ILOG NG EHIPTO

Ipinangako ni Jehova na ibibigay sa binhi ni Abraham ang lupain “mula sa ilog ng Ehipto” hanggang sa Ilog Eufrates. (Gen 15:18) Karaniwang ipinapalagay ng mga komentarista na ang “ilog ng Ehipto” ay tumutukoy sa “agusang libis ng Ehipto” na iniuugnay ngayon sa Wadi el-ʽArish ng Peninsula ng Sinai. Ang wadi na ito ay bumubuhos sa Dagat Mediteraneo, mga 150 km (90 mi) sa S ng Port Said. (Tingnan ang EHIPTO, AGUSANG LIBIS NG.) Sa 1 Cronica 13:5 ang ilang salin ay kababasahan ng “ilog [shi·chohrʹ] ng Ehipto” (NW, La, AT), at maaaring ang tinutukoy rin nito ay ang Wadi el-ʽArish. Gayunman, posible rin na ang tinutukoy ng mga tekstong ito ay isang sanga ng Nilo.​—Tingnan ang SIHOR.