Mga Kagamitan sa Isang Malaking Bahay

Maraming kagamitan sa bahay ng mayayamang pamilya sa Roma. Sa kusina, gumagamit ang mga alipin ng mga kaldero at kawaling gawa sa bronse o luwad. Gumagamit naman sila ng malalaking banga at amphora para paglagyan ng alak, langis ng olibo, o iba pang likido. Sa silid-kainan, gumagamit ang mga pamilyang Romano ng mga basong may kulay at iba pang lalagyang gawa sa bronse, pilak, o luwad. May mga kagamitan din sa bahay na ginagamit sa di-marangal na paraan, gaya ng basurahan at arinola. Sa Bibliya, tinutukoy kung minsan na sisidlan ang mga tao. (Gaw 9:15) Inihalintulad ni apostol Pablo ang kongregasyong Kristiyano sa “isang malaking bahay” at ang mga miyembro nito sa ‘mga kagamitan,’ o lalagyan sa bahay. Kung paanong dapat na manatiling hiwalay ang mga sisidlang ginagamit sa “marangal na paraan” mula sa mga sisidlang ginagamit sa “di-marangal na paraan,” iniiwasan din ng mga Kristiyano ang mga nasa kongregasyon na may masamang impluwensiya.—2Ti 2:20, 21.