Sen Ýehowanyň Şaýatlary bilen Mukaddes Kitaby öwrenip, hakykaty bildiň. Elbetde, öwrenen zatlaryň saňa Ýehowa bilen dostlaşmaga kömek edendir we gelejekde Jennetde ebedi ýaşajakdygyňa umyt berendir. Hudaýyň Sözüne bolan imanyň has-da berkändir. Şeýle-de ýygnakdaky dogan-uýalar bilen dostlaşyp, köp bereketleri alansyň. Ýehowanyň gullukçylaryny goldaýandygyny görüp, diýseň begenýänsiň (Zek. 8:23).

Sen suwa çümdürilmäge taýýarlanýansyň. Şonuň üçin ýygnak ýaşululary bilen gürrüňdeşlikde mesihçileriň ynançlaryna has-da gowy düşünip bilersiň (Ýew. 6:1—3). Goý, Ýehowa seniň Mukaddes Kitapdan bilim almak üçin edýän tagallaňa ak patasyny bersin we ebedi ýaşaýşa ýetirsin! (Ýah. 17:3).

1. Sen näme üçin suwa çümdürilmek isleýärsiň?

2. Ýehowa kim?

• «Ýerde-gökde ýeke-täk hak Hudaý Ýehowadyr. Ondan başga Hudaý ýokdur» (5 Mus. 4:39).

• «Goý, älem-jahan seniň adyň Ýehowadygyny bilsin, diňe seniň Allatagaladygyňa düşünsin» (Zeb. 83:18).

3. Hudaýyň adyny tutmak näme üçin wajyp?

• «Siz şeýle doga ediň: „Eý gökdäki Atamyz, adyň mukaddes bolsun!“» (Mat. 6:9).

• «Ýehowanyň adyny çagyran her bir adam halas bolar» (Rim. 10:13).

4. Mukaddes Kitapda Ýehowa nähili suratlandyrylýar?

• «Ýehowa ýer ýüzüniň Ýaradyjysy, ebedilik Hudaý» (Işa. 40:28).

• «Eý gökdäki Atamyz» (Mat. 6:9).

• «Hudaý söýgüdir» (1 Ýah 4:8).

5. Sen Ýehowa Hudaýa näme berip bilersiň?

• «Ýehowa Hudaýyňy bütin ýüregiň, bütin janyň, bütin aň-düşünjäň we bütin güýjüň bilen söý» (Mar. 12:30).

• «Ýehowa Hudaýyňa sežde etmeli, diňe oňa gulluk etmeli» (Luka 4:8).

6. Näme üçin Ýehowa wepaly bolasyň gelýär?

• «Oglum, paýhasly bol, ýüregimi şatlandyr, şonda men töhmet atýana jogap berip bilerin» (Nak. 27:11).

7. Sen kime doga etmeli? Kimiň ady bilen doga etmeli?

• «Size hakykaty aýdýaryn, meniň adym bilen Atamdan näme dileseňiz, ol size berer» (Ýah. 16:23).

8. Näme hakda doga edip bilersiň?

• «Siz şeýle doga ediň: „Eý gökdäki Atamyz, adyň mukaddes bolsun! Patyşalygyň gelsin, gökde bolşy ýaly, ýerde-de islegiň amala aşsyn! Her günki çöregimizi ýetirip dur. Adamlaryň günäsini bagyşlaýşymyz ýaly, sen hem biziň günälerimizi bagyşla. Bize synaga düşmäge ýol berme, Şeýtanyň elinden halas et“» (Mat. 6:9—13).

• «Hudaýa arkaýyn ýüzlenip bilýäris, sebäbi islegine görä näme dilesek, ol hökman eşider» (1 Ýah. 5:14).

9. Ýehowa nähili adamlaryň dogasyny diňlemeýär?

• «Şol gün Ýehowadan kömek sorarsyňyz, emma ol jogap bermez... sebäbi siz erbet işleri edýärsiňiz» (Mik. 3:4).

• «Ýehowa dogruçyllara nazar salýar, olaryň ýalbaryp edýän dogalaryny eşidýär. Ýehowa erbetlerden ýüzüni sowýar» (1 Pet. 3:12).

