Mga Tipunang-tubig ng Jerusalem. Ang tinatayang lokasyon ng tipunang-tubig ni Haring Hezekias na karugtong ng padaluyang ginawa niya para dalhin ang tubig ng bukal ng Gihon papunta sa Jerusalem ay ang Tipunang-tubig ng Siloam, ang kasalukuyang Birket Silwan na nasa TK ng Lunsod ni David. (2Ha 20:20; 2Cr 32:30) Lumilitaw na ang unang-siglong Tipunang-tubig ng Siloam (Ju 9:7) ay natagpuan malapit dito, mga 100 m (330 piye) sa TTS ng Birket Silwan.

Ang mga pagtukoy ng Bibliya sa “lumang tipunang-tubig” (Isa 22:11), “mataas na tipunang-tubig” (2Ha 18:17; Isa 7:3; 36:2), at “mababang tipunang-tubig” (Isa 22:9) ay walang ipinahihiwatig tungkol sa eksaktong kinaroroonan ng mga ito may kaugnayan sa lunsod ng Jerusalem. Karaniwang ipinapalagay ng mga iskolar na ang “mababang tipunang-tubig” (marahil ay yaon ding “Tipunang-tubig ng Batis” na binanggit sa Ne 3:15) ay maiuugnay sa Birket el-Hamra na nasa timugang dulo ng Libis ng Tyropoeon. Ngunit iba-iba naman ang opinyon tungkol sa lokasyon ng “mataas na tipunang-tubig.”​—Tingnan ang TIPUNANG-TUBIG NG BATIS.

Maliwanag na ang “Tipunang-tubig ng Hari” ay nasa pagitan ng Pintuang-daan ng mga Bunton ng Abo at ng Pintuang-daan ng Bukal. (Ne 2:13-15) Maaaring ito rin ang tipunang-tubig na binabanggit sa Nehemias 3:16.

Tungkol sa Tipunang-tubig ng Betzata, tingnan ang BETZATA.

Isang tipunang-tubig o imbakan ng tubig. Lumilitaw na ito’y nasa dakong T ng Lunsod ni David kung saan nagsasalubong ang Libis ng Hinom at ang Gitnang Libis (Libis ng Tyropoeon). (Ne 3:15) Waring ang tipunang-tubig na ito ay tinawag ding “mababang tipunang-tubig.”​—Isa 22:9.

Tinutukoy ito bilang “Tipunang-tubig ng Shela” sa tekstong Masoretiko sa Nehemias 3:15. Naniniwala ang ilang iskolar na ang “Shela” ay dapat baguhin at gawing “Siloa,” na nangangahulugang “Tagapagpadala” at tumutukoy sa isang kanal, o lagusan, ng tubig patungo sa isang tipunang-tubig. (Isa 8:6) Kaya bagaman hindi isinalin ng ilang bersiyon ng Bibliya ang “Shela,” isinalin naman ng The Jerusalem Bible ang pananalitang ito bilang “padaluyan ng tubig,” at ang Bagong Sanlibutang Salin ay kababasahan ng “Tipunang-tubig ng Batis.”

May natagpuang mga guho ng isang lagusan, o kanal, na bumabagtas patungong T mula sa bukal ng Gihon. Sumusunod ito sa kurba ng pampang ng Kidron at ang dulo nito’y isang sinaunang imbakan ng tubig na tinatawag ngayong Birket el-Hamra. May mga seksiyon ng kanal na natatakpan ng malalapad na bato, ngunit waring may mga butas upang makalabas ang tubig para patubigan ang ilang bahagi ng libis. Palusong nang kaunti ang kanal at maaaring ito ang tinutukoy sa mga salitang “ang tubig ng Siloa na umaagos nang banayad.” (Isa 8:6) Ang lokasyon ng Birket el-Hamra ay tumutugma sa binanggit ni Nehemias na lokasyon ng Tipunang-tubig ng Batis, malapit sa Hardin ng Hari at sa Hagdanan na pababa mula sa T na dulo ng Lunsod ni David.