SAMPUNG SALITA

Ang saling ito ng pananalitang Hebreo na ʽaseʹreth had·deva·rimʹ, masusumpungan lamang sa Pentateuch, ay tumutukoy sa sampung saligang kautusan ng tipang Kautusan; karaniwan itong tinatawag na Sampung Utos. (Exo 34:28; Deu 4:13; 10:4) Ang pantanging kodigong ito ng mga kautusan ay tinutukoy rin bilang ang ‘mga Salita’ (Deu 5:22) at bilang ang “mga salita ng tipan.” (Exo 34:28) Ang Griegong Septuagint (Exo 34:28; Deu 10:4) ay kababasahan naman ng deʹka (sampu) loʹgous (mga salita), anupat mula sa kombinasyong ito hinalaw ang salitang “Dekalogo.”

May kinalaman sa unang pares ng mga tapyas, sinasabing ang mga ito ay hindi lamang ginawa ni Jehova kundi “sinulatan [din] ng daliri ng Diyos,” maliwanag na tumutukoy sa espiritu ng Diyos. (Exo 31:18; Deu 4:13; 5:22; 9:10) Sa katulad na paraan, bagaman si Moises ang umukit ng ikalawang pares ng mga tapyas, si Jehova ang sumulat sa mga iyon. Sa Exodo 34:27, nang sabihan si Moises, “Isulat mo sa ganang iyo ang mga salitang ito,” hindi ang mismong Sampung Salita ang tinutukoy, kundi, sa halip, gaya noong isang pagkakataon bago nito (Exo 24:3, 4), isusulat niya ang ilan sa iba pang mga detalye may kinalaman sa mga tuntunin ng tipan. Kaya sa Exodo 34:28b, ang panghalip na “niya” ay tumutukoy kay Jehova nang sabihin nito: “At isinulat niya [ni Jehova, hindi ni Moises] sa mga tapyas ang mga salita ng tipan, ang Sampung Salita.” Ipinakikita ng talata 1 na ganito nga ang nangyari. Nang maglaon, noong inaalaala ni Moises ang mga pangyayaring ito, pinatotohanan niya na si Jehova ang gumawa ng kopya ng mga tapyas.​—Deu 10:1-4.