Ano ang pagkakapareho nina Austin at Laurie? Naiisip man nila ito o hindi, pareho silang apektado ng isang puwersa—ang impluwensiya ng nakaugalian.

Kumusta ka naman? May mabubuting kaugalian ba na gusto mong taglayin? Marahil ang tunguhin mo ay mag-ehersisyo nang regular, magkaroon nang sapat na tulog, o maging mas malapít sa iyong mga minamahal.

Sa kabilang banda, baka gusto mong alisin ang pangit na mga nakasanayan mo, gaya ng paninigarilyo, sobrang pagkain ng junk food, o pagbababad sa Internet.

Siyempre pa, mahirap paglabanan ang pangit na mga nakasanayan. Sa katunayan, sinasabing ang mga ito ay tulad ng isang mainit na kama sa malamig na panahon: madaling makasanayan pero mahirap alisin!

Kaya paano mo makokontrol ang iyong nakaugalian at magagawa itong kapaki-pakinabang sa halip na nakapipinsala? Subukan ang sumusunod na tatlong mungkahing nakasalig sa mga prinsipyo, o simulain, sa Bibliya.

Baka natutukso kang baguhin agad ang lahat ng bagay sa buhay mo. Sinasabi mo, ‘Sa linggong ito, hindi na ako maninigarilyo, magmumura, magpupuyat, sa halip, mag-eehersisyo na ako, kakain ng masustansiyang pagkain, at tatawagan ko na ang lolo’t lola ko.’ Pero kung sabay-sabay mong aabutin ang lahat ng tunguhin mo, wala ka ngang maaabot!

Ang taong mahinhin ay makatotohanan. Kinikilala niyang limitado ang kaniyang panahon, lakas, at pag-aari. Kaya sa halip na baguhin agad ang lahat ng bagay, unti-unti niya itong ginagawa.

ANG PUWEDE MONG GAWIN

Unti-unting baguhin ang mga nakaugalian mo. Makatutulong ang sumusunod na hakbang:

1. Gumawa ng dalawang listahan—listahan ng mabubuting kaugalian na gusto mong taglayin at listahan ng pangit na nakasanayan na kailangan mong alisin. Sa bawat listahan, isulat ang lahat ng maiisip mo.

2. Magtakda ng priyoridad. Lagyan ng numero ang mga nasa listahan mula sa mahalaga hanggang sa hindi gaanong mahalaga.

3. Pumili ng ilang nakaugalian—kahit isa o dalawa—mula sa bawat listahan, at magpokus sa mga ito. Pagkatapos, isunod naman ang isa o dalawa na nasa listahan mo.

Pabilisin ang proseso, palitan ng mabubuting nakaugalian ang pangit na mga nakasanayan. Halimbawa, kung nasa listahan mo ang sobrang panonood ng TV, sikaping palitan ito ng pagiging malapít sa iyong mga minamahal. Puwede mong maging determinasyon: ‘Sa halip na manood agad ng TV pagkagaling sa trabaho, makikipagkuwentuhan ako sa isang kaibigan o kamag-anak.’

• Determinado kang kumain ng masustansiyang pagkain, pero natutukso kang kumain ng ice cream.

• Desidido kang tumigil manigarilyo, pero inaalok ka na naman ng kaibigan mong nakaaalam na nagsisikap kang tigilan ito.

• Plano mong mag-ehersisyo ngayon, pero kahit ang pagkuha ng sapatos ay parang ang hirap gawin!

Napansin mo ba ang pagkakapareho ng mga senaryo? Paulit-ulit na ipinakikita ng karanasan na ang ating sitwasyon at ang taong nakakasama natin ay nakaiimpluwensiya sa pagkakaroon natin ng mabubuting kaugalian at pag-aalis ng pangit na mga nakasanayan.

Pinapayuhan tayo ng Bibliya na patiunang mag-isip. Sa paggawa nito, maiiwasan natin ang mga sitwasyong makasisira sa ating tunguhin, at maglalagay sa atin sa mas magagandang sitwasyon. (2 Timoteo 2:22) Sa madaling salita, makabubuti kung kokontrolin natin ang ating sitwasyon.

ANG PUWEDE MONG GAWIN

• Gawing mas mahirap ang paggawa ng mali. Halimbawa, kung ayaw mo nang kumain ng junk food, huwag maglagay sa kusina ng pagkaing alam mong hindi makabubuti sa iyo. Sa gayon, kahit natutukso kang kumain nito, wala kang makakain.

• Gawing mas madali ang paggawa ng tama. Halimbawa, kung plano mong mag-ehersisyo nang maaga, gabi pa lang ihanda na ang isusuot mo. Kapag mas madaling magsimula, mas malamang na masundan pa ito.

• Mag-ingat sa pagpili ng mga kaibigan. May tendensiya tayong maging katulad ng mga nakakasama natin. (1 Corinto 15:33) Kaya limitahan ang pakikisama sa mga taong may kaugalian na sinisikap mong alisin, at makipagkaibigan sa mga tutulong sa iyo na magkaroon ng mabubuting kaugalian.

Sinasabing 21 araw ang kailangan para magkaroon ng isang bagong kaugalian. Pero ang totoo, ipinakikita ng pag-aaral na para sa ilan, mas maikling panahon ang kailangan—at mas mahaba naman sa iba—para makagawa ng malalaking pagbabago. Dapat ka bang masiraan ng loob?

Pag-isipan ang senaryong ito: Isipin na gusto mong mag-ehersisyo tatlong beses sa isang linggo.

• Sa unang linggo, nagawa mo ito.

• Sa ikalawang linggo, hindi ka nakapag-ehersisyo ng isang araw.

• Sa ikatlong linggo, nagawa mo ulit ito.

• Sa ikaapat na linggo, kahit isang beses, hindi ka nakapag-ehersisyo.

• Sa ikalimang linggo, naabot mo ulit ang tunguhin mo, at mula noon, nagagawa mo na ito linggo-linggo.

Kinailangan ng limang linggo para magkaroon ka ng bagong kaugalian. Parang mahabang panahon iyan, pero minsang naabot mo ang iyong tunguhin, magiging masaya ka kasi nagkaroon ka ng isang bago at magandang kaugalian.

Hinihimok tayo ng Bibliya na maging matiyaga. Ang mahalaga ay hindi kung ilang beses kang nabuwal, kundi kung ilang beses kang bumangon.

ANG PUWEDE MONG GAWIN:

• Huwag isiping kapag nabigo ka, permanente na iyon. Asahan na habang inaabot mo ang iyong mga tunguhin may mga bagay na hindi mo magagawa.

• Magpokus sa mga pagkakataong nagawa mo ang tama. Halimbawa, kapag sinisikap mong pasulungin ang pakikipag-usap sa mga anak mo, tanungin ang sarili: ‘Kailan ang huling pagkakataon na parang gusto kong sigawan ang mga anak ko, pero hindi ko ginawa? Ano ang ginawa ko? Paano ko mauulit iyon?’ Tutulong sa iyo ang mga tanong na iyan na magtagumpay sa halip na magpokus sa iyong mga kabiguan.

Gusto mo bang malaman kung paano makatutulong ang mga prinsipyo sa Bibliya sa iba pang aspekto ng buhay, gaya ng pagharap sa kabalisahan, pagkakaroon ng masayang pamilya, at paghahanap ng tunay na kaligayahan? Makipag-usap sa isang Saksi ni Jehova, o magpunta sa aming website na jw.org/tl.