Günä näme?
Mukaddes Kitabyň jogaby
Günä — bu Hudaýyň kadalaryna garşy gelýän islendik hereketi, duýgyny we pikiri aňladýar. Şeýle-de Hudaýyň nazarynda nädogry iş edip, onuň kanunyny bozmakdyr (1 Ýahýa 3:4; 5:17). Mundan başga-da Mukaddes Kitapda «ýagşylyk etmelidigini bilip-de, ony etmeýän adamyň günä edýändigi» aýdylýar (Ýakup 4:17).
Mukaddes Kitabyň asyl nusgasynda «günä» sözüniň manysy «sowa geçmek» ýa-da «nyşana degmezlik» diýmegi aňladýar. Meselem, gadymy Ysraýylda käbir esgerleriň atan sapanlary «sowa geçmeýärdi». Bu jümläni «günä etmedi» diýip terjime etse bolýar (Serdarlar 20:16). Görşümiz ýaly, günä etmek maksadyňa ýetmezligi, ýagny Hudaýyň kämil kadalarynyň çäginden çykmagy aňladýar.
Hudaý Ýaradyjy bolandygy üçin adamlara dürli kadalary bermäge haklydyr (Ylham 4:11). Biz edýän işlerimiz üçin onuň öňünde jogap bereris (Rimliler 14:12).
Hiç hili günä etmezlik mümkinmi?
Ýok, mümkin däl. Mukaddes Kitapda: «Hemmeler günä edip, Hudaýyň şöhratyndan mahrum boldular» diýilýär (Rimliler 3:23; 1 Patyşalar 8:46; Nesihat 7:20; 1 Ýahýa 1:8). Bu nädip boldy?
Ilkinji ynsan, ýagny Adam ata bilen How ene başda günäsizdi. Sebäbi olar Hudaýyň keşbinde kämil edip ýaradylypdy (1 Musa 1:27). Emma Hudaýa gulak asman, olar kämilligini ýitirdiler (1 Musa 3:5, 6, 17—19). Nesilden-nesle geçýän kesel ýaly olardan bolan çagalar hem bikämilligi miras aldylar (Rimliler 5:12). Ysraýylyň Dawut atly patyşasy: «Ejem maňa göwreli bolaly bäri men günä edip gelýärin» diýdi (Zebur 51:5).
Käbir günäleriň juda agyr bolmagy mümkinmi?
Hawa. Meselem, Mukaddes Kitapda gadymy Sodom şäheriniň ýaşaýjylarynyň «pis işleri», «uly günä edendikleri» we «günäleriniň juda agyr» bolandygy barada aýdylýar (1 Musa 13:13; 18:20). Geliň, günäniň uludygyny ýa-da agyrdygyny kesgitleýän üç aýratynlyga seredeliň.
Agyr günä. Mukaddes Kitapda jynsy ahlaksyzlyk, butparazlyk, ogurlyk, arakhorlyk, talaňçylyk, ganhorlyk we jadygöýlik ýaly agyr günälerden gaça durmak barada maslahat berilýär (1 Korinfliler 6:9—11; Ylham 21:8). Bu etmişler oýlanyşyksyz we bilmän edilen günälerden, meselem, başgalaryň göwnüne degiji sözlerden ýa-da hereketlerden tapawutlanýar (Nakyllar 12:18; Efesliler 4:31, 32). Muňa garamazdan, Ýazgylarda günä etmeklige sowuk-sala seretmeli däldigi ündelýär. Sebäbi ujypsyz günä hem Hudaýyň kanunyna garşy gelýän has agyr günä iterip biler (Matta 5:27, 28).
Adamyň niýeti. Käbir adamlar Hudaýyň kadalaryny bilmeýändigi üçin günä edýär (Resullar 17:30; 1 Timoteos 1:13). Mukaddes Kitapda şeýle adamlaryň etmişi aklanmasa-da, olar Hudaýyň kanunyny bilgeşleýin bozýan adamlardan tapawutlanýar (4 Musa 15:30, 31). Bilgeşleýin edilen günä adamyň «erbet niýetlidigini» görkezýär (Ýermeýa 16:12).
Günäniň sany. Mukaddes Kitapda bir gezek edilen günä bilen uzak wagtyň dowamynda edilen günäleriň bir-birinden tapawutlanýandygy aýdylýar (1 Ýahýa 3:4—8). Edýän hereketiniň nädogrudygyny bilip-de, «bilgeşleýin günä edýän» adamlary Hudaý ýazgarýar (Ýewreýler 10:26, 27).
Agyr günä eden adamlaryň ynsaby ezýet bermegi mümkin. Meselem, Dawut patyşa: «Ýazyklarym başymdan aşdy, olar agyr ýük kimin götererimden agyr» diýdi (Zebur 38:4). Emma Mukaddes Kitapda şeýle teselli beriji sözler bar: «Pisler öz ýollaryndan, erbetler öz pikirlerinden dänip, Rebbe dolanyp barsynlar, Reb olara rehim eder; Hudaýymyza dolansynlar, Ol gaty geçirimlidir» (Işaýa 55:7).