3 | Makakatulong ang mga Halimbawa sa Bibliya

MABABASA SA BIBLIYA . . . Ang tapat na mga lalaki at babae na “may damdaming tulad ng sa atin.”—SANTIAGO 5:17.

Ibig Sabihin

Sa Bibliya, marami tayong mababasa tungkol sa mga lalaki at babaeng nakaramdam ng iba’t ibang emosyon. Sa pagbabasa natin ng Bibliya, baka makakita tayo ng isang karakter na may karanasang gaya ng sa atin.

Kung Paano Ito Makakatulong

Gusto nating lahat na may makaintindi sa atin. Pero lalo nating kailangan iyan kapag may problema tayo sa mental na kalusugan. Kapag nababasa natin ang karanasan ng ilang karakter sa Bibliya, baka maka-relate tayo sa kanila. Dahil diyan, nararamdaman nating may karamay tayo at hindi tayo nag-iisa kapag sobra tayong nag-aalala o nalulungkot.

Sa Bibliya, mababasa natin ang sinabi ng ilang nakaramdam na nag-iisa sila at wala nang pag-asa. Nasabi mo na rin ba, ‘Hindi ko na kaya’? Nasabi iyan nina Moises, Elias, at David.—Bilang 11:14; 1 Hari 19:4; Awit 55:4.
Mababasa natin sa Bibliya ang tungkol kay Hana. “Napakabigat ng kalooban” niya dahil hindi siya magkaanak at laging iniinsulto ng karibal niyang si Penina.—1 Samuel 1:6, 10.
Makaka-relate din tayo kay Job. Matibay ang pananampalataya niya pero noong dumanas siya ng napakatitinding problema, nasabi niya: “Kinamumuhian ko ang buhay ko; ayoko nang mabuhay pa.”—Job 7:16.

Kapag pinag-aralan natin kung paano napagtagumpayan ng mga karakter na ito sa Bibliya ang negatibong kaisipan, magkakaroon din tayo ng lakas para makayanan ang mga pinagdaraanan natin.

Natulungan ng Bibliya | Kevin

Ang Epekto sa Akin ng Bipolar Disorder

“Na-diagnose ako na may bipolar disorder noong malapit na akong mag-50. May mga panahong pakiramdam ko, kaya kong harapin ang kahit anong problema. Pero may mga panahon din na parang ayoko nang mabuhay.”

Kung Paano Ako Natulungan ng Bibliya

“Naka-relate ako sa karakter sa Bibliya na si apostol Pedro. Nakagawa siya ng mga pagkakamali kaya pakiramdam niya, wala na siyang halaga. Pero imbes na laging iyon ang isipin, humingi ng tulong si Pedro sa mga kaibigan niya na talagang nagmamalasakit sa kaniya. Kapag sinusumpong ako ng bipolar disorder, puro kahinaan ko na lang ang naiisip ko at pakiramdam ko, wala akong halaga. Gaya ni Pedro, sinikap kong manatiling malapít sa mga kaibigan kong nagpapatibay sa akin na huwag sumuko.

“Napatibay rin ako sa karanasan ni Haring David. Madalas siyang ma-depress dahil sa sitwasyon niya at sa mga pagkakamaling nagawa niya. Nakaka-relate ako sa kaniya kasi kung minsan, nakakapagsalita o nakakagawa ako ng mga bagay na pinagsisisihan ko. Napatibay ako ng sinabi ni David sa Awit 51. Sa talata 3, sinabi niya: ‘Alam na alam ko ang mga pagkakamali ko, at ang kasalanan ko ay laging nasa harap ko.’ Ganiyang-ganiyan ang nararamdaman ko kapag depressed na depressed ako, at napakababa ng tingin ko sa sarili ko. Pero naka-relate ulit ako sa sinabi ni David sa talata 10: ‘Dalisayin mo ang puso ko, O Diyos, at bigyan mo ako ng bagong saloobin na magpapatatag sa akin.’ Ganiyan din ang sinasabi ko sa Diyos para mabago ang tingin ko sa sarili ko. At ang talagang nagpatibay sa ’kin, y’ong talata 17. Sabi do’n: ‘Ang pusong wasak at durog, O Diyos, ay hindi mo itatakwil.’ Tinitiyak sa akin ng tekstong ito na mahal ako ng Diyos.

“Dahil nagpopokus ako sa mga halimbawa sa Bibliya at sa mga pagpapala ng Diyos sa akin ngayon, tumitibay ang pag-asa ko sa hinaharap. Totoong-totoo sa akin ang mga pangako ng Bibliya at nakatulong ’yon sa akin para magpatuloy sa buhay.”