Maaaring ang “ilog ng Ehipto” (Gen 15:18) ay ang “agusang libis ng Ehipto” rin.​—Bil 34:5; tingnan ang SIHOR.

Kadalasan, ang Eufrates ay basta tinatawag na “Ilog.” (Jos 24:2, 3; Ezr 8:36; Isa 7:20; 27:12; Mik 7:12) Yamang ito ang pinakamahaba at pinakamahalagang ilog sa TK Asia, para sa mga Hebreo, ang Eufrates ay ang “malaking ilog.” (Gen 15:18) Kaya hindi lumilikha ng kalituhan ang pagtukoy rito bilang ang “Ilog.”

Ipinangako ni Jehova na ibibigay sa binhi ni Abraham ang lupain “mula sa ilog ng Ehipto” hanggang sa Ilog Eufrates. (Gen 15:18) Karaniwang ipinapalagay ng mga komentarista na ang “ilog ng Ehipto” ay tumutukoy sa “agusang libis ng Ehipto” na iniuugnay ngayon sa Wadi el-ʽArish ng Peninsula ng Sinai. Ang wadi na ito ay bumubuhos sa Dagat Mediteraneo, mga 150 km (90 mi) sa S ng Port Said. (Tingnan ang EHIPTO, AGUSANG LIBIS NG.) Sa 1 Cronica 13:5 ang ilang salin ay kababasahan ng “ilog [shi·chohrʹ] ng Ehipto” (NW, La, AT), at maaaring ang tinutukoy rin nito ay ang Wadi el-ʽArish. Gayunman, posible rin na ang tinutukoy ng mga tekstong ito ay isang sanga ng Nilo.​—Tingnan ang SIHOR.