaklap aglaşýarlar. Şeýdip, iki dogan ýaraşýar. Ýehowa Ýakubyň dogany bilen ýaraşandygyna begendimi?

Şeýlelikde, hersi öz öýüne gitdi. Ýakubyň 12 ogly bardy. Olar Ruben, Şimgon, Lewi, Ýahuda, Dan, Naftaly, Gad, Aşer, Ysahar, Zebulun, Ýusup we Benýamin. Ýehowa Ýakubyň ogly Ýusup arkaly halkyny halas etdi. Ol hakda indiki sapaklarda aýdylýar.