Tulirong mga Isipan

SA PANA-PANAHON ay nakararanas ng matinding kapanglawan si Nicole mula pa noong siya ay 14 na taóng gulang. Gayunman, sa edad na 16, nagsimula siyang makaranas ng kakaibang bagay​—isang pambihirang kalagayan ng pagiging sobra ang saya at di-pangkaraniwang sigla. Kasama sa napakaraming bagay na naglalaro sa isipan niya, di-magkakatugmang mga sinasabi, at kakulangan sa tulog ay ang walang-batayang paghihinala niya na pinagsasamantalahan siya ng kaniyang mga kaibigan. Sumunod, sinabi ni Nicole na magagawa raw niyang baguhin ang kulay ng mga bagay-bagay ayon sa kaniyang kagustuhan. Nang ganito na ang iginagawi ni Nicole, nabatid ng kaniyang ina na kailangan ang medikal na tulong, kaya dinala niya si Nicole sa ospital. Pagkatapos subaybayang mabuti ang pabagu-bagong damdamin ni Nicole, sa wakas ay nakabuo ang mga doktor ng isang diyagnosis: Si Nicole ay nakararanas ng bipolar disorder.a

Tulad ni Nicole, milyun-milyong tao sa buong daigdig ang pinahihirapan ng mood disorder (sakit na pabagu-bago ang damdamin)​—bipolar disorder man ito o iba pang anyo ng clinical depression (malulubhang uri ng panlulumo). Mapaminsala ang mga epekto ng mga sakit na ito. “Sobra-sobra ang pagpapahirap na naranasan ko sa loob ng maraming taon,” ang sabi ng isang maysakit ng bipolar na si Steven. “Naranasan ko ang labis na panlulumo at pagkatapos ay bigla akong magiging napakasaya. Nakatulong sa akin ang terapi at mga gamot, pero nakikipagpunyagi pa rin ako.”

Ano ba ang sanhi ng mga mood disorder? Ano ang nararamdaman ng isang pinahihirapan ng depresyon o bipolar disorder? Paano maaaring bigyan ng kinakailangang tulong ang mga pinahihirapan nito​—pati na ang mga nag-aalaga sa kanila?

[Talababa]