Tinuruan ni Jesus ang mga Alagad Kung Paano Manalangin

Gustong-gusto ng mga Pariseo na hangaan sila ng mga tao. Gumagawa sila ng mabuti para mapansin ng iba. Nananalangin sila sa mga lugar na maraming tao para makita sila. Ang mga Pariseo ay nagsasaulo ng mahahabang panalangin at inuulit-ulit nila iyon sa mga sinagoga at sa mga kalye para marinig ng mga tao. Kaya nagtaka ang mga tao nang sabihin ni Jesus: ‘Huwag n’yong gayahin ang mga Pariseo kapag nananalangin kayo. Akala nila, hahangaan sila ng Diyos kapag gumagamit sila ng maraming salita, pero hindi. Ang panalangin ay pakikipag-usap mo kay Jehova. Hindi dapat na saulado ang mga panalangin. Gusto ni Jehova na sabihin mo sa kaniya kung ano talaga ang nasa loob mo.

‘Ganito kayo dapat manalangin: “Ama namin na nasa langit, pakabanalin nawa ang iyong pangalan. Dumating nawa ang iyong Kaharian. Mangyari nawa ang iyong kalooban, kung paano sa langit, gayundin sa lupa.”’ Sinabi din ni Jesus na dapat silang manalangin para humiling ng pagkain sa araw na iyon, humingi ng tawad sa kanilang mga kasalanan, at para sa iba pang personal na mga bagay.

Sinabi ni Jesus: ‘Palagi kayong manalangin. Palagi kayong humingi ng mabubuting bagay sa inyong Amang si Jehova. Lahat ng magulang ay gustong magbigay ng mabubuting bagay sa kanilang anak. Kapag humingi ang anak n’yo ng tinapay, bibigyan n’yo ba siya ng bato? Kapag humingi siya ng isda, bibigyan n’yo ba siya ng ahas?’

Ipinaliwanag ni Jesus ang mga aral: ‘Kung kayo ay marunong magbigay ng mabubuting regalo sa inyong mga anak, lalo na ang inyong Ama, si Jehova. Magbibigay siya ng banal na espiritu, basta humingi lang kayo.’ Sinusunod mo ba ang payo ni Jesus? Ano-ano ang mga ipinapanalangin mo?