Si David at si Goliat

Inutusan ni Jehova si Samuel: ‘Pumunta ka sa bahay ni Jesse. Isa sa mga anak niyang lalaki ang susunod na hari ng Israel.’ Kaya pumunta si Samuel sa bahay ni Jesse. Nang makita niya ang panganay nito, naisip niya: ‘Siguradong ito na ’yon.’ Pero sinabi ni Jehova kay Samuel na hindi ito ang pinili Niya. Sinabi ni Jehova: ‘Ang tinitingnan ko ay ang puso ng isang tao, hindi ang hitsura niya.’

Iniharap ni Jesse kay Samuel ang anim pa niyang anak na lalaki. Pero sinabi ni Samuel: ‘Walang isa man sa kanila ang pinili ni Jehova. May iba ka pa bang anak na lalaki?’ Sinabi ni Jesse: ‘May isa pa, ang bunso kong si David. Nasa bukid siya at nag-aalaga ng mga tupa.’ Pagdating ni David, sinabi ni Jehova kay Samuel: “Siya ang pinili ko!” Binuhusan ni Samuel ng langis ang ulo ni David, ibig sabihin, siya ang pinili para maging susunod na hari ng Israel.

Makalipas ang ilang panahon, nagkaroon ng digmaan sa pagitan ng mga Israelita at ng mga Filisteo. Mayroon silang higanteng mandirigma na ang pangalan ay Goliat. Araw-araw na iniinsulto ni Goliat ang mga Israelita. Sumisigaw siya: ‘Pumili kayo ng lalaking lalaban sa akin. Kapag nanalo siya, magiging alipin n’yo kami. Pero ’pag ako ang nanalo, kayo ang magiging alipin namin.’

Nagpunta si David sa kampo ng mga Israelita para dalhan ng pagkain ang mga kuya niyang sundalo. Narinig niya ang sinabi ni Goliat, kaya sinabi niya: ‘Lalabanan ko siya!’ Sinabi ni Haring Saul: ‘Pero bata ka lang.’ Sumagot si David: ‘Tutulungan ako ni Jehova.’

Ipinasuot ni Saul ang kaniyang kagamitang pandigma kay David, pero sinabi nito: ‘Hindi ko kayang lumaban na suot ito.’ Kinuha ni David ang tirador niya at pumunta sa batis. Pumili siya ng limang makikinis na bato at inilagay sa kaniyang bag. Pagkatapos, sinugod niya si Goliat. Sumigaw ang higante: ‘Hoy, bata! Ipapakain kita sa mga ibon at sa mga hayop.’ Hindi natakot si David. Sumigaw rin siya: ‘Espada at sibat ang dala mo, pero ang dala ko, pangalan ni Jehova. Hindi kami ang kinakalaban mo kundi ang Diyos. Makikita ng lahat na mas malakas si Jehova kaysa sa espada at sibat. Ibibigay kayo ni Jehova sa aming kamay.’

Nilagyan ni David ng bato ang kaniyang tirador at pinahilagpos ito nang napakalakas. Sa tulong ni Jehova, ang bato ay tumama at bumaon sa noo ni Goliat. Bumagsak ang higante at namatay. Nagtakbuhan ang mga Filisteo para tumakas. Ikaw, nagtitiwala ka rin ba kay Jehova tulad ni David?