10. Isa Mesih kim?

• «Simun Petrus: „Sen Biribaryň Ogly, Mesih!“ diýip jogap berdi» (Mat. 16:16).

11. Isa näme üçin ýer ýüzüne geldi?

• «Ynsan ogly-da özüne hyzmat etdirmek üçin däl, hyzmat etmek we köpleriň ugrunda janyny töleg hökmünde bermek üçin geldi» (Mat. 20:28).

• «Men Hudaýyň Patyşalygy baradaky hoş habary başga şäherlerde-de wagyz etmeli, sebäbi men şonuň üçin geldim» (Luka 4:43).

12. Isanyň töleg gurbanyna nädip minnetdar bolup bilersiň?

• «Adamlar indi özleri üçin däl-de, olaryň hatyrasyna ölüp, soňra direlen üçin ýaşamaly, sebäbi ol hemmeler üçin öldi» (2 Kor. 5:15).

13. Isanyň nähili ygtyýary bar?

• «Gökde we ýerde ähli ygtyýar maňa berildi» (Mat. 28:18).

• «Hudaý ony has-da beýgeldip, ähli atlardan iň beýik ady berdi» (Flp. 2:9).

14. Ýehowanyň Şaýatlarynyň Ýolbaşçylyk maslahatyny Isa Mesihiň «wepaly hem paýhasly hyzmatkär» edip belländigine ynanýarsyňmy?

• «Hojaýynyň öýdäki hyzmatkärlerine wagtly-wagtynda nahar paýlaryny bermek üçin bellän wepaly hem paýhasly hyzmatkäri kim?» (Mat. 24:45).

15. Mukaddes ruh näme?

• «Seniň üstüňe mukaddes ruh iner, seni Allatagalanyň güýji gorar. Dünýä injek çaga mukaddes bolar, oňa Hudaýyň Ogly diýerler» (Luka 1:35).

• «Eger siz erbet adam bolup, çagalaryňyza gowy zatlary berýän bolsaňyz, onda gökdäki Ataňyz dileýänlere mukaddes ruhuny bermezmi näme?» (Luka 11:13).

16. Ýehowa mukaddes ruhy arkaly nähili işleri edýär?

• «Asman Ýehowanyň sözi bilen ýaradylandyr, asman jisimleri demi bilen dörändir» (Zeb. 33:6).

• «Siziň üstüňize mukaddes ruh inende, güýjüňize güýç goşulyp... bütin ýer ýüzünde men hakda wagyz edersiňiz» (Res. 1:8).

• «Mukaddes kitaplardaky hiç bir pygamberlik adamyň pikirine esaslanyp ýazylmady. Adamlar pygamberligi hiç haçan öz-özünden aýtmandylar. Olar Hudaýyň mukaddes ruhunyň kömegi bilen pygamberlik edýärdiler» (2 Pet. 1:20, 21).

17. Hudaýyň Patyşalygy näme?

• «Gögüň Hudaýy hiç haçan ýok edilmejek bir patyşalygy döreder. Ol patyşalyk başga halkyň eline geçmez. Ol ähli patyşalyklary ýok eder, özi bolsa ebedi durar» (Dan. 2:44).

18. Hudaý Patyşalygy arkaly seniň üçin näme eder?

• «Hudaý olaryň gözlerinden ýaşlaryny süpürer. Indi ne ölüm, ne hasrat, ne agy, ne-de agyry bolar, sebäbi öňki zatlar geçip gitdi» (Ylh. 21:4).

19. Tizden Hudaýyň Patyşalygy arkaly bereket berjekdigine näme üçin ynanýarsyň?

• «Şägirtleri ýanyna gelip: „Aýdan zatlaryň haçan bolar? Seniň gelendigiňi we dünýäniň soňuny haýsy alamatdan bilse bolar?“ diýip soradylar. Isa şeýle jogap berdi... „millet millete, patyşalyk patyşalyga garşy çykar, käbir ýerlerde açlyk we ýertitremeler bolar. Patyşalyk baradaky hoş habar bütin ýer ýüzünde ähli milletlere wagyz ediler, soňra dünýäniň soňy geler“» (Mat. 24:3, 4, 7, 14).

