Ang dahilan kung bakit mahalaga ang kakayahang mag-isip sa pagpapanatili ng moral na kalinisan sa isang di-malinis na sanlibutan ay sapagkat ang mga paraan ng isang imoral na tao ay nakararahuyo. Si Solomon ay nagbabala: “Sapagkat ang mga labi ng di-kilalang babae ay tumutulo na gaya ng bahay-pukyutan, at ang kaniyang ngalangala ay mas madulas kaysa sa langis. Ngunit ang idudulot niya ay kasimpait ng ahenho; ito ay kasintalas ng tabak na may dalawang talim.”​—Kawikaan 5:3, 4.

Ang mga epekto ng imoralidad ay kasimpait ng ahenho at kasintalas ng tabak na may dalawang talim​—masakit at nakamamatay. Ang isang bagbag na budhi, di-ninanais na pagdadalang-tao, o sakit na naililipat sa pagtatalik ay kadalasang mapapait na bunga ng gayong paggawi. At isip-isipin ang matinding sakit ng damdamin na nararanasan ng asawa ng isang di-tapat na indibiduwal. Ang isang gawa ng kataksilan ay maaaring lumikha ng mga sugat na lubhang malalim anupat maaaring manatili habang buhay. Oo, nakasasakit ang imoralidad.