Ilkinji erkek we aýal

BU SURATYŇ öňdäki suratdan näme tapawudy bar? Dogry, bu suratda adamlar bar. Bu ilkinji erkek we aýal. Olary kim ýaratdyka? Hudaý. Hudaýyň adyny bilýäňmi? Onuň ady Ýehowa. Erkek adam bilen aýala bolsa, Adam ata hem-de How ene diýen at dakyldy.

Ýehowa Hudaý Adam atany, ine, şeýle ýaratdy. Hudaý ýerden toprak alyp, kämil ynsan bedenini ýasady. Soňra Adam atanyň burnuna üfledi, ol hem diri jan boldy.

Ýehowa Hudaý Adam ata ýumuş buýurdy. Ol ähli haýwanlara at dakmalydy. Laýyk gelýän ady saýlamak üçin, Adam ata olara köp syn eden bolmaly. Emma haýwanlara at dakyp ýörkä, bir zada üns berdi. Nämä üns berenini bilýäňmi?

Ähli haýwanlar jübüt-jübüt bolup ýaşaýardy. Bu ýerde ata piller hem ene piller, ata ýolbarslar hem-de ene ýolbarslar bardy. Diňe Adam atanyň taýy ýokdy. Şonda Ýehowa Adam atany güýçli uka gidirip, onuň bir gapyrgasyny aldy. Onsoň gapyrgadan aýal ýasady, ol hem Adam atanyň aýaly boldy.

Adam ata indi, gör, nähili bagtly bolandyr! Göz öňüne getirip gör! Ajaýyp bagda ýaşaýandygy üçin, How ene özüni nähili bagtly duýan bolsa gerek! Indi olaryň çagalary bolup, bagtly ýaşap bilerdiler.

Ýehowa Adam ata bilen How enäniň baky ýaşap, bütin ýer ýüzüni Erem bagyna öwürmegini isledi. Adam ata bilen How ene etjek işlerini göz öňüne getirip, özlerini, gör, nähili bagtly duýandyr! Ýer ýüzüni ajaýyp baga öwürmäge seniňem gatnaşasyň gelermidi? Emma Adam ata bilen How enäniň bagty uzaga çekmedi. Gel, sebäbini bileli.