• «Soňky günlerde juda kyn döwür bolar. Sebäbi adamlar özüni bilýän, pula gyzan, öwünjeň, tekepbir, Hudaýa dil ýetirýän, ene-atasyna gulak asmaýan, gadyr bilmez, biwepa, dogan-garyndaşlaryny söýmeýän, eglişik etmeýän, töhmet atýan, özüne erk etmeýän, zalym, ýagşylygy ýigrenýän, dönük, özdiýenli, ulumsy, Hudaýy däl-de, keýpi-sapany söýýän, Hudaýyň ýolunda ýörän bolup, şoňa görä ýaşamaýan adamlar bolar» (2 Tim. 3:1—5).

20. Hudaýyň Patyşalygyny birinji orunda goýýandygyňy nädip görkezip bilersiň?

• «Hudaýyň Patyşalygyny we adalatly kanunlaryny hemişe birinji orunda goýuň» (Mat. 6:33).

• «Isa şägirtlerine: „Kim meniň yzyma eýermek islese, özünden geçsin-de, jebir pürsüni alyp, hemişe yzyma düşsün“ diýdi» (Mat. 16:24).

21. Şeýtan we jynlar kim?

• «Siziň ataňyz Iblis... ol owal-başdan ganhordy» (Ýah. 8:44).

• «Iblis we Şeýtan diýip atlandyrylýan köne ýylan, bütin ýer ýüzünde ýaşaýanlary aldaýan uly aždarha perişdeleri bilen ýere zyňyldy» (Ylh. 12:9).

22. Şeýtan Ýehowa we oňa sežde edýän adamlara näme töhmet atdy?

• «Aýal ýylana şeýle jogap berdi: „Bagdaky agaçlaryň miwesinden iýip bilýäris. Diňe bagyň ortasyndaky agaçdan iýmeli däl. Sebäbi Hudaý: „Ondan iýmäň, eliňizi-de degirmäň, ýogsam ölersiňiz“ diýdi“. Ýylan bolsa: „Ýok, ýok, ölmersiňiz. Aslynda, Hudaý şol agaçdan iýen günüňiz gözüňiziň açyljakdygyny we ýagşy-ýamany saýgaryp, Hudaý ýaly boljakdygyňyzy bilýär“ diýdi» (1 Mus. 3:2—5).

• «Şeýtan Ýehowa: „Adam şirin jany üçin ähli zadyndan geçer“ diýdi» (Eýp. 2:4).

23. Şeýtanyň ýalançydygyny nädip subut edip bilersiň?

• «Ýehowa... bütin ýüregiňiz, bütin janyňyz bilen gulluk ediň» (5 Mus. 10:12).

• «Soňky demime çenli wepaly bolaryn!» (Eýp. 27:5).

24. Adamlar näme üçin ölýär?

• «Bir adam arkaly günä we günä arkaly ölüm peýda boldy. Ölüm hem ähli adamlara geçdi, sebäbi hemmeler günä etdi» (Rim. 5:12).

25. Adam ölensoň näme bolýar?

• «Diriler öljegini bilýär, ölüler bolsa hiç zat bilmeýär» (Nes. 9:5).

26. Ölen adamlar direlermi?

• «Hudaýyň dogruçyllary hem-de erbetleri direltmegine sabyrly garaşýaryn» (Res. 24:15).

27. Isa bilen gökde näçe adam höküm sürer?

• «Görsem, Sion dagynda Guzy we onuň ýanynda 144 000 adam durdy. Olaryň maňlaýynda Guzynyň we onuň Atasynyň ady ýazylgydy» (Ylh. 14:1).

Sen Mukaddes Kitapdan okuw geçip, Ýehowanyň niýetine, islegine düşünensiň we Onuň kada-kanunlaryna eýermegi öwrenensiň. Sen durmuşyňy we oňa bolan garaýşyňy bütinleý üýtgedensiň. Indi bolsa Ýehowanyň kada-kanunlary boýunça ýaşamagy ýüregiňe düwüp, oňa gulluk etmäge taýynsyň.

Şu bölümdäki soraglar Ýehowanyň kada-kanunlaryny we Hudaýy razy edýän mesihçi bolar ýaly nämeleri edip biljekdigiňi ýadyňa salar. Şeýle-de hemme zady Ýehowany şöhratlandyrmak üçin we päk ynsap bilen etmegiň wajypdygyna düşünmäge kömek eder (2 Kor. 1:12; 1 Tim. 1:19; 1 Pet. 3:16, 21).

Sen Ýehowanyň hökümdarlygyna höwes bilen tabyn bolup, onuň guramasynyň agzasy bolmak isleýänsiň. Şu bölümdäki soraglar we aýatlar saňa ýygnakda, maşgalada we döwletiň kanunlaryna tabyn bolmak meselesinde Ýehowanyň ýola goýan tertip-düzgünine dogry düşünýändigiňi anyklamaga kömek eder. Şeýle-de Ýehowanyň gullukçylaryna tälim berip, ruhy taýdan berkidýändigine minnetdarlygyňy has-da artdyrar. Öwrenen zatlaryň ýygnaklara yzygiderli baryp, yhlasly gatnaşmaga höweslendirer.

Şu bölümde hoş habary yzygiderli wagyz etmegiň, adamlara Ýehowany tanatmagyň we onuň edýän ýagşylyklary barada öwretmegiň wajypdygyny bileris (Mat. 24:14; 28:19, 20). Esasanam, özüňi Ýehowa bagyş edip, suwa çümdürilmegiň wajyp ädimdigine düşünmäge kömek eder. Ýehowa seni söýýär, sebäbi sen onuň ýagşylygynyň gadyryny bilýärsiň.

1. Mesihçilerden maşgala gurmak babatda näme talap edilýär? Mukaddes Kitaba görä, är-aýal diňe haýsy sebäbe görä aýrylyşyp bilýär?

• «Hudaýyň ilkibaşda erkegi we aýaly ýaradandygyny okamadyňyzmy? Ýa-da onuň: „Erkek adam ene-atasyny goýup, aýaly bilen biriger we ikisi bir beden bolar“ diýenini okamadyňyzmy? Olar iki däl, bir beden. Şeýlelikde, Hudaýyň goşanyny ynsan aýyrmasyn... biri zyna etmedik aýaly bilen aýrylyşyp, başga birine öýlense, zyna edýändir» (Mat. 19:4—6, 9).

2. Näme üçin nikany kanun taýdan resmileşdirmeli? Eger maşgala guran bolsaň, nikaňy kanun taýdan resmileşdirdiňmi?

• «Olara hökümetlere we häkimiýetlere tabyn bolup, gulak asmagy, her bir oňat işe taýýar bolmagy ýatladyp dur» (Tit. 3:1).

• «Goý, hemmeler maşgala ojagyna hormat goýsun, är-aýal bir-birine ikilik etmesin, sebäbi Hudaý ahlaksyzlyk we zyna edýänleri höküm eder» (Ýew. 13:4).

3. Seniň maşgaladaky borjuň näme?

• «Oglum, ataň terbiýesini kabul et, eneň öwüt-ündewini unutma» (Nak. 1:8).

• «Mesihiň ýygnagyň... başy bolşy ýaly, är hem aýalyň başydyr. Mesihiň ýygnagy söýşi... ýaly, ärler, siz hem aýalyňyzy elmydama söýüň!» (Efes. 5:23, 25).

• «Atalar, çagalaryňyzy gaharlandyrmaň, gaýtam olary Ýehowanyň terbiýesi we öwüt-ündewi bilen ulaldyň» (Efes. 6:4).

• «Çagalar, ene-ataňyza hemişe gulak asyň, sebäbi muny Halypamyz halaýandyr» (Kol. 3:20).

• «Aýallar, siz hem äriňize tabyn boluň» (1 Pet. 3:1).

4. Biz näme üçin ýaşaýşyň gadyryny bilmeli?

• «(Hudaý) adamlara ýaşaýşy, demi we ähli zady özi berýär... biz ol arkaly ýaşaýarys, hereket edýäris we bardyrys» (Res. 17:25, 28).

5. Biz näme üçin hiç kimi, hatda dünýä inmedik çagany hem öldürmeli däl?

• «Iki adam urşup durka, olaryň biri tötänlikde göwreli aýaly ursa... aýal ýa-da çagasy ölse, onda jan ýerine jan almaly» (2 Mus. 21:22, 23).

• «Ejemiň içinde düwünçekkäm, meni görüpdiň. Beden agzalarym peýda bolmanka, olaryň ählisi hakda, emele geljek günleri barada seniň kitabyňda ýazylandyr» (Zeb. 139:16).

• «Ýehowa alty zady ýigrenýär... bigünä gany dökýän elleri» (Nak. 6:16, 17).

6. Hudaý gan barada nähili tabşyryk berdi?

• «Gandan, haram ölen haýwanlaryň etinden... gaça duruň» (Res. 15:29).

7. Biz näme üçin dogan-uýalary söýmeli?

• «Size täze tabşyryk berýärin: biri-biriňizi söýüň, meniň sizi söýşüm ýaly, siz hem biri-biriňizi söýüň. Biri-biriňizi söýseňiz, siziň meniň şägirdimdigiňizi hemmeler biler» (Ýah. 13:34, 35).

8. a) Ýokanç keselli adam näme üçin gujaklaşyp ýa-da ogşaşyp salamlaşmaly däl? b) Myhmançylyga çagyrmasalar näme üçin öýkelemeli däl? ç) Mesihçi özünde ýokanç keseli bardyr ýa-da ýokanç keseli geçendir öýdýän bolsa, maşgala gurmak üçin duşuşyp başlamazdan öň näme üçin ganyny barlatmaly? d) Ýokanç keselli adam suwa çümdürilmezden öň, ýagdaýy hakda näme üçin ýaşulular maslahatynyň koordinatoryna habar bermeli?

• «Siz bir-biriňizi söýmekden başga hiç zatda bergili bolmaň... „ýakynyňy özüňi söýşüň ýaly söý“... söýýän adam ýakynyna ýamanlyk edýän däldir» (Rim. 13:8—10).

• «Diňe öz peýdaňyzy däl-de, başgalaryň hem peýdasyny gözläň» (Flp. 2:4).

9. Ýehowa näme üçin birek-biregi bagyşlamagymyzy isleýär?

• «Biriniň başga birinden öýkelemäge sebäbi bolsa-da, sabyrly bolup, bir-biriňizi ýürekden bagyşlaň. Ýehowanyň sizi ýürekden bagyşlaýşy ýaly, siz hem biri-biriňizi ýürekden bagyşlamaly» (Kol. 3:13).

10. Eger imandaşyň töhmet atsa ýa-da hilegärlik etse näme etmeli?

• «Eger doganyň saňa garşy günä etse, ikiçäk gepleşip, eden günäsini aýt. Seni diňlese, dogry ýola dolanmaga kömek edersiň. Eger diňlemese, ýanyňa bir ýa-da iki şaýat alyp bar, sebäbi her bir mesele iki ýa üç şaýadyň sözi bilen tassyklanýandyr. Eger olary-da diňlemese, ýygnaga aýt. Eger ýygnagy-da diňlemese, ol seniň üçin keseki ýa-da salgytçy adam ýaly bolsun» (Mat. 18:15—17).

11. Ýehowa aşakdaky günälere nähili garaýar?

▪ Ahlaksyzlyk

▪ Şekillere sygynmak

▪ Gomoseksualizm

▪ Ogurlyk

▪ Humarly oýunlar

▪ Serhoşlyk

• «Özüňizi aldamaň. Ahlaksyzlar, butparazlar, zyna edýänler, azgyn erkekler, beçebazlar, ogrular, açgözler, arakhorlar, sögýänler we talaňçylar Hudaýyň Patyşalygyny miras almazlar» (1 Kor. 6:9, 10).

12. Ýanýoldaşyň bolmadyk adam bilen jynsy gatnaşyk etmek we ahlaksyzlygyň dürli görnüşleri bilen meşgullanmak ýaly meselelerde näme etmegi ýüregiňe düwdüň?

• «Ahlaksyzlykdan gaçyň!» (1 Kor. 6:18).

13. Näme üçin neşe serişdeleri ýa-da dermanlary keýp üçin ulanmaly däl?

• «Bedeniňizi diri, mukaddes we Hudaýa ýaraýan gurban hökmünde hödürlemegi haýyş edýärin. Şonda akyl-paýhasly bolup, mukaddes gullugy berjaý edip bilersiňiz. Mundan beýläk şu dünýäniň täsirine düşmäň. Hudaýyň ýagşy, halaýan we kämil isleginiň nämedigine düşünip, pikiriňizi we häsiýetiňizi üýtgediň» (Rim. 12:1, 2).

14. Ýehowa jynlar bilen bagly haýsy işleri gadagan edýär?

• «Hiç kim... palçylyk, jadygöýlik, täleýe garamak, porhançylyk bilen meşgullanmasyn. Araňyzda adamlary dogalaýan, jadygöýe ýa bilgije ýüz tutýan, ölüleri çagyrýan adam hem bolmasyn» (5 Mus. 18:10, 11).

15. Agyr günä eden adam Ýehowa bilen dostlugyny dikeltmek üçin näme etmeli?

• «Günälerimi boýun aldym, olaryň hiç birini gizlemedim. „Ýehowanyň öňünde günämi boýun alaýyn“ diýdim» (Zeb. 32:5).

• «Araňyzda biri syrkawmy? Goý, ol ýygnak ýaşulularyny çagyrsyn. Olar doga edip, Ýehowanyň adyndan syrkawyň başyna ýag çalsynlar. Iman bilen doga edilse, syrkawy sagaldyp bolar, Ýehowa hem syrkawy aýak üstüne galdyrar. Eger günä eden bolsa, günäsi geçiler» (Ýak. 5:14, 15).

16. Dogan-uýalardan biriniň agyr günä edendigini bilseň näme etmeli?

• «Kimde-kim biriniň günä edendigini görse ýa bilse, şaýatlyk etmäge çagyrylsa-da, hiç zat aýtmasa, ol günä edýändir. Munuň üçin jogap bermeli bolar» (3 Mus. 5:1).

17. Mundan beýläk Ýehowanyň Şaýady hasaplanmaýan adam bilen özümizi nähili alyp barmaly?

• «Indi size şuny ýazýaryn: dogan ahlaksyz, açgöz, butparaz, arakhor, talaňçy ýa-da sögýän bolsa, onuň bilen gatnaşmaň, hatda bir saçak başynda-da oturmaň» (1 Kor. 5:11).

• «Eger biri ýanyňyza gelip, şol taglymata görä öwretmese, ony öýüňize salmaň, salam hem bermäň» (2 Ýah. 10).

18. Näme üçin Ýehowany söýýän adamlar bilen dostlaşmaly?

• «Paýhasly adam bilen dost bolsaň, paýhasly bolarsyň, akmak bilen dost bolsaň, zyýan çekersiň» (Nak. 13:20).

• «Aldanmaň! Erbetler bilen gatnaşmak gowy häsiýetleri bozýandyr» (1 Kor. 15:33).

19. Ýehowanyň Şaýatlary näme üçin syýasata goşulmaýar?

• «Meniň dünýäden bolmaýşym ýaly, olar hem dünýäden däl» (Ýah. 17:16).

20. Näme üçin häkimiýete tabyn bolmaly?

• «Her bir adam ýokary häkimiýetlere tabyn bolmaly, sebäbi Hudaýdan birugsat häkimiýet ýokdur, olaryň höküm sürmegine Hudaý rugsat berendir» (Rim. 13:1).

21. Eger döwletiň kanuny Hudaýyň kanunyna garşy gelse kime gulak asarsyň?

• «Biz adamlara däl-de, Hökümdar Hudaýymyza gulak asmaly» (Res. 5:29).

22. Işe girjek bolanyňda syýasata, dine goşulmazlyga haýsy aýatlar kömek eder?

• «Millet millete garşy gylyç galdyrmaz, indi söweşmegi öwrenmezler» (Mik. 4:3).

• «Eý halkym, onuň (beýik Wawilonyň) günälerine şärik bolmaz ýaly, başyna injek belalara uçramaz ýaly, ol ýerden çykyň!» (Ylh. 18:4).

23. Dynç aljak bolanyňda nämäni göz öňünde tutmaly?

• «Ýehowa... zorlugy söýýäni ýigrenýär» (Zeb. 11:5).

• «Erbetligi ýigrenip, ýagşylyga ýapyşyň» (Rim. 12:9).

• «Diňe hakyky, wajyp, dogry, päk, söýgä höweslendirýän, ýagşy, öwgä we şöhrata mynasyp zatlar hakda oýlanyň» (Flp. 4:8).

24. Ýehowanyň Şaýatlary näme üçin başga diniň däp-dessurlaryny berjaý etmeýärler?

• «Siz... hem „Ýehowanyň saçagyndan“, hem jynlaryň saçagyndan iýip bilmersiňiz» (1 Kor. 10:21).

• «Ýehowa şeýle diýýär: „Olaryň arasyndan çykyň, olardan aýrylyň. Haram zada el degirmäň!“, „şonda men sizi kabul ederin“» (2 Kor. 6:17).

25. Baýramçylyklara gatnaşmak meselesinde dogry karara gelmäge haýsy prinsipler kömek eder?

• «Milletleriň arasyna garyşyp gitdiler, olaryň däp-dessurlaryny berjaý etdiler. Olaryň butlaryna sežde etdiler, eden işleri olara duzak boldy» (Zeb. 106:35, 36).

• «Ölüler bolsa hiç zat bilmeýär» (Nes. 9:5).

• «Meniň dünýäden bolmaýşym ýaly, olar hem dünýäden däl» (Ýah. 17:16).

• «Siziň öň haýasyz işler, ahlaksyz höwesler, serhoşlyk, keýpi-sapaly oturylyşyklar, içhä-içişlik, ýigrenji butparazlyk bilen meşgullanyp, şu dünýäniň islegine görä ýaşanyňyz ýeterlikdir» (1 Pet. 4:3).

26. Doglan günleri bellemegiň Ýehowa ýaramaýandygyny Mukaddes Kitapdaky haýsy wakalardan bilýärsiň?

• «Üç günden faraon doglan gününi belläp, emeldarlary üçin meýlis gurnady. Ol baş şerapçy bilen baş çörekçini zyndandan çykaryp, emeldarlarynyň öňüne getirtdi. Faraon baş şerapçyny öňki wezipesine belledi... Baş çörekçini bolsa pürsden asdyrdy» (1 Mus. 40:20—22).

• «Bir gezek Hirodesiň doglan gününde Hirodiýanyň gyzy myhmanlaryň öňünde tans edip, Hirodesiň göwnünden turdy. Şonda Hirodes gyza islän zadyňy bererin diýip ant içdi. Gyz bolsa ejesiniň gepine gidip: „Suwa çümdürýän Ýahýanyň kellesini tabakda getirip ber“ diýdi. Ol türmä adam iberip, Ýahýanyň kellesini kesdirdi» (Mat. 14:6—8, 10).

27. Ýaşulularyň görkezmesine näme üçin eýermek isleýärsiň?

• «Ýolbaşçylyk edýän doganlara gulak asyň we tabyn boluň. Olar gije-gündiz aladaňyzy edýärler, sebäbi munuň üçin Hudaýyň öňünde hasabat bererler. Olara borjuny ahy-nala bilen däl-de, şatlyk bilen ýerine ýetirmäge kömek ediň, ýogsam size zyýan ýeter» (Ýew. 13:17).

28. Mukaddes Kitaby yzygider öwrenmegiň özüňe we maşgalaňa nähili peýdasy bar?

• «Ol Ýehowanyň kanunyny ýürekden söýýär. Gije-gündiz Hudaýyň kanuny hakda oýlanýar. Ol akar suwuň ýakasynda ekilen, miwesini möwsüminde berýän, ýapragy solmaýan agaç ýaly bolar. Ähli işinde üstünlik gazanar» (Zeb. 1:2, 3).

29. Sen näme üçin ýygnaklara gatnaşmagy we jogap bermegi gowy görýärsiň?

• «Adyňy doganlaryma aýdaryn, ýygnakda seni wasp ederin» (Zeb. 22:22).

• «Geliň, biri-birimize ünsli bolup, birek-biregi söýmäge we ýagşy işleri etmäge höweslendireliň. Käbirleri ýaly ýygnaklardan galmagy endik edinmäliň, gaýtam ol günüň golaýlaşýandygyny görüp, biri-birimizi has-da ruhlandyralyň» (Ýew. 10:24, 25).

30. Isa nähili ýumuş tabşyrdy?

• «Şonuň üçin gidiň-de, ähli halklardan şägirt taýýarlaň. Olary... suwa çümdüriň. Olara ähli tabşyryklarymy berjaý etmegi öwrediň» (Mat. 28:19, 20).

31. Nähili niýet bilen pul sadakasyny bersek ýa-da dogan-uýalara kömek etsek Ýehowa begener?

• «Ýehowany sylap, mal-mülküňden... sadaka ber» (Nak. 3:9).

• «Goý, her kim göwünli-göwünsiz ýa-da mejburlyk bilen däl-de, göwnünden çykaran zadyny bersin, sebäbi Hudaý şatlyk bilen berýän adamy söýýändir» (2 Kor. 9:7).

32. Mesihçiler nähili kynçylyklara duş gelip biler?

• «Dogruçyllyk üçin yzarlanýan adamlar bagtlydyr, sebäbi gökdäki Patyşalyk olaryňkydyr. Meniň adym üçin size sögenlerinde, yzarlanlarynda, her hili ýalan we erbet sözleri aýdanlarynda bagtlysyňyz. Şatlanyň, begeniň, sebäbi gökdäki sylagyňyz uludyr. Sizden öň ýaşan pygamberler-de şeýle yzarlandylar» (Mat. 5:10—12).

33. Suwa çümdürilip, Ýehowanyň Şaýady bolmak näme üçin uly hormat?

• «Sözüň maňa şatlyk berdi, ýüregim begençden doldy... Ýehowa, men seniň adyňy göterýärin» (Ýer. 15:16).

Ýehowanyň Şaýatlarynyň etrap hem-de welaýat kongreslerinde wagyzçylary suwa çümdürýärler. Şonda suwa çümdürilýänler üçin ýörite nutuk bolýar we nutukçy dogan soňunda suwa çümdüriljeklere iki soraga sesli jogap bermegi haýyş edýär.

1. Günäleriňe toba edip, özüňi Ýehowa bagyş etdiňmi we Hudaýyň Isa Mesih arkaly halas edýändigine ynanýarsyňmy?

2. Suwa çümdürilip Ýehowanyň Şaýady bolýandygyňa we guramasyna goşulýandygyňa düşünýärsiňmi?

Suwa çümdüriljekler soraglara ynamly jogap berip, töleg gurbanyna iman edýändigini we özüni Ýehowa ýürekden bagyş edendigini köpçüligiň öňünde aýdýarlar (Rim. 10:9, 10). Şonuň üçin olar doga edip, soraglaryň üstünde oýlansalar, ynamly jogap berip bilerler.

Sen diňe Ýehowa gulluk etjekdigiňi we islegini birinji orunda goýjakdygyňy söz berip, özüňi oňa bagyş etdiňmi?

Sen, dogrudanam, suwa çümdürilmäge taýynmy?

Suwa çümdürileniňde nähili geýinmeli? (1 Tim. 2:9, 10; Ýah. 15:19; Flp. 1:10).

Suwa çümdüriljekler arassa, «salykatly geýnip», Hudaýy sylaýandyklaryny görkezmeli. Olar mesihçilere ýaraşmaýan eşikleri geýmeli däl. Meselem, çendenaşa açyk, ýuka, dar, ýazgyly ýa-da suratly eşikler. Olar arassa, salykatly, göze ýakymly we ýerlikli geýinmeli.

Suwa çümdürileniňde özüňi nähili alyp barmaly? (Luka 3:21, 22).

Isa suwa çümdürilende mesihçilere gowy görelde görkezdi. Ol suwa çümdürilende özüni Hudaýa bagyş edýändigine gowy düşünýärdi, şonuň üçin hem gelşiksiz hereketleri etmedi. Şu günlerem suwa çümdürilýän adam özüni kime bagyş edýändigini unutmaly däl. Ol suwa çümdürilýän ýerde oýun edip, suwda ýüzüp ýa-da özüni uly ýeňiş gazanan ýaly alyp barmaly däl. Elbetde, suwa çümdürilýän günümiz şatlanmaly, ýöne gelşiksiz hereketleri etmeli däl.

Ýygnaklara yzygider baryp guramadan daşlaşmasaň, Ýehowa beren sözüňde durmaga nädip kömek eder?

Suwa çümdürileniňden soňam näme üçin şahsy okuwyny geçirmeli we yhlasly wagyz etmeli?