Sa Galilea naganap ang ilan sa namumukod-tanging mga pangyayari sa ministeryo ni Jesus. Sa isang gilid ng bundok sa Capernaum, binigkas ni Jesus ang kaniyang bantog na Sermon sa Bundok. (Mat 5:1, 2) Dito sa Galilea, makahimala niyang pinagaling ang maraming tao.​—Mar 1:32-34; 6:53-56; Ju 4:46-54.

Paano tinanggap sa Galilea ang pangangaral at mga himala ni Jesus? Nang mangaral siya sa Nazaret na kaniyang sariling bayan, noong pasimula ay ‘namangha ang mga tao sa kaakit-akit na mga salitang lumalabas sa kaniyang bibig.’ Ngunit matapos silang ihambing ni Jesus sa mga Israelita noong mga araw ni Elias at Eliseo, tinangka nilang patayin siya. (Luc 4:22-30) Gayunman, sa pangkalahatan ay napakahusay ng pagtugon ng mga taga-Galilea sa ministeryo ni Jesus. Kaya naman, ang una niyang mga alagad ay kinuha niya mula sa mga taga-Galilea, at ang lahat ng kaniyang mga apostol (posibleng maliban kay Hudas Iscariote) ay mga taga-Galilea. (Mat 4:18-22; Luc 6:12-16) Ang grupo ng mga 120 alagad na tumanggap ng banal na espiritu noong araw ng Pentecostes 33 C.E. ay mga taga-Galilea.​—Gaw 1:15; 2:1-7.

ANG loobang tubig-tabang na lawa na tinatawag na Dagat ng Galilea, Dagat ng Tiberias, o Lawa ng Genesaret, ay napalilibutan ng mga burol sa hilagang Palestina. (Larawan sa ibaba) Tulad ng hiyas sa isang malalim na lunas, ang lawa ay mga 210 m (700 piye) ang kababaan mula sa kapantayan ng dagat. Ito ay may haba na mga 21 km (13 mi) at lapad na mga 12 km (7.5 mi). Maraming namumukod-tanging pangyayari sa ministeryo ni Jesus ang naganap kapuwa sa lawang ito at sa palibot nito.

Sa ilang pagkakataon, nagsalita si Jesus mula sa isang bangka sa mga pulutong na nagkakatipon sa baybayin ng dagat na ito. (Mar 4:1, 2) Ang Capernaum, isang lunsod sa hilagang baybayin, ay nakilala bilang ang “sariling lunsod” ni Jesus, bagaman madalas siyang naglalakbay noon. (Mat 9:1; Mar 2:1) Naglakad si Jesus sa ibabaw ng tubig ng dagat na ito at nagpakita siya malapit dito matapos siyang buhaying-muli.​—Ju 6:1, 16-21; 21:1, 4-19.