Siriýanyň patyşasy Benhadat Ysraýyla birnäçe gezek çozýar. Alyşa pygamber her gezek onuň nirä çozjagyny Ysraýyl patyşasyna habar berýärdi. Patyşa hem şol ýere barmaýardy. Şonuň üçin Benhadatyň gahary gelýär. Ol Alyşany tutjak bolýar. Benhadat Alyşa pygamberiň Dotan şäherine barandygyny eşidýär. Ol goşunyny şol ýere iberýär.

Siriýa goşuny gije Dotan şäherine gelýär. Alyşanyň hyzmatkäri ir bilen turup, daşaryk çykýar. Görse, şäheriň daşynda uly goşun durdy. Ol gorkup: «Alyşa, indi näme ederis?» diýýär. Alyşa-da: «Gorkma, biziňkiler olardan has köp» diýýär. Şol wagt hyzmatkär daglaryň depesinde köp atlary we söweş arabalary görýär. Olar ot ýaly ýanyp durdy. Olary hyzmatkäre Ýehowa görkezdi.

Siriýa goşuny Alyşany tutmaga gelýär. Alyşa: «Ýehowa, olary kör et» diýip dileg edýär. Esgerleriň gözi görýärdi. Ýöne olar nirä gelendigine düşünmeýärdiler. Alyşa esgerlere: «Siz başga şähere geldiňiz. Gözleýän adamyňyz bärde ýok. Ýörüň, men sizi onuň ýanyna äkideýin» diýdi. Olar Alyşanyň yzyna düşüp gitdiler. Alyşa esgerleri Samariýa äkitdi. Ysraýyl patyşasy şol ýerde ýaşaýardy.

Siriýaly esgerler nirä gelendigine soň düşündiler. Ysraýylyň patyşasy Alyşa pygambere: «Olary öldüreýinmi?» diýýär. Alyşa olardan ar aldymy? Ýok. Ol patyşa: «Esgerleri öldürme, gaýtam iýip içir. Soňra öýüne goýber» diýdi. Şeýdip, patyşa olara saçak ýazdy, iýip-içirip öýüne goýberdi.

Izabeliň gyzy bardy, onuň ady Atalýa. Atalýa hem ejesi ýaly erbetdi. Ol Ýahudanyň patyşasyna durmuşa çykýar. Äri ölensoň, ogly patyşa bolýar. Ogly ölensoň, özi patyşa bolýar. Atalýa ýerine başga biriniň patyşa bolmagyny islemeýärdi. Şonuň üçin patyşanyň neslini, hatda agtygyny hem öldürjek bolýar. Hemmeler ondan gorkýardy.

Şol döwür baş ruhany bardy. Onuň ady Ýehoýada. Aýalynyň ady bolsa Ýehoşeba. Olar Atalýanyň erbetdigini bilýärdi. Şonuň üçin Ýehoýaşy gizleýärler. Ýehoýaş Atalýanyň agtygydy. Atalýa olaryň Ýehoýaşy gizländigini bilse öldürerdi. Baş ruhany bilen aýaly Ýehoýaşy ybadathanada ulaldýar.

Ýehoýaş ýedi ýaşaýar. Bir gün Ýehoýada baştutanlary we lewileri ýygnaýar. Olara: «Ybadathananyň gapysyny garawullaň. Hiç kimi salmaň» diýýär. Soňra ol Ýehoýaşyň başyna täç geýdirýär. Ony Ýahudanyň patyşasy belleýär. Ýahuda halky: «Ýaşasyn patyşa!» diýip gygyrýar.

Şa aýaly Atalýa goh-galmagaly eşidýär. Ylgap ybadathana barýar. Ol ýerde täze patyşany görýär. Soňra: «Aldawçylar! Aldawçylar!» diýip gygyrýar. Ýüzbaşylar ony derrew tutup äkidýärler, soňra öldürýärler. Atalýa adamlara nähili erbet işleri etdirdi?

Ýehoýada halka Ýehowa dolanmaga kömek etdi. Halk: «Diňe Ýehowa sežde ederis» diýip söz berdi. Halk Ýehoýadany diňläp, Bagalyň buthanasyny ýumurdy. Butlaryny bölek-bölek etdi. Ol ruhanylary we lewileri ybadathanada gulluk etmäge belledi. Halk ol ýerde ýene Ýehowa sežde edip bilýärdi. Şeýle-de Ýehoýada ybadathananyň agzynda garawullary goýdy. Indi ol ýere erbet adamlar girip bilmeýärdi. Soňra Ýehoýada bilen ýüzbaşylar Ýehoýaşy köşge getirdiler. Ony tagtda oturtdylar. Ýahudanyň adamlary begendiler. Halk indi Ýehowa arkaýyn sežde edip bilýärdi, sebäbi Atalýa öldi, Bagal butlaram ýok edildi. Şeýlelikde, Ýehoýada hiç zatdan gorkman, köp adamlara kömek edip bildi.