1 | Manalangin—‘Ihagis Ninyo sa Kaniya ang Lahat ng Inyong Álalahanín’

SINASABI NG BIBLIYA: ‘Ihagis ninyo sa Diyos ang lahat ng inyong álalahanín, dahil nagmamalasakit siya sa inyo.’—1 PEDRO 5:7.

Ibig Sabihin

Gusto ng Diyos na Jehova na sabihin natin sa kaniya ang anumang problema na gumugulo sa isip at puso natin. (Awit 55:22) Malaki man o maliit ang problema, puwede natin itong ipanalangin. Kung malaking bagay ito sa atin, malaking bagay rin ito kay Jehova. Ang panalangin ay isang mahalagang paraan para magkaroon ng kapayapaan ng isip.—Filipos 4:6, 7.

Kung Paano Ito Makakatulong

Kapag may problema tayo sa mental na kalusugan, baka maramdaman nating nag-iisa tayo. Hindi laging naiintindihan ng ibang tao ang pinagdaraanan natin. (Kawikaan 14:10) Pero kapag sinasabi natin sa Diyos ang nararamdaman natin, siguradong papakinggan niya tayo at maiintindihan niya tayo. Nakikita tayo ni Jehova. Alam niya ang pinagdaraanan natin at gusto niyang sabihin natin sa kaniya ang anumang ikinababahala natin.—2 Cronica 6:29, 30.

Kapag nananalangin tayo kay Jehova, mas nararamdaman nating nagmamalasakit siya sa atin. Mararamdaman din natin ang naramdaman ng salmista: “Nakita mo ang pagdurusa ko; alam mo ang paghihirap ng kalooban ko.” (Awit 31:7) Dahil alam nating nakikita ni Jehova ang mga pinagdaraanan natin, malaking tulong na iyon para makayanan ang mga problema. Pero hindi lang iyan. Wala nang mas nakakaunawa sa atin kaysa kay Jehova, at pinapatibay niya tayo sa pamamagitan ng Bibliya.

Natulungan ng Bibliya | Julian

Ang Epekto sa Akin ng Anxiety

“Meron akong anxiety at obsessive-compulsive disorder (OCD). Bigla na lang akong inaatake n’on. Ngayon, ayos lang ako; ’tapos, bigla na lang akong mag-aalala nang walang dahilan. Lalo akong nag-aalala kapag may mga kasama ako, kasi baka kung ano-ano ang iniisip nila tungkol sa akin.

“Sinusuportahan naman ako ng mga nakakaalam sa problema ko. Kaya lang, kung minsan, iba y’ong sinasabi nila sa kailangan kong marinig. Pero nagpapasalamat pa rin ako sa pagsisikap nilang makatulong.

“Kung minsan, dahil sa anxiety ko at OCD, nahihirapan akong manalangin. Hirap na hirap akong mag-concentrate at makipag-usap kay Jehova. Ang gulo-gulo ng isip ko, nalilito tuloy ako. Kapag sobrang dami na ng iniisip ko, hindi ko na alam kung paano iyon sasabihin.”

Kung Paano Ako Natulungan ng Bibliya

“Sa pag-aaral ng Bibliya, natutuhan kong hindi kailangang mahaba o napakaganda ng panalangin para tanggapin ito ng Diyos. Kung minsan, kapag hindi ko na alam ang sasabihin ko, sinasabi ko na lang: ‘Jehova, tulungan n’yo po ako.’ Kahit ganoon lang, nararamdaman kong naiintindihan ako ni Jehova at ibinibigay niya kung ano ang kailangan ko. Bukod sa panalangin, nagpapa-therapy rin ako. Masaya ako kasi bumuti ang kalagayan ko. Talagang sulit na lumapit sa ating Ama sa langit at maramdaman ang pagmamahal at suporta niya